ខេត្តបន្ទាយមានជ័យ៖ នៅរសៀលថ្ងៃសុក្រ ១១កើត ខែកត្តិក ឆ្នាំខាល ចត្វាស័ក ព.ស២៥៦៦ ត្រូវនឹងថ្ងៃទី០៤ ខែវិច្ឆិកា ឆ្នាំ២០២២នេះ លោកឧត្តមសេនីយ៍ទោ សិទ្ធិ ឡោះ បានអញ្ជើញចូលរួម ពិធីបើកការប្រណាំងទូកង នៅមាត់ស្ទឹងទឹកថ្លា បរិវេណឬទីធ្លាសាកលវិទ្យាល័យជាតិមានជ័យ ក្រុងសិរីសោភ័ណ ខេត្តបន្ទាយមានជ័យ។
ពិធីនេះប្រារព្ធធ្វើឡើងក្រោមវត្តមានឯកឧត្តម ខេង ស៊ុម ប្រធានក្រុមប្រឹក្សាខេត្ត ឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងលោកជំទាវ ព្រមទាំងអស់លោកលោកស្រី ជាប្រធានមន្ទីរអង្គភាពជុំវិញខេត្ត ជាច្រើននាក់។
លោក ឈូ ប៊ុនរឿង ប្រធានមន្ទីរអប់រំ យុវជននិងកីឡាខេត្តបន្ទាយមានជ័យ អោយដឹងថា ពិធីនេះមានទូកចម្រុះចំនួន២៦គ្រឿង ដែលត្រូវចូលរួមប្រកួត ក្នុងនោះមានទូកវែង មធ្យមនិងតូច ។ គឺទូកធំវែងចំនួន៣ទូកដែលមានចំណុះ៦៩-៧៥នាក់ ,ទូកមធ្យម២ទូក ចំណុះ៤៥-៤៧នាក់ ។ ទូកមធ្យម ចំណុះ២២នាក់ ចំនួន១៤ទូក ទូកតូចចំណុះ៥នាក់ ចំនួន៥ទូក និងចំណុះ៣នាក់ ចំនួន២ទូក ។ ចំពោះបច្ចេកទេសនៃការប្រកួតទូកនេះ ក្នុងលក្ខណ:វិលជុំនិងចែកជាពូល ។
ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានថ្លែងថា ក្រៅពីពិធីប្រណាំងទូក រដ្ឋបាលខេត្តក៏បានរៀបចំស្តង់ពិព័រណ៍ទូទៅ ភូមិ១ ផលិតផល១ នៅសួនមានជ័យ។ ឯកឧត្តមក៏បានអំពាវនាវដល់កីឡាករទាំងអស់ ត្រូវប្រកាន់ខ្ជាប់ក្រមសីលធម៌ ប្រកួតចាញ់ឈ្នះចាត់ទុកជារឿងធម្មតា ត្រូវតាំងចិត្តជាអ្នកកីឡា។ សូមចូលរួមគោរពច្បាប់ចរាចរណ៍និងបន្តអនុវត្តន៍វិធានការសុខាភិបាល៣កុំ៣ការពារ ដើម្បីគេចផុតពីការឆ្លងជម្ងឺកូវីដ១៩និងជម្ងឺផ្សេងៗ។
លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានដាក់ពង្រាយ កម្លាំងនគរបាលជាច្រើននាក់ ចុះសម្រួលចរាចរណ៍ រៀបចំសណ្តាប់ធ្នាប់ ទាំងនៅលើទឹក និងលើគោកនៃទីតាំងប្រារពពិធី ដើម្បីយាមល្បាត ការពារសន្តិសុខ សុវត្ថិភាព ក្រុមកីឡាករប្រណាំងទូកក្នុងទឹក និងថ្នាក់ដឹកនាំ មន្ត្រីរាជការ ភ្ញៀវជាតិ អន្តរជាតិ ប្រជាពលរដ្ឋជិតឆ្ងាយ ដែលអញ្ជើញមកទស្សនាពិធីប្រណាំងទូកនេះផងដែរ៕
