(ត្បូងឃ្មុំ) ៖ ប្រភពថ្មីៗពីប្រជាពលរដ្ឋ និងក្រុមអ្នកញៀនល្បែងបានបង្ហើបឲ្យដឹងថា:នៅភូមិដា ឃុំដា ស្រុកមេមត់ ខេត្តត្បូងឃ្មុំ មាន ឈ្មោះ លឹម និងឈ្មោះ វ៉ា មេល្បែងស៊ីសងប្រចាំកាស៊ីណូគ្មានស្លាកយីហោ នៅច្រកដា ហៅច្រកដូង៧ដើម បើកដៃឲ្យពលរដ្ឋខ្មែរចូលលេងល្បែងបញ្ជល់មាន់ អាប៉ោង បៀ យូគី និងល្បែងផ្សេងៗទៀតយ៉ាងពេញទំហឹង។
ប្រភពបានឲ្យដឹងទៀតថារយៈពេល១ខែចុងក្រោយនេះ មានពលរដ្ឋខ្មែរមកពីគ្រប់ទិសទីសម្រុកចូលលេងល្បែងក្នុងកាស៊ីណូ របស់ឈ្មោះ លឹម និងឈ្មោះ វ៉ា កាន់តែច្រើនឡើងៗ ព្រោះមន្ត្រីអាជ្ញាធរ និងសមត្ថកិច្ចថ្នាក់ឃុំ ថ្នាក់ស្រុក មិនហ៊ានទៅក្បែរកាស៊ីណូនោះទេ។ រីឯលោក ម៉ុន មាគា ស្នងការនគរបាលខេត្តត្បូងឃ្មុំ និងលោក ជាម ច័ន្ទសោភ័ណ អភិបាលខេត្តត្បូងឃ្មុំ បណ្ដោយឲ្យឈ្មោះ លឹម និងឈ្មោះ វ៉ា ប្រព្រឹត្តបំពានច្បាប់តាមអំពើចិត្ត។
ប្រភពពីប្រជាពលរដ្ឋបានឲ្យដឹងទៀតថា មេល្បែងស៊ីសងឈ្មោះ លឹម និងឈ្មោះ វ៉ា មេល្បែងស៊ីសងប្រចាំកាស៊ីណូគ្មានស្លាកយីហោ (ពីមុនយីហោ៦៩) មានខ្នងបង្អែករឹងមាំទើបហ៊ានបើកឲ្យពលរដ្ឋខ្មែរចូលលេងល្បែងយ៉ាងពពាក់ពពូន។ ប្រភពខ្លះបានបង្ហើបឲ្យដឹងថា មានមន្ត្រីធំៗមួយចំនួនក្នុងខេត្តត្បូងឃ្មុំ ទទួលបានផលប្រយោជន៍ពីមេល្បែងស៊ីសងឈ្មោះ លឹម និងឈ្មោះ វ៉ា ទើបបុគ្គលទាំង២នាក់នេះហ៊ានប្រព្រឹត្តបំពានច្បាប់យ៉ាងកំរោល។ ប្រសិនបើគ្មានការឃុបឃិតជាប្រព័ន្ធទេនោះ គឺឈ្មោះ លឹម និងឈ្មោះ វ៉ា មិនហ៊ានបើកឲ្យពលរដ្ឋខ្មែរចូលលេងល្បែងក្នុងកាស៊ីណូរបស់ខ្លួនយ៉ាងគគ្រឹកគគ្រេងឡើយ។
ប្រជាពលរដ្ឋក្នុងឃុំដា ស្រុកមេមត់ ខេត្តត្បូងឃ្មុំ បានអំពាវនាវឲ្យថ្នាក់ដឹកនាំក្រសួងមហាផ្ទៃ និងនាយឧត្ដមសេនីយ៍ នេត សាវឿន អគ្គស្នងការនគរបាលជាតិ ចាត់វិធានការទប់ស្កាត់ភាពមិនប្រក្រតីដែលកើតមាននៅក្នុងកាស៊ីណូច្រកដូង៧ដើម ជាបន្ទាន់។
ដោយហេតុថានៅពេលដែលល្បែងស៊ីសងកើតឡើងយ៉ាងរាលដាល គឺនៅក្នុងទឹកដីឃុំដា ស្រុកមេមត់ ខេត្តត្បូងឃ្មុំ កើតមានអំពើចោរកម្ម និងបទល្មើសផ្សេងៗគួរឲ្យភ័យខ្លាច។ ប៉ុន្តែលោក ម៉ុន មាគា ស្នងការនគរបាលខេត្តត្បូងឃ្មុំ និងលោក ជាម ច័ន្ទសោភ័ណ អភិបាលខេត្តត្បូងឃ្មុំ បែរជាបណ្ដោយឲ្យមេល្បែងស៊ីសងឈ្មោះ លឹម និងឈ្មោះ វ៉ា ធ្វើអ្វីៗស្រេចតែអំពើចិត្តមិនមានវិធានការទប់ស្កាត់សោះ៕ដោយ៖សហការី
