(ភ្នំពេញ)៖ លោកស្រីកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា បានអំពាវនាវឱ្យស្ត្រីទាំងអស់គ្នាត្រូវរួមគ្នាថែរក្សាសមិទ្ធផលសន្តិភាព និងសមិទ្ធផល ៧ មករា ដែលសម្រេចបានយ៉ាងលំបាកបំផុតដោយខ្មែរខ្លួនឯងនេះឱ្យបាន ដេីម្បីចូលរួមចំណែកក្នុងកិច្ចអភិវឌ្ឍប្រទេសជាតិ, ត្រូវផ្សព្វផ្សាយដល់ប្រជាពលរដ្ឋអំពីសមិទ្ធផលរបស់គណបក្សសម្រេចបាន, ត្រូវធ្វេីអំពេីល្អ និងបម្រេីសេវាសាធារណៈឱ្យបានល្អជូនប្រជាពលរដ្ឋ និងមិនត្រូវសប្បាយនឹងសន្តិភាព ហេីយភ្លេចថែរក្សាសន្តិភាពនោះទេ។
ការអំពាវនាវបែបនេះរបស់លោកស្រីកិត្តិសង្គហបណ្ឌិត ម៉ែន សំអន បានធ្វើឡើងនៅក្នុងឱកាសជួបសំណេះសំណាលជាមួយស្ត្រី ជាថ្នាក់ដឹកនាំនៃរដ្ឋបាលថ្នាក់ក្រោមជាតិនៅទូទាំងប្រទេស ដែលមានសមាជិកចូលរួមចំនួន ២៨៧នាក់ និងអបអរសាទរខួបទី១១២ ទិវាអន្តរជាតិនារី ៨មីនា ២០២៣ ក្រោមមូលបទ «ស្ត្រីរួមគ្នា រក្សាសុខសន្តិភាព ដើម្បីកិច្ចអភិវឌ្ឍ ក្នុងយុគសម័យឌីជីថល» នៅវិមាន ៧មករា នាររសៀលថ្ងៃទី៥ ខែមីនា ឆ្នាំ២០២៣នេះ។
ថ្លែងក្នុងឱកាសនោះ លោកស្រីកិត្តិសង្គហបណ្ឌិត ម៉ែន សំអន ក៏បានពាំនាំនូវការផ្តាំផ្ញើសួរសុខទុក្ខ ការនឹករលឹកពីសំណាក់សម្តេច តេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនដល់សមាជិកទាំងអស់ដែលបានចូលរួមក្នុងកម្មវិធីថ្ងៃនេះ។
លោកស្រីកិត្តិសង្គហបណ្ឌិត ម៉ែន សំអន ក៏បានកោតសសើរដល់ស្ត្រីថ្នាក់ដឹកនាំថ្នាក់ក្រោមជាតិ ដែលបានបំពេញការងារបានយ៉ាងល្អ និងទទួលបានគួរជាទីមោទនៈ។ តាមរយៈការប្រយុទ្ធប្រឆាំងនឹងជំងឺកូវីដ១៩ ក៏ដូចជាក្នុងការបោះឆ្នោតក្រុមប្រឹក្សាឃុំ សង្កាត់អាណត្តិទី៥ ដោយទទួលបានការគាទ្រំសមាជិកគណបក្សប្រជាជនកម្ពុជានៅទូទាំងប្រទេស។ ជ័យជម្នះដ៏ត្រចះត្រចង់នេះ កាន់តែបានបង្ហាញឱ្យឃើញច្បាស់ថាប្រជាជនកម្ពុជាត្រូវការចាំបាច់នូវតួនាទីដឹកនាំរបស់គណបក្សប្រជាជនកម្ពុជាទាំងនៅថ្នាក់ជាតិ ទាំងនៅថ្នាក់មូលដ្ឋានភូមិ ឃុំ សង្កាត់។
ដោយឡែកនៅក្នុងថ្ងៃនេះផងដែរ ក៏មានវត្តមានរបស់លោកស្ត្រីជាមេឃុំ ៥អាណតិ ចំនួន៩រូប បានចូលរួមផងដែរ។ តាមរយៈការបំពេញការងារក្នុង៥អាណត្តិនេះ ក៏បានបង្ហាញថា ស្ត្រីខ្មែរនៅតែរក្សាបាននូវកិត្យានុភាពគ្រប់សម័យកាលរួមមានទី១៖ លោកស្រី ប្រាក់ ម៉ាលី, ទី២៖ លោកស្រី តៅ មន្ថា, ទី៣៖ លោកស្រី ប៉ែន អ៉ិន, ទី៤៖ លោកស្រី ទេព សោមុន្នី, ទី៥៖ លោកស្រី ឮ ចិន្តា, ទី៦៖ លោកស្រី ហៀង សុផល, ទី៧៖ លោកស្រី សោម សុខុម, ទី៨៖ លោកស្រី ឌុច ម៉ាលីន និងទី៩៖ លោកស្រី តាំង គឹមឆេង។
លោកស្រីក៏បានឧបត្ថម្ភដល់ ស្ត្រីចំនួន ១៨៨នាក់ ជាប្រធានក្រុមប្រឹក្សាស្រុក អភិបាលស្រុក មេឃុំ ចៅសង្កាត់ក្នុងម្នាក់ៗទទួលបានថវិកា ១០ម៉ឺនរៀល និងក្រណាត់ប៉ាក់ ១ដុំ ចំណែកឯស្ត្រី ៩៩នាក់ទៀត បានទទួលក្រណាត់ប៉ាក់១ដុំ៕
