ខេត្តបន្ទាយមានជ័យ ÷ លោកវរសេនីយ៍ឯក សៅ សារឿន អធិការក្រុងប៉ោយប៉ែត
មានប្រសាសន៍ប្រាប់អ្នកសារព័ត៌មាន នារសៀលថ្ងៃទី ២២ ខែវិច្ឆិកា ឆ្នាំ២០២២នេះ ថា លោក បានចាត់មន្ត្រីក្រោមឱវាទ ចុះអប់រំណែនាំ ម្ចាស់កាស៊ីណូទាំងអស់ដែលមានទីតាំងឋិតនៅក្នុងភូមិសាស្ត្រ ក្រុងប៉ោយប៉ែត ដែលបានទទួលសិទ្ធិស្របច្បាប់ពីក្រសួងពាក់ព័ន្ធ បើកដំណើរការល្បែងស៊ីសង និង ហាមដាច់ខាត មិនអោយមានពលរដ្ឋ ខ្មែរ ចូលទៅលេង នោះទេ ព្រោះនេះគឺជាសកម្មភាព ល្មើសនិងច្បាប់។
លោកអធិការបន្តថា ថ្មីៗនេះ មានសារព័ត៌មាន មួយ បានធ្វើការផ្សព្វផ្សាយមានចំណងជើង និង ខ្លឹមថា : លោកគាត ហ៊ុល និងលោកសៅ សារឿន កំពុងតែនាំគ្នាផ្គើន និងបទបញ្ជារបស់សម្តេចតេជោហ៊ុនសែន ទាក់ទងនិងករណីកាស៊ីណូ យីហោ ហ្គូដវើលដ៍ ហៅកាស៊ីណូស្រះទឹក បើកលេងល្បែងស៊ីសងគ្រប់ប្រភេទ អោយខ្មែរចូលលេងយ៉ាងអនាធិបតេយ្យ សង្ស័យជាឆ្នាំងបាយរបស់សម្ថកិច្ច និងអាជ្ញាធរ។ ក្នុងនោះសារព័ត៌មាន បានចុះផ្សាយទៀតថា នៅក្នុងកាស៊ីណូ ហ្គូដ វើលដ៍ គឺមានបង្កប់នូវល្បែងជល់មាន់ផងដែរ ។
លោកវរសេនីយ៍ឯក សៅ សារឿន បានបញ្ជាក់ថា បន្ទាប់ពី បានទទួលព័ត៌មាននេះហើយ លោកបានចាត់មន្ត្រីជំនាញ ចុះស្រាវជ្រាវ និងស៊ើបអង្កេត យ៉ាងយកចិត្តទុក ជាលទ្ធផល រកឃើញថា ក្នុងកាស៊ីណូមួយនេះ ពុំមានល្បែងជល់មាន់ដូចការចុះផ្សាយនោះទេ រីឯរូបភាព គឺជារូបភាពចាស់ យកមកពីកន្លែងផ្សេង មិនមែនឋិតក្នុងទីតាំងកាស៊ីណូ ហ្គូដវើលដ៏ ឡើយ ។ លោកបន្តថា ចំពោះ កាស៊ីណូនេះ គឺគេមានច្បាប់អនុញាតត្រឹមត្រូវ ។ ដោយឡែក លោកក៏បានអោយម្ចាស់ទីតាំងធ្វើកិច្ចសន្យាផងដែរ គឺហាមមិនអោយពលរដ្ឋខ្មែរចូលលេងឡើយ បើម្ចាស់កាសុីណូ ហ្គូដ វើលដ៏ ឬ ទីតាំង ផ្សេងទៀត ហ៊ានបំពាននិងការបំរាមនេះ គឺ លោកនិងចាត់ការតាមនីតិវិធីច្បាប់ ៕
