(ខេត្តក្រចេះ) ÷ នៅរសៀលថ្ងៃសុក្រ ទី១០ ខែកុម្ភៈឆ្នាំ ២០២៣ បុរស់ម្នាក់ឈ្មោះ ធាង ភក្តី អាយុ១៨ឆ្នាំ រស់នៅភូមិត្រាំដុំ ឃុំវឌ្ឍនៈ ស្រុកសំបូរ ខេត្តក្រចេះ ហេតុតែក្រពេក មានលុយបន្តិចបន្ទួច ទៅទិញម៉ូតូ កញ្ចាស់មួយគ្រឿង ទៅរកស៊ីដឹកឈើ (កូនក្រឡឹង)ដឹកចេញពីតំបន់ព្រៃឡង់ យកទៅលក់ ត្រូវបានម៉ូតូបែកកង់ ក្រឡាប់ ផ្ងារជើងត្រូវឈើកិនពីលើស្លាប់ភ្លាមៗនៅនឹងកន្លែង។
ហេតុការណ៍នេះ កើតឡើងនៅ តាមដងផ្លូវក្រាលគ្រោះក្រហមភូមិត្រាំដុំ ឃុំវឌ្ឍនៈស្រុកសំបូរខេត្តក្រចេះ។
ក្រោយកើតហេតុ ត្រូវបងប្អូនអ្នកធ្វើដំណើរ និងអ្នកភូមិ បានឃើញហេតុការណ៍ក៏រាយការណ៍ជូនសមត្ថកិច្ច និងប្រាប់ទៅសាច់ញាតិ ក្រោយមកសមត្ថកិច្ច ក៏បាន ធ្វើកោសល្យវិច្ច័យហើយ បានបញ្ជូនសព ទៅឱ្យបងប្អូនសាច់ញាតិ យកទៅធ្វើបុណ្យតាមប្រពៃណី។
សូមបញ្ជាក់ផងដែរថា បច្ចុប្បន្នប្រជាពលរដ្ឋរស់នៅក្នុងខេត្តក្រចេះ ជាពិសេសប្រជាពលរដ្ឋរស់ នៅស្រុកសំបូរ ស្រុកព្រែកប្រសព្វ ភាគច្រើន ប្រកបមុខរបរ រកស៊ីដឹកឈើ តាមម៉ូតូ ហើយកន្លងមកតែងតែ បន្តបង្កគ្រោះថ្នាក់ចរាចរណ៍ដល់អ្នកធ្វើដំណើរ ព្រោះពេលខ្លះដឹកឈើវែងៗ។
ប្រជាពលរដ្ឋដែលធ្វើដំណើរតាមដងផ្លូវ សំណូមពរទៅដល់អាជ្ញាធរគ្រប់ជាន់ថ្នាក់ ដែលមានសមត្ថកិច្ច ក្នុងការចុះបង្ក្រាបឈើ។ គួរតែហាមឃាត់និងទប់ស្កាត់ ការពារ កុំឲ្យមានការដឹកជញ្ជូនឈើបែបនេះ ព្រោះថា ការដឹកជញ្ជូនឈើតាមម៉ូតូនេះ វានឹងអាចបង្កគ្រោះថ្នាក់ចរាចរណ៍ ដល់បងប្អូនអ្នកធ្វើដំណើរតាមដងផ្លូវ និងបង្កហានិភ័យ ដល់អាយុជីវិតមនុស្ស (ទាំងខ្លួនឯងនិងអ្នកដទៃ) ។
ប្រភពបន្តទៀត បានបង្ហើបថា តែងតែឃើញ ក្រុមសមត្ថកិច្ច ស្លៀកពាក់ស៊ីវិល ចតរថយន្ត នៅចំណុច ផ្លូវកោង ក្នុងក្រុមហ៊ុនចំការកៅស៊ូ អង្គុយ ចាំយកលុយពីក្រុមម៉ូតូ និងរម៉ក និងគោយន្តដឹកឈើ។ ភាគច្រើនគោយន្ត ដឹកឈើព្រៃស្រស់ៗដាក់ឡរធ្យូង ដែលពួកគេចូលទៅ កាប់ក្នុងតំបន់ព្រៃសហគមន៍ និងព្រៃឡង់ និងព្រៃក្បាលចំការ ។ ការបង់លុយរបស់ក្រុមរកស៊ីដឹកឈើទាំងនោះទៅដល់សមត្ថកិច្ច (គឺមុនចូលក្នុងព្រៃ ត្រូវបង់លុយជាមុនសិន)។
ពាក់ព័ន្ធនឹងសេចក្តីរាយការណ៍នេះ អង្គភាពយើងខ្ញុំរង់ចាំការបកស្រាយបំភ្លឺពីសមត្ថកិច្ចពាក់ព័ន្ធ ៕
