ត្បូងឃ្មុំ ÷ សម្លេងស្រែកហ៊ោកញ្ជ្រៀវពេញក្នុងកាស៊ីណូចក្រវាលជាយដែន ដោយមានអ្នកចូលរួមលេងល្បែង បញ្ជល់មាន់ ពពាក់ពពូន នៅចំណុចចម្ការកៅស៊ូ ក្នុងភូមិអន្លង់ជ្រៃ ឃុំកក់ ស្រុកពញាក្រែក ដោយសេរី ដែលបង្កអោយមានមន្ទិលសង្ស័យថា បុគ្គលដែលហ៊ានបើកល្បែងនោះ ប្រហែលជាមានខ្នងបង្អែករឹងមាំចាំជួយបិទបាំងនៅពីក្រោយ ទើបធ្វើអ្វីៗតាមអំពើចិត្ត។
បន្ទាប់ពីពេលកន្លងមកថ្មីៗនេះ សម្តេចតេជោ ហ៊ុន សែន ប្រមុខដឹកនាំរាជរដ្ឋាភិបាល បានប្រកាសឱ្យសមត្ថកិច្ចចុះបង្ក្រាប និងបិទល្បែងស៊ីសងគ្រប់ប្រភេទនៅទូទាំងប្រទេសឲ្យអស់ ។ គេសង្កេតឃើញថា អាជ្ញាគ្រប់ជាន់ថ្នាក់បានដុតដៃដុតជើងយកចិត្តទុកដាក់យ៉ាងហ្មត់ចត់ ក្នុងការបង្ក្រាបល្បែងស៊ីសងគ្រប់ប្រភេទ ។
ដោយឡែក មួយរយៈចុងក្រោយនេះ ម្ចាស់កាស៊ីណូចក្រវាលជាយដែន នេះ បែរជា លបចាប់ផ្ដើមដំណើរការវិញ ហើយសម្រុកឲ្យពលរដ្ឋខ្មែរ ចូលលេងល្បែង បញ្ជាល់មាន់ បៀរ អាប៉ោង យ៉ាងគគ្រឹកគគ្រេង ដែលករណីនេះ គេសង្ស័យថា ម្ចាស់កាស៊ីណូបើកផ្គើន មិនខ្វល់ពីអនុសាសន៍សម្តេចតេជោ ហ៊ុន សែន ផង និងអាចថាមានភ្លើងខៀវពីអាជ្ញាធរផង។
ក្រុមប្រជាពលរដ្ឋលើកឡើងថា លោក ម៉ុន មាគ៌ា ស្នងការដ្ឋាននគរបាលខេត្តត្បូងឃ្មុំ មិនគួរបណ្តែតបណ្តោយតទៅទៀតនោះទេ ព្រោះល្បែងភ្នាល់ស៊ីសងខុសច្បាប់ ក្នុងភូមិអន្លង់ជ្រៃ ឃុំកក់ ស្រុកពញ្ញាក្រែក ខេត្តត្បូងឃ្មុំ បើកដំណើរទៅបានបែបនេះ គេអាចសង្ស័យថា មានភ្លើងខៀវពីសមត្ថកិច្ចមូលដ្ឋាន ។
លើសពីនេះទៀត ប្រជាពលរដ្ឋក៏សូមអំពាវនាវឲ្យ លោក ជាម ចន្ទសោភ័ណ្ឌ អភិបាលខេត្តត្បូងឃ្មុំ លោក និង លោក ម៉ុន មាគ៌ា ស្នងការដ្ឋាននគរបាលខេត្តត្បូងឃ្មុំ សូមចាត់វិធានការបង្ក្រាបល្បែងភ្នាល់ដាក់លុយស៊ីសងខុសច្បាប់ នៅចំណុចចំការកៅស៊ូក្នុងភូមិអន្លង់ជ្រៃ ឃុំកក់ ស្រុកពញ្ញាក្រែក ខេត្តត្បូងឃ្មុំ ជាបន្ទាន់ផង ។ ជៀសវាង កើតអំពើហឹង្សាក្នុងគ្រួសារ ចោរកម្មផ្សេងៗ ដូចជា ចោរលួច ឆក់ប្លន់ និងគ្រឿងញៀន រីករាលដាល ។
មហាជន នៅក្នុងភូមិអន្លង់ជ្រៃ ឃុំកក់ស្រុកពញាក្រែក ត្បូងឃ្មុំ សូមស្នើរដល់ថ្នាក់ដឹកនាំ ក្រសួងមហាផ្ទៃ និង នាយ ឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរនគរបាលជាតិមេត្តាជួយទប់ស្កាត់ និងបង្ក្រាបកាស៊ីណូវាលជាយដែន នៅចំណុចខាងលើនេះផង ព្រោះថា កំពុងតែបើកកឲ្យខ្មែរចូលលេងយ៉ាងអនាធិបតេយ្យសម្បើមណាស់ ៕
