(ខេត្តកែប)៖ កាលពីថ្ងៃទី៥ និងទី៦ ខែកុម្ភៈ ឆ្នាំ២០២៣ នៅទីអារាមវត្តសត្ថាធម្មវិហារ (ភ្នំពោន) ស្ថិតក្នុងភូមិភ្នំលាវ ឃុំពងទឹក ស្រុកដំណាក់ចង្អើរ ខេត្តកែប លោកស្រី អ៊ុល ភីរុណ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម បណ្ឌិត សោម ពិសិដ្ឋ អភិបាលនៃគណៈអភិបាលខេត្តកែប បានដឹកនាំ មន្ត្រីរាជការជុំវិញខេត្ត ប្រជាពលរដ្ឋ ពុទ្ធបរិស័ទ យ៉ាងច្រើនកុះករ ប្រកបដោយទឹកចិត្តសទ្ធាជ្រះថ្លា នាំមកជាមួយនូវ ទៀនធូប ផ្កាភ្ញី ទេយ្យទានផ្សេងៗ និងបច្ច័យ ដើម្បីប្រារព្ធពិធីបុណ្យមាឃបូជា ដែលជាបុណ្យប្រពៃណីព្រះពុទ្ធសាសនាដ៏ធំមួយ ក្នុងចំណោមបុណ្យនានា ដែលពុទ្ធបរិស័ទខ្មែរតែងតែគោរពប្រណិបត្តិតាំងពីដើមរៀងមក។
សូមជម្រាបផងដែរថា បុណ្យមាឃបូជា ប្រារព្ធឡើងដើម្បីរំលឹកដល់ថៃ្ង ដែលព្រះសម្មាសម្ពុទ្ធ ទ្រង់ប្រកាស បង្កើតព្រះពុទ្ធសាសនាឡើង ក្នុងលោកនាប្រទេសឥណ្ឌា កាលពី៥៨៨ឆ្នាំ មុនគ្រិស្តសករាជ នាថៃ្ងទី១៥កើត ខែមាឃ ក្រោយពីការត្រាស់ដឹងរបស់ព្រះអង្គចំនួន៩ខែគត់។ ការ បង្កើតព្រះពុទ្ធសាសនា ក្នុងឋានៈជាអង្គការសាសនាមួយនេះ ធ្វើឡើងនៅក្នុងចំណោម ព្រះសង្ឃចំនួន ១.២៥០អង្គ ជាសមាជិកក្នុងអង្គ មហាសន្និបាតមួយ ដែលបាននិមន្ត មកពីគ្រប់ស្រទាប់វណ្ណៈទាំងអស់។ នៅក្នុងមហាសន្និបាតនោះ ព្រះសម្មាសម្ពុទ្ធទ្រង់បាន ប្រកាសនៅគោលការណ៍មួយចំនួន១១ សម្រាប់ឱ្យសមាជិក មហាសន្និបាតទាំងអស់ កាន់យកជាវិថីជីវិត និងសម្រាប់យកទៅផ្សព្វផ្សាយដល់ជនដទៃទៀតឱ្យបានយល់ ពីពុទ្ធសាសនា។
ក្នុងឱកាសនោះដែរ លោកស្រី អ៊ុល ភីរុណ អភិបាលរងខេត្ត ក៏បាននាំយកនូវបច្ច័យ ដែលមន្ត្រីរាជការ ពុទ្ធបរិស័ទជិតឆ្ងាយ ចូលរួមចូលចាប់មគ្គផល ក្នុងពិធីបុណ្យមាឃបូជានេះ បានចំនួន៣,៣៣០,០០០រៀល សម្រាប់តម្កល់កសាងវត្តផងដែរ៕
