ភ្នំពេញ៖ ឧត្តមសេនីយ៍ទោ ច័ន្ទ សុភ័ក្ដ្រា មេបញ្ជាការតំបន់ប្រតិបត្តិការសឹករងព្រះវិហារ នៅថ្ងៃទី១៩ ខែមករា ឆ្នាំ២០២៣ បានដឹកនាំសហការីចុះសួរសុខទុក្ខ សំណេះសំណលដល់សិក្ខាកាមដែលកំពុងហ្វឹកហ្វឺន បំប៉នយុទ្ធវិធីថ្មើរជើង ខ.គ នៅវរសេនាតូចលេខ១ មហាផល។
នាក្នុងឱកាសនោះផងដែរ ឧត្តមសេនីយ៍ទោ ច័ន្ទ សុភ័ក្ដ្រា បានមានប្រសាសន៍ សិក្ខាកាមទាំងអស់ដែរជាកងទ័ពចំណុះកងយោធពលខេមរភូមិន្ទ ត្រូវស្គាល់អំពីតួនាទី និងភារកិច្ចនិងទាមទារការហ្វឹកហ្វឺនដើម្បីពង្រឹងសមត្ថភាព ក្នុងការចូលរួម ការពារបូរណភាពទឹកដី ជាតិ សាសនា ព្រះមហាក្សត្រ និងរាជរដ្ឋាភិបាលដែលប្រសូតចេញពីការបោះឆ្នោត។
សិក្ខាកាមត្រូវយកចិត្តទុកដាក់ ខិតខំ ក្រេបជញ្ជក់មេរៀនដែរគ្រូបង្ហាត់បង្ហាញ ដើម្បីក្លាយជានាយទាហានបន្ដវេននៅថ្ងៃអនាគត និងគោរពប្រតិបត្តិឱ្យបាន នូវច្បាប់រដ្ឋធម្មនុញ្ញ នៃព្រះរាជាណាចក្រកម្ពុជា លក្ខន្តិកៈ បទវិន័យទូទៅ វិន័យផ្ទៃក្នុង នៃកងយោធពលខេមរភូមិន្ទ ៕
