(កំពង់ឆ្នាំង)៖ បុណ្យរដូវរំហើយជានិមិត្តរូប នៃរដូវប្រមូលផលស្រូវរបស់កសិករ នៅស្រុកកំពង់លែង ខេត្តកំពង់ឆ្នាំង។ ពិធីបុណ្យនេះបានប្រារព្វឡើង ក្រោមប្រធានបទ «ដាល់អំបុក បង្ហើរខ្លែងជ្រោមជ្រែងប្រពៃណីខ្មែរ»។
បុណ្យរដូវរំហើយ ជាពិធីបុណ្យប្រពៃណី ត្រូវបានរៀបចំឡើងជារៀងរាល់ឆ្នាំ និងឧបត្ថម្ភដោយលោកឧកញ្ញា អ៉ឹង ប៊ុនហូវ និងចូលរួមសហការពីមន្ទីវប្បធម៌ និងវិចិត្រសិល្បៈខេត្តកំពង់ឆ្នាំង។
ពិធីបុណ្យនេះ ត្រូវបានប្រព្រឹត្តទៅក្រោមអធិបតីភាព លោកស្រីកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភានិងអធិការកិច្ច។ ពិធីនេះក៏មានការអញ្ជើញចូលរួមពីលោកបណ្ឌិត សឹង សំណាង គណៈកម្មាធិការកណ្តាលគណបក្សប្រជានកម្ពុជា និងជាប្រធានក្រុមការងារថ្នាក់កណ្តាលចុះជួយមូលដ្ឋាន
ស្រុកកំពង់លែង បានដឹកនាំក្រុមការងារ ចុះជួយមូលដ្ឋានស្រុកកំពង់លែង ព្រមទាំងអភិបាលនៃគណៈអភិបាលខេត្តកំពង់ឆ្នាំង និងមន្ត្រីរាជការអាជ្ញាធរដែនដីគ្រប់លំដាប់ថ្នាក់យ៉ាងច្រើនកុះករក្រោមបរិយាកាសសប្បាយរីករាយ។
នៅក្នុងឱកាសនោះលោកស្រីកិត្តិសង្គហបណ្ឌិត ម៉ែន សំអន បានថ្លែងរំលឹកពីប្រវត្តិនៃពិធីបុណ្យប្រពៃណីជាច្រើន នៅក្នុងស្រុកកំពង់លែង និងមិនភ្លេចរំលឹកពីការចូលរួមយ៉ាងសំខាន់របស់ថ្នាក់ដឹកនាំជាតិ ជាពិសេសប្រធានគណបក្សប្រជាជនកម្ពុជា ដែលបានលះបង់សព្វបែបយ៉ាង ដើម្បីស្វែងរកសន្តិភាពជូប្រជាពលរដ្ឋខ្មែរ បានធ្វើបុណ្យទានជួបជុំសប្បាយរីករាយ។
សូមបញ្ជាក់ថា ពិធីបុណ្យរដូវរំហើយ បានរៀបចំកម្មវិធីលេងល្បែងប្រជាប្រីយជាច្រើន
មានដូចជាដាល់អំបុកប្រណាំងគ្នា ការបង្ហោះខ្លែង ពិធីរាំសែនព្រេនតាមទំនៀមទម្លាប់សហគមន៍ជាដើម។
ក្នុងឱកាសនោះលោកស្រីកិត្តិសង្គហបណ្ឌិត ម៉ែន សំអន លោកបណ្ឌិត សឹង សំណាង បានចូលរួមដាល់អំបុកជានិមិត្តរូបក្នុងការ បើកពិធីដាល់អំបុកយ៉ាងសប្បាយរីករាយ។
ពិធីបុណ្យរដូវរំហើយនេះ នឹងបន្តរហូតដល់ថ្ងៃទី១៨ ខែធ្នូ ជាមួយការប្រគុំតន្ត្រីរាំកម្សាន្តក្នុងវេលាយប់ផងដែរ។
នៅក្នុងឱកាសនោះ លោកបណ្ឌិត សឹង សំណាង បាននាំយកអង្ករចំនួនមួយតោន និងបច្ច័យចំនួន៦០ម៉ឺនរៀល ប្រគេនចំពោះព្រះសង្ឃគង់នៅវត្តវាលុកថុល្លារាម ហៅវត្តទួលខ្សាច់ ស្ថិតក្នុងខេត្តកំពង់ឆ្នាំង។
លោកបណ្ឌិត សឹង សំណាង និង លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានឧបត្ថម្ភក្រុមអ្នកដាល់អំបុក៨ក្រុម ក្នុងមួយក្រុមទទួលបាន ១០០ដុល្លារ និងពិធីករពិធីការិនីចំនួន ១០០ដុល្លារផងដែរ៕
