(ស្វាយរៀង)៖ លោក ជា ជាតិ អនុរដ្ឋលេខាធិការក្រសួងអប់រំ យុវជន និងកីឡា នៅក្នុងពិធីបិទសន្និបាតបូកសរុបការងារអប់រំ យុវជន និងកីឡាឆ្នាំសិក្សា២០២១-២០២២ និងលើកទិសដៅការងារឆ្នាំសិក្សា២០២២-២០២៣ បានដាក់ទិសដៅ៧ចំណុច ឲ្យមន្ទីរអប់រំខេត្តស្វាយរៀង អនុវត្តឱ្យបានជោគជ័យបន្ថែមទៀត។
ពិធីបិទសន្និបាតនេះមានការចូលរួមពីលោក តូច ប៉ូលីវ៉ា អភិបាលរងខេត្តស្វាយរៀង តំណាងលោកអភិបាលខេត្ត និងលោក ខៀវ សំអុល ប្រធានមន្ទីរអប់រំ យុវជន និងកីឡាខេត្ត, លោក លោកស្រី ជាមន្ត្រីមន្ទីរអប់រំ និងលោក លោកស្រី ដែលជាប្រធានការិយាល័យអប់រំស្រុកក្រុងទាំង៨ នាយកសាលាគ្រប់កម្រិត មន្ទីរជុំវិញខេត្តជាច្រើនអ្នកផងដែរ។
លោកអនុរដ្ឋលេខាធិការក្រសួងអប់រំ បានដាក់ទិសដៅឱ្យមន្ទីរអប់រំ យុវជន និងកីឡាខេត្តស្វាយរៀង អនុវត្ត៧ចំណុចរួមមាន៖
*ទី១៖ លើកកម្ពស់ការធ្វើបដិវត្តន៍កម្មការងារអប់រំ យុវជន និងកីឡាជាប្រចាំ។ បន្តពង្រឹងសេវាអប់រំឱ្យមានគុណភាព សមធម៌ និងបរិយាប័ន្នព្រមទាំងលើកម្ពស់ការសិក្សាពេញមួយជីវិតសម្រាប់ទាំងអស់គ្នា និងដោះស្រាយការរៀនសូត្រ របស់សិស្សានុសិស្ស និងយុវជន ដែលជួបការលំបាកនានា។
*ទី២៖ បន្តលើកកម្ពស់ បរិស្ថានស្អាត សេវាល្អ បន្តថែទាំកែលម្អ ជួសជុល កសាងអគារសិក្សា និងបំពាក់គ្រឿង សង្ហារឹមឲ្យបានគ្រប់គ្រាន់ យកចិត្តទុកដាក់កសាងបណ្ណាល័យ បន្ទប់ពិសោធន៍ រោងជាង បន្ទប់គេហៈវិជ្ជា សួនច្បារ សួនបន្លែ សួនជីវៈចំរុះ បរិស្ថានបៃតង ទីលានកីឡា។ បន្តលើកកម្ពស់ការអប់រំបរិស្ថាន ការដាំដើមឈើក្នុងទីធ្លាសាលា ក្នុងថ្នាក់ និងការគ្រប់គ្រងសំរាម។
*ទី៣៖ បន្តអភិវឌ្ឍន៍សមត្ថភាពគ្រប់គ្រង និងដឹកនាំរបស់មន្ត្រីអប់រំគ្រប់លំដាប់ថ្នាក់ ការកែទម្រង់ការអនុវត្តបណ្ដុះបណ្ដាលគ្រូ ការអភិវឌ្ឍន៍វិជ្ជាជីវៈជាប្រចាំរបស់គ្រូបង្រៀនក្នុងទឹសស្លោក គ្រប់គ្រងល្អ បង្រៀនល្អ រៀនល្អ។
*ទី៤៖ បន្តអភិវឌ្ឍការអប់រំឌីជីថល តារយៈការធ្វើសមាហរណកម្មបច្ចកវិទ្យាឌីជីថលទៅក្នុងគ្រប់កម្រិតកម្មវីធីសិក្សា បំពាក់បន្ទប់ពិសោធន៍ឌីជីថលនៅតាមគ្រឹះស្ថានសិក្សា លើកកម្ពស់សមត្ថភាពគ្រូបង្រៀនផ្នែកឌីជីថល ព្រមទាំងផ្សព្វផ្សាយការងារនេះឱ្យបានទូលំទូលាយ។
*ទី៥៖ បន្តលើកកម្ពស់ការចូលរួមរបស់មាតាបិតា អ្នកអាណាព្យាបាល សហគមន៍ដើម្បីជួយតាមដានការសិក្សារបស់កូននឹងជួយអភិវឌ្ឍសាលារៀន។
*ទី៦៖ បន្តអនុវត្តកាន់តែសកម្មលើការងារកាយរិទ្ធ និងយុវជនដោយប្រកាន់ខ្ជាប់អំពើល្អក្នុងសង្គមតាមរយៈការបំផុសចលនា កូនល្អ សិស្សល្អ មិត្តល្អ ពលរដ្ឋល្អ កម្មវិធីយុវជនស្ម័គ្រចិត្ត នៅតាមសហគមន៍ជាមួយ ការបណ្ដុះបណ្តាលជំនាញបច្ចេកទេសនិងជំនាញទន់ដល់យុវជន ដើម្បីឆ្លើយតបទាន់ពេលវេលាទៅនឹងឱកាសការងារក្នុងសង្គម។
*ទី៧៖ បន្តលើកកម្ពស់សុខភាពអនាម័យនៅតាមគ្រឹះស្ថានសិក្សា ដោយយកចិត្តទុកដាក់ការលក់ដូរក្នុងសាលា ការហាត់ប្រាណ គាំទ្រសុខភាពផ្លូវកាយ ផ្លូវចិត្តរបស់សិស្ស។
លោក ខៀវ សំអុល បានឲ្យដឹងថា កិច្ចពិភាក្សាក្នុងអង្គសន្និបាត បានសម្រេចដាក់ចេញនូវអនុសាសន៍មួយចំនួនដូចខាងក្រោម៖
*មន្ត្រីអប់រំគ្រប់លំដាប់ថ្នាក់ត្រូវគោរពច្បាប់ អនុវត្តលិខិតបទដ្ឋានគតិយុត្តិទាំងឡាយជាធរមាន ប្រមូលកុមារដល់វ័យសិក្សាឲ្យចូលរៀនប្រកបដោយសមធម៌ បង្កើនអត្រាឡើងថ្នាក់ឲ្យបានខ្ពស់នៅគ្រប់កម្រិតសិក្សា ពិសេសការប្រឡងសញ្ញាបត្រមធ្យមសិក្សា ទុតិយភូមិឲ្យទទួលបាននិទ្ទេសល្អជាងឆ្នាំមុនៗ។
*កាត់បន្ថយអត្រាត្រួតថ្នាក់ និងអត្រាបោះបង់ការសិក្សាគ្រប់កម្រិតកែលម្អនិងអភិវឌ្ឍសាលារៀនឲ្យក្លាយជាសាលាកុមារមេត្រីបរិស្ថានល្អ ដើម្បីទាក់ទាញសិស្សឲ្យស្រឡាញ់ការរៀនសូត្រ។
*ជំរុញការថែទាំសុខភាពតាមរយៈការលក់ដូរចំណីអាហារមានសុខភាព និងសុវត្ថិភាពបន្តកិច្ចសហការល្អជាមួយអង្គការដៃគូជាតិអន្តរជាតិ ដើម្បីអភិវឌ្ឍវិស័យអប់រំក្នុងខេត្តឲ្យកាន់តែរីកចម្រើន។
លោក ខៀវ សំអុលបានបញ្ជាក់ថា បញ្ហាប្រឈមសំខាន់ៗក្នុងឆ្នាំ២០២២-២០២៣ រួមមាន៖
*នៅក្នុងឆ្នាំសិក្សា២០២២-២០២៣នេះ គ្មានគ្រូបង្រៀនចេញថ្មី ធ្វើឱ្យខ្វះ គ្រូមួយចំនួនចូលនិវត្តន៍ និងទទួលមរណៈភាពដោយសារជំងឺ។ សាលារៀនមួយចំនួនខ្វះអគារសិក្សា អគារសិក្សាខ្លះទ្រុឌទ្រោម និងខូចខាត ដែលតម្រូវ ឱ្យមាន ការជួសជុលជាបន្ទាន់ផងដែរ៕
