(ស្វាយរៀង)៖ លោកស្រី ម៉ែន សំអន អនុប្រធានគណបក្សប្រជាជនកម្ពុជា បានអញ្ជើញជាអធិបតីក្នុងពិធីបើកព្រឹត្តិការណ៍អុំទូកប្រពៃណីខ្នាតអន្តរជាតិ នៅទន្លេវ៉ៃគោ ខេត្តស្វាយរៀង នារសៀលថ្ងៃទី២៩ ខែតុលា ឆ្នាំ២០២២។
តាមកម្មវិធីពិធីប្រណាំទូកនេះមានរយៈពេល២ថ្ងៃ គឺចាប់ពីថ្ងៃទី២៩-៣០ ខែតុលា ឆ្នាំ២០២២ ដោយចំណុះទូកចូលរួមប្រកួតទាំងអស់សរុប៥០ទូក ក្នុងនោះទូកអន្តរជាតិមាន៤៤ទូក និងទូកក្តាបីសន្លឹកមាន៦ទូក ក្នុងនោះមាននារី១ទូក ដើម្បីចូលរួមអបអរសាទរក្នុងឱកាសនៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នាពេលខាងមុខ។
លោក ម៉ែន វិបុល អភិបាលខេត្តស្វាយរៀង បានថ្លែងថា ពិធីអុំទូកនេះអាចដំណើរទៅបានដោយសារតែប្រទេសជាតិមានសុខសន្តិភាពបរិបូរណ៍ មានការអភិវឌ្ឍលើគ្រប់វិស័យ ក្រោមការដឹកនាំប្រកបដោយកិត្តិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងមានចូលរួមយ៉ាងច្រើនកុះករពីសំណាក់ប្រជាជនមកពីបណ្តាខេត្តនានា ដែលធ្វើឲ្យពិធីនេះប្រព្រឹត្តទៅយ៉ាងអធិកអធម។
លោកបានបន្តថា ទោះបីក្នុងរយៈពេលជំងឺកូវីដ-១៩រាលដាលនៅក្នុងប្រទេសកម្ពុជា ក៏ដូចជាសហគមន៍ទាំងមូល ហើយកម្មវិធីបុណ្យអុំទូកត្រូវអាក់ខានជាបន្តបន្ទាប់ តែដោយសារស្ថានភាពជំងឺកូវីដ-១៩បានធូរស្រាល ទើបរាជរដ្ឋាភិបាលបានបើកឱកាសឲ្យមានការប្រារព្ធពិធីផ្សេងៗ ជាពិសេសនៅឆ្នាំ២០២២នេះបានអនុញ្ញាតឱ្យតាមបណ្ដាខេត្តធ្វើពិធីប្រណាំងទូកផងដែរ។
សូមបញ្ជាក់ថា ក្នុងរយៈពេល២ថ្ងៃនេះ ក៏មានកាប្រជុំតន្ត្រីពីក្រុមការងារតន្ត្រីស្រុកស្រែ ក្រុមការងារតន្ត្រីគ្រុឌ និងស្តង់តាំងពិព័រណ៍ជាង៥០០ស្តង់ផងដែរ៕
