(ភ្នំពេញ)៖ លោក ហ្វូមីអូ គីស៊ីដា នាយករដ្ឋមន្ត្រីជប៉ុន នៅថ្ងៃទី១២ ខែវិច្ឆិកា ឆ្នាំ២០២២ បានថ្លែងប្តេជ្ញាចិត្តធ្វើការជិតស្និទ្ធជាមួយមេដឹកនាំអាស៊ាន ដើម្បីធានាបានសន្តិភាព និងភាពរុងរឿងនៅក្នុងតំបន់។
លោកនាយករដ្ឋមន្ត្រីជប៉ុនថ្លែងបែបនេះ ពេលអញ្ជើញជាសហប្រធាន ជាមួយសម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានអាស៊ានប្តូរវេន បើកកិច្ចប្រជុំអាស៊ាន-ជប៉ុន លើកទី២៥ (25th ASEAN – Japan Summit) រៀបចំដោយកម្ពុជា នៅសណ្ឋាគារសុខាភ្នំពេញ។
លោកនាយករដ្ឋមន្ត្រីជប៉ុនបានបញ្ជាក់យ៉ាងដូច្នេះ «ខ្ញុំសូមប្រកាសពីទស្សនវិស័យ [គីស៊ីដា] ដែរថា គឺសម្រាប់សន្តិភាព។ ខ្ញុំសូមប្តេជ្ញាធ្វើការយ៉ាងជិតស្និទ្ធជាមួយមេដឹកនាំអាស៊ាន ដើម្បីពិភាក្សាឱ្យស៉ីជម្រៅពីវិធីសាស្ត្រ និងធានាបាននូវសន្តិភាព ក៏ដូចជាភាពរុងរឿងនៅក្នុងតំបន់ផងដែរ»។
លោកបន្តថា ដើម្បីរក្សា និងពង្រឹងសណ្តាប់ធ្នាប់អន្តរជាតិដោយសេរី និងបើកចំហប្រទេសជប៉ុន បានគាំទ្រដល់ការរួបរួម និងមជ្ឈភាពអាស៊ាន។ បើតាមលោក គីស៊ីដា ជប៉ុនក៏បានសម្តែងការគាំទ្រចំពោះ ទស្សនវិស័យអាស៊ានស្តីពីឥណ្ឌូ-ប៉ាស៉ីហ្វិក (AOIP) ផងដែរ។
សូមបញ្ជាក់ថា អាស៊ាន និងជប៉ុន បានបង្កើតទំនាក់ទំនងសន្ទនាក្រៅផ្លូវការលើកដំបូងនៅក្នុងឆ្នាំ១៩៧៣ ក្រោយមកត្រូវបានបង្កើតឱ្យក្លាយជាផ្លូវការ នៅខេមីនា ឆ្នាំ១៩៧៧ ដោយមានការកោះប្រជុំជាវេទិកាអាស៊ាន-ជប៉ុន។
តាំងពីនោះមក មានការរីកចម្រើនគួរឲ្យកត់សម្គាល់ លើកគ្រប់វិស័យ មានទាំងសន្តិសុខ នយោបាយ កិច្ចសហប្រតិបត្តិការសេដ្ឋកិច្ច-ហិរញ្ញវត្ថុ និងសង្គម-វប្បធម៌។
ប្រទេសជប៉ុន បានចូលជាសមាជិកលើសន្ធិសញ្ញាមិត្តភាព និងកិច្ចសហប្រតិបត្តិការនៅអាស៉ីអាគ្នេយ៍ (TAC) នៅខែកក្កដា ឆ្នាំ២០០៤ ហើយក៏បានក្លាយជាដៃគូសន្ទនា ដែលតែងតាំងអគ្គរដ្ឋទូតប្រចាំអាស៊ានរបស់ខ្លួន នៅលេខាធិការដ្ឋានអាស៊ាន ឯទីក្រុងហ្សារកាតា។ បេសកកម្មជប៉ុនប្រចាំអាស៊ាន ត្រូវបានបង្កើតឡើងនៅថ្ងៃទី២៦ ខែឧសភា ឆ្នាំ២០១១។
បើយោងតាមទិន្នន័យអាស៊ាន សម្រាប់ឆ្នាំ២០២១ បានឲ្យដឹងថា ពាណិជ្ជកម្មទ្វេភាគីរវាងអាស៊ាន និងជប៉ុន បានឈានដល់ ២៤០,២ពាន់លានដុល្លារអាមេរិក កើនឡើង ១៧,២ភាគរយ ពីមួយឆ្នាំទៅមួយឆ្នាំ។ លំហូរវិនិយោគផ្ទាល់ពីបរទេស (FDI) ពីប្រទេសជប៉ុន ក្នុងឆ្នាំ២០២១ មានចំនួន ១២.០ពាន់លានដុល្លារអាមេរិក ឬកើនឡើង ៣.៥ភាគរយពីមួយឆ្នាំទៅមួយឆ្នាំ ដែលនេះធ្វើឲ្យប្រទេសជប៉ុនជាដៃគូពាណិជ្ជកម្មលំដាប់ទី៣ របស់អាស៊ាន ក្នុងចំណោមដៃគូសន្ទនារបស់អាស៊ាន ក្នុងឆ្នាំ២០២១ដូចគ្នា៕
