(ភ្នំពេញ)៖ លោក អ៊ុក បូនីន អធិការនគរបាលខណ្ឌមានជ័យ បានបញ្ជាក់ប្រាប់បណ្តាញព័ត៌មាន នៅយប់ថ្ងៃទី០៧ ខែវិច្ឆិកា ឆ្នាំ២០២២នេះថា កម្លាំងនគរបាលក្នុងខណ្ឌ បានប្រជុំជួរកងកម្លាំងនៅអង្គភាព ដើម្បីត្រៀមអន្តរាគមន៍ និងទទួលបទបញ្ជា២៤ម៉ោង លើ២៤ម៉ោង ដើម្បីការពារសន្តិសុខ សុវត្ថិភាព ដល់ប្រមុខរដ្ឋ ប្រមុខរដ្ឋាភិបាលដែលអញ្ជើញចូលរួមកិច្ចប្រជុំកំពូលអាស៊ានលើកទី៤០ និង៤១ ព្រមទាំងកិច្ចប្រជុំកំពូលពាក់ពន្ធ័មួយចំនួនទៀតនៅកម្ពុជា។
ក្នុងឱកាសនេះ លោកអធិការខណ្ឌ ក៏បានណែនាំបន្ថែមដល់កម្លាំងក្រោមឱវាទ ត្រូវតែបង្កើនសកម្មភាព ពង្រឹងសន្តិសុខ សណ្តាប់ធ្នាប់ របៀបរៀបរយសាធារណៈឱ្យបានល្អសម្រាប់កម្ពុជា ខណៈកម្ពុជា ធ្វើជាម្ចាស់ផ្ទះនៃកិច្ចប្រជុំអាស៊ានលោកទី៤០ និងលើកទី៤១ ព្រមទាំងកិច្ចប្រជុំពាក់ព័ន្ធនាពេលដ៏ខ្លីខាងមុខនេះឱ្យបានជោគជ័យជាដាច់ខាត ដូចដែលកម្ពុជា ធ្លាប់បានទទួលជោគជ័យរួចមកហើយ កាលពីកម្ពុជាធ្វើជាប្រធានអាស៊ាន កាលពីឆ្នាំ២០១២ រួចមកហើយ។
គួរជម្រាបថា ស្របពេលដែលប្រទេសកម្ពុជា ត្រៀមធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ានលើកទី៤០ និង៤១ ព្រមទាំងកិច្ចប្រជុំកំពូលពាក់ព័ន្ធមួយចំនួនទៀត កងកម្លាំងមានសមត្ថកិច្ចគ្រប់ជាន់ថ្នាក់ ត្រូវបានដាក់ពង្រាយនៅតាមគោលដៅសំខាន់ៗ ដែលគណៈប្រតិភូស្នាក់នៅ ដើម្បីចូលរួមកិច្ចប្រជុំ។
សូមបញ្ជាក់ថា កិច្ចប្រជុំកំពូលអាស៊ាន ដែលកម្ពុជាធ្វើជាម្ចាស់ផ្ទះ និងជាប្រធានប្តូរវេនឆ្នាំ២០២២នេះ នឹងចាប់ដំណើរការពីថ្ងៃទី១០ ដល់ទី១៣ ខែវិច្ឆិកា ឆ្នាំ២០២២ មានប្រមុខរដ្ឋ ប្រមុខរដ្ឋាភិបាលចំនួន២៨ ប្រទេស រួមទាំងអង្គការក្រៅរដ្ឋាភិបាលមួយចំនួនទៀតចូលរួមព្រមទាំងដៃគូសន្ទនាជាច្រើនទៀត៕
