(ភ្នំពេញ)៖ ថ្ងៃអាទិត្យ ១០រោច ខែមិគសិរ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី១៨ ខែធ្នូ ឆ្នាំ២០២២ នាវេលាម៉ោង ១៤និង៣០នាទីរសៀល គណៈកម្មាធិការអនុសាខាកាកបាទក្រហមកម្ពុជា ខណ្ឌប្ញស្សីកែវ បានរៀបចំពិធីចែកអំណោយសង្គ្រោះបន្ទាន់របស់អនុសាខាកាកបាទក្រហមខណ្ឌប្ញស្សីកែវ ជូនដល់ប្រជាពលរដ្ឋរងគ្រោះដោយអគ្គីភ័យចំនួន ៣០គ្រួសារ ដែលជាម្ចាស់ផ្ទះ និងជាអ្នកស្នាក់នៅបន្ទប់ជួល ស្ថិតនៅក្រុមទី១៣ ភូមិផ្សារតូច សង្កាត់ទួលសង្កែទី១ ខណ្ឌប្ញស្សីកែវ រាជធានីភ្នំពេញ ដែលបានរងការឆាបឆេះនៅវេលាទៀបភ្លឺថ្ងៃទី១៨ ខែធ្នូ ឆ្នាំ២០២២។
ពិធីនេះប្រារព្ធឡើងក្រោមអធិបតីភាពលោក ឯក ឃុនដឿន អភិបាល នៃគណ:អភិបាលខណ្ឌប្ញស្សីកែវ និងជាប្រធានកិត្តិយសអនុសាខាកាកបាទក្រហមកម្ពុជា ខណ្ឌប្ញស្សីកែវ និងលោក ស៊ូ សារ៉ាត់ អនុប្រធានគណៈកម្មាធិការអនុសាខាកាកបាទក្រហម ខណ្ឌប្ញស្សីកែវ ព្រមទាំងមានការអញ្ជើញចូលរួមពី លោក លោកស្រី ក្រុមការងារអនុសាខាកាកបាទក្រហមកម្ពុជាខណ្ឌ និងក្រុមការងារ ក.ក្រ.ក សង្កាត់ ជាច្រើនរូបផងដែរ។
អំណោយដែលបានឧបត្ថម្ភដល់បងប្អូនទាំង៣០គ្រួសារ ដោយក្នុងមួយគ្រួសារទទួលបានរួមមាន៖
១•អង្ករ ៣០ គ.ក
២•មី ០៨ កញ្ចប់
៣•ត្រីខ ០៤ កំប៉ុង
៤•ទឹកស៉ីអ៉ីវ ០១ ដប
៥•ទឹកត្រី ០១ ដប
៦•ម៉ាស់ ២៥ បន្ទះ
៧•ជែលលាងដៃ ០១ ដប
៨•តែ ០១ កញ្ចប់ និងថវិកា ចំនួន ៥០.០០០ រៀល។
