លោក លឹម សៀងហេង អភិបាលក្រុងបាវិត រួមនឹងលោក ចៅសង្កាត់បាវិត ព្រមទាំងសប្បុរសជន នានា នៅក្នុងភូមិបាវិតលើ សង្កាត់បាវិត ក្រុងបាវិត ខេត្តស្វាយរៀង នៅព្រឹកថ្ងៃទី ៥ ខែមីនា ឆ្នាំ ២០២៣ នេះ បានអញ្ជើញប្រគល់ ផ្ទះមួយខ្នង និងម៉ូតូមួយគ្រឿង ដល់ស្ត្រីមេម៉ាយម្នាក់ ដែលមានកូនប្រុសស្រី ចំនួន ៦ នាក់ រស់នៅក្នុងបន្ទុក ដើម្បីជួយសម្រួលដល់ជីវភាពរស់នៅក្នុងគ្រួសាររបស់គាត់ ។
លោក យស់ ឌី មេភូមិបាវិតលើ សង្កាត់បាវិត បានមានប្រសាសន៍ឲ្យដឹងថា: ស្ត្រីមេម៉ាយ ដែលទទួលបានផ្ទះមួយខ្នង រួមនឹងម៉ូតូមួយគ្រឿងនេះ មានឈ្មោះ សួស សុខ អាយុ ៤១ ឆ្នាំ មានទីលំនៅភូមិបាវិតលើ សង្កាត់បាវិត ក្រុងបាវិត ខេត្តស្វាយរៀង មានមុខរបរ ជាអ្នកដើរលាងចាន និងបោកខោអាវ ឲ្យគេនៅតាមផ្ទះ ហើយសព្វថ្ងៃ មានកូន ៦ នាក់ រស់នៅក្នុងបន្ទុកបច្ចុប្បន្ន កំពុងជួបការលំបាក ក្នុងជីវភាពរស់នៅ ។
លោកមេភូមិ បានមានប្រសាសន៍បន្តទៀតថា: ដោយមើលឃើញនូវការលំបាកក្នុង គ្រួសារស្ត្រី ខាងលើនេះ ជាគ្រួសារក្រីក្រ គ្មានទីជម្រក ទើបលោកបានខ្នះខ្នែងស្វែងរក សប្បុរសជននានា នៅក្នុងមូលដ្ឋាន ដើម្បីសង់ផ្ទះមួយខ្នង ធ្វើអំពីស័ង្កសី មានទទឹង ៤,១ ម៉ែត្រ បណ្ដោយ ៧,៨ ម៉ែត្រ ព្រមទាំងម៉ូតូមួយគ្រឿង ដើម្បីជួយផ្គត់ផ្គង់ដល់គ្រួសារស្ត្រី ខាងលើ ដើម្បីមានទីជម្រករស់នៅ បានសមរម្យ និងមានមធ្យោបាយ សម្រាប់ធ្វើដំណើរ ដើម្បីប្រកបមុខរបរចិញ្ចឹមជីវិត បានងាយស្រួល ទៅថ្ងៃក្រោយ ដែលចំណាយថវិកា សរុបអស់ប្រមាណជាង ១ ពាន់ដុល្លារសហរដ្ឋអាមេរិក។
លោក លឹម សៀងហេង អភិបាលក្រុងបាវិត បានមានប្រសាសន៍ថា: កន្លងមក ជនទីទ័លក្រ ចាស់ជរា ពិការ មិនថាតែប្រជាពលរដ្ឋ មួយគ្រួសារនេះទេ រដ្ឋបាលក្រុង សង្កាត់ សប្បុរសជននានា រួមនឹងខាងកាកបាទក្រហមកម្ពុជាក្រុង ក៏ធ្លាប់បានផ្តល់ អំណោយជូនផងដែរ ប៉ុន្តែវាមិនគ្រប់តម្រូវការរបស់ ពួកគាត់ទាំងអស់នោះឡើយ គឺជួយបានមួយគ្រាតែប៉ុណ្ណោះ។
លោកអភិបាលក្រុង ក៏បានថ្លែងអំណរគុណដល់សប្បុរសជននានា ដែលតែងតែផ្តល់ ជាគ្រឿងឧបភោគបរិភោគ និងថវិកា ដើម្បីយកមកចែកជូនដល់ពលរដ្ឋទីទ័លក្រ ចាស់ជរា ជនពិការភាព ក្នុងមូលដ្ឋានរបស់លោក ក៏ដូចជាពលរដ្ឋទីទ័លក្រផ្សេងទៀត ផងដែរ ដោយមិនទុកឲ្យពួកគាត់ រស់នៅក្នុងស្ថានភាពជួបការលំបាក ដោយពុំបានជួយដោះ ស្រាយនោះទេ។
លោកអភិបាលក្រុងបាវិត ក៏បានជំរុញដល់ក្រុមគ្រួសារ បងប្អូនប្រជាពលរដ្ឋទាំងអស់ ត្រូវត្រៀមខ្លួន ត្រៀមឯកសារ ដើម្បីទៅបោះឆ្នោតជ្រើសតាំងតំណាងរាស្ត្រ នាពេលខាង មុខ គឺបន្តបោះឆ្នោតគាំទ្រគណបក្សប្រជាជនកម្ពុជា ដើម្បីសុខសន្តិភាព និងបន្តការអភិវឌ្ឍ រីកចម្រើនជាបន្តទៅទៀត៕
