(ភ្នំពេញ)៖ តាមរយៈជំនួបពិភាក្សាការងារជាមួយគណៈប្រតិភូជាន់ខ្ពស់ទីក្រុងហូជីមិញ នឹងរួមចំណែកពូនជ្រុំ និងលើកកម្ពស់ទំនាក់ទំនងដ៏ល្អរវាងគណបក្ស និងប្រជាជន នៃទីក្រុងទាំងពីរកាន់តែរឹងមាំ ស៊ីជម្រៅ និងក្លាយជាវឌ្ឍនភាពថ្មី ដើម្បីឈានទៅរកការ អភិវឌ្ឍលើគ្រប់វិស័យ។ នេះជាការលើកឡើងរបស់លោក ឃួង ស្រេង អភិបាលរាជធានីភ្នំពេញ, សមាជិកគណៈកម្មាធិការកណ្តាលគណបក្សប្រជាជាជនកម្ពុជា និងជាប្រធានគណៈកម្មាធិការគណបក្សប្រជាជាជនកម្ពុជារាជធានីភ្នំពេញ ក្នុងជំនួបពិភាក្សាការងារជាមួយ លោក ង្វៀន វ៉ាន់ នេន (Nguyen Van Nen) សមាជិកការិយាល័យនយោបាយ នៃគណៈកម្មាធិការមជ្ឈិមបក្សកុម្មុយនិស្តវៀតណាម និងជាលេខាគណៈកម្មាធិការបក្សទីក្រុងហូជីមិញ នាព្រឹកថ្ងៃទី១៧ ខែធ្នូ ឆ្នាំ២០២២។
លោក ឃួង ស្រេង បានថ្លែងថា ដំណើរទស្សនកិច្ចរបស់គណៈប្រតិភូនៅពេលនេះ ជាការរួមចំណែកនៃការពង្រឹង និងពង្រីកទំនាក់ទំនងដ៏ស្អិតរមួត និងកិច្ចសហប្រតិបត្តិការដ៏ជិតស្និទ្ធ រវាងគណបក្ស រដ្ឋាភិបាល និងប្រជាជននៃប្រទេសទាំងពីរក្នុងនាមជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ ស្ថិតស្ថេរ រឹងមាំយូរអង្វែង។
លោកបន្តថា «តាមរយៈជំនួបពិភាក្សាការងារក្នុងពេលនេះ នឹងរួមចំណែកពូនជ្រុំ និងលើកកម្ពស់ទំនាក់ទំនងដ៏ល្អ រវាងគណបក្ស និងប្រជាជននៃទីក្រុងយើងទាំងពីរភ្នំពេញ-ហូជីមិញ ចំពេលខូបលើកទី៥៥ នៃការបង្កើតទំនាក់ទំនង ការទូត កម្ពុជា-វៀតណាម និងជាឆ្នាំមិត្តភាពលើកទី១៨ នៃការចងសម្ព័ន្ធមេត្រីភាព រវាងរដ្ឋបាលនៃទីក្រុងទាំងពីរភ្នំពេញ-ហូជីមិញ ឱ្យកាន់តែរឹងមាំ ស៊ីជម្រៅ និងក្លាយជាវឌ្ឍនភាពថ្មី ដើម្បីឈានទៅរកការ អភិវឌ្ឍលើគ្រប់វិស័យ»។
លោកបញ្ជាក់ថា ឈរលើមូលដា្ឋននសុខសន្តិភាព និងស្ថិរភាពនយោបាយ ក្រោមការដឹកនាំរបស់គណបក្សប្រជាជនកម្ពុជា និងរាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខដ៏ឈ្លាសវៃ, កម្ពុជាបានបន្តខិតខំ ពុះពារជម្នះការលំបាកទាំងអស់នេះ ធ្វើឱ្យដំណើរការសេដ្ឋកិច្ច និងសង្គម មានភាពល្អប្រសើរជាបន្តបន្ទាប់ ហើយខិតខំសម្រេច ឱ្យបាននូវគោលដៅអភិវឌ្ឍន៍ ដើម្បីក្លាយជាប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ និងក្លាយជាប្រទេសមានចំណូលខ្ពស់នៅឆ្នាំ២០៥០។
លោកបន្តថា ក្នុងអំឡុងខែវិច្ឆិកា និងដើមខែធ្នូ ឆ្នាំ២០២២កន្លងទៅ ភ្នំពេញបានរៀបចំកម្មវិធី ក្នុងនាមជាម្ចាស់ផ្ទះកិច្ចប្រជុំកំពូលអាស៊ានលើកទី៤០ និង៤១ និងកិច្ចប្រជុំកំពូលពាក់ព័ន្ធនានា ដែលមានថ្នាក់ដឹកនាំកំពូលតំណាង ប្រទេសចំនួន២៥ បានចូលរួម។ ភ្នំពេញក៏បានរៀបចំធ្វើជាម្ចាស់ផ្ទះមហាសន្និបាត អន្តរសភាអាស៊ាន លើកទី៤៣ (AIPA-43), វេទិកាអភិបាលក្រុងអាស៊ាន និងកិច្ចប្រជុំអភិបាលរាជធានី/រដ្ឋធានី អាស៊ាន និងការរៀបចំប្រកួត កីឡាជាតិលើកទី៣ និងកីឡាជនពិការលើកទី១ ដែលកិច្ចប្រជុំសំខាន់ៗទាំងនេះ បានប្រព្រឹត្តទៅដោយរលូន និងទទួលបាន ការរក្សាការពារសន្តិសុខ សណ្តាប់ធ្នាប់ល្អប្រសើរ តាមការគ្រោងទុក។
លោក ង្វៀន វ៉ាន់ នេន ក្នុងឱកាសនោះ បានសាទរចំពោះសមិទ្ធផលជាច្រើនដែលកម្ពុជាដែលសម្រេចបាននៅពេលនេះ។ លោកបានមានប្រសាសន៍ថា «សមិទ្ធផលទាំងនេះ គឺពិតជាបានមកពីការដឹកនាំដ៏ល្អ និងឈ្លាសវៃរបស់មេដឹកនាំកំពូលៗរបស់កម្ពុជា ដោយបានធ្វើឲ្យប្រទេសកម្ពុជា មានការអភិវឌ្ឍរីកចំរើននិងធ្វើអោយជីវភាពប្រជាពលរដ្ឋកម្ពុជាធូរធា»។
លោកបន្តថា «យើងនឹងពង្រឹងនិងពង្រីក សាមគ្គីភាព សហប្រតិបត្តិការរវាងទីក្រុងហូជីមីង-រាជធានីភ្នំពេញ កាន់តែយូរអង្វែង ពិសេសកិច្ចសហប្រតិបត្តិការគ្នាលើវិស័យសេដ្ឋកិច្ច ទេសចរណ៍ ដើម្បីឈានទៅរកការ អភិវឌ្ឍរីកចំរើនខ្លាំងក្លាថែមទៀត។ យើងចង់អោយទីក្រុងទាំង២ ទីក្រុងហូជីមីង-ភ្នំពេញជំរុញ និងគាំទ្រពាណិជ្ជករអោយគ្នាទៅវិញទៅមក ជំរុញវិស័យទេសចរណ៍និងការបង្កើតទស្សនកិច្ចនៃទីក្រុងទាំង២»។
លោក ង្វៀន វ៉ាន់ នេន បានបញ្ជាក់ថា មន្ទីរពេទ្យជោរៃ ទទួលបានការជឿទុកចិត្តពីប្រជាពលរដ្ឋកម្ពុជាក្នុងការព្យាបាលជំងឺ ដូច្នេះទីក្រុងទាំង២ នឹងបន្តខិតខំបន្ថែមទៀតដើម្បីបន្តជំហានទី២ ដោយយើងត្រូវបណ្តុះបណ្តាលធនធាន មនុស្សបន្ថែម ដើម្បីបំរើការងារនៅក្នុងពេទ្យនេះ៕
