(ភ្នំពេញ)៖ នាយឧត្ដមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ នៅថ្ងៃទី០៨ ខែកុម្ភៈ ឆ្នាំ២០២៣នេះ បានចាត់ឲ្យតំណាងនាំយកថវិកា និងគ្រឿងឧបភោគបរិភោគជាច្រើន ទៅឧបត្ថម្ភជូនដល់កងកម្លាំងសមត្ថកិច្ច មានទាំងនគរបាល និងអាវុធហត្ថ ដែលកំពុងប្រចាំការប្រតិបត្ដិការបង្ក្រាបបទល្មើសនេសាទ នៅបឹងទន្លេសាប។
ការនាំយកអំណោយនេះ ដឹកនាំដោយលោកឧត្ដមសេនីយ៍ឯក លន់ សុផាត អគ្គស្នងការរងនគរបាលជាតិ និងមានការចូលរួមផងដែរពីលោក ម៉ាន សុខគ្រី រដ្ឋលេខាធិការក្រសួងកសិកម្ម និងអាជ្ញាធរ មន្ដ្រីក្រោមឱវាទមួយចំនួនទៀតផងដែរ។
នៅចំពោះមុខកងកម្លាំង ទាំងអាវុធហត្ថ និងនគរបាល លោកឧត្ដមសេនីយ៍ឯក លន់ សុផាត បានផ្ដាំផ្ញើការសាកសួរសុខទុក្ខពីនាយឧត្ដមសេនីយ៍សន្ដិបណ្ឌិត នេត សាវឿន និងសូមលើកទឹកចិត្ដ ដល់កងកម្លាំងដែលខិតខំប្រឹងប្រែង ក្នុងការចូលរួម និងកំពុងប្រចាំការបង្ក្រាបបទល្មើសនេសាទ នៅបឹងទន្លេសាប។
លោកឧត្ដមសេនីយ៍ឯក លន់ សុផាត បានណែនាំឲ្យកម្លាំងសមត្ថកិច្ច ត្រូវខិតខំការងារនេះ ចូលរួមទប់ស្កាត់ដើម្បីកុំឲ្យបទល្មើសនេសាទ នៅបឹងទន្លេសាប។
ថវិកា និងគ្រឿងបរិភោគ ចែកជូនដល់កងកម្លាំងសមត្ថកិច្ច ដែលកំពុងប្រតិបត្ដិការ បង្ក្រាបបទល្មើសនេសាទ នៅបឹងទន្លេសាប រួមមាន៖ ម្នាក់ៗ ទទួលបានថវិកា៥ម៉ឺនរៀល សរុបចំនួន៩០នាក់, ត្រីខចំនួន១០កេសធំ, មីចំនួន១០កេសធំ, ត្រីងៀតចំនួន៣០គីឡូក្រាម៕
