រណសិរ្សសាមគ្គីសង្គ្រោះជាតិកម្ពុជាបានបដិសន្ធិឡើង ដោយកម្លាំងមហាសាមគ្គីប្រជាជនកម្ពុជាទាំងមូលទាំងក្នុងប្រទេស ទាំងក្រៅប្រទេស ដើម្បីក្រោកឈរឡើងវាយផ្ដូលរំលំរបបប្រល័យពូជសាសន៍ ប៉ុលពត ។ រណសិរ្សសាមគ្គីសង្គ្រោះជាតិកម្ពុជាដឹកនាំដោយសម្ដេចពញាចក្រីហេង សំរិន សម្ដេចធម្មពោធិសាលជា ស៊ីម និងសម្ដេចតេជោ ហ៊ុន សែន ព្រមទាំងវីរៈជនស្នេហាជាតិជា ច្រើនទៀត ។
រំលឹកឡើងវិញទៅដល់សម័យខ្មែរក្រហម 1975-1979 របបកម្ពុជាប្រជាធិបតេយ្យ បានដឹកនាំមាតុភូមិកម្ពុជាជាទីស្រឡាញ់របស់យើង ឲ្យធ្លាក់ក្នុងជ្រោះមហន្តរាយ យ៉ាងធ្ងន់ធ្ងរ ។ ទឹកដីទាំងមូលត្រូវក្រឡាប់ចាក់ វិលទៅរកសម័យទាសភាពដ៏យូរអង្វែងរាប់ពាន់ឆ្នាំមុន ។ ប្រជាជនកម្ពុជារាប់លាននាក់បានក្លាយទៅជាទាសករដាច់ថ្លៃ ដែលអង្គការបដិវត្តន៍របស់ប៉ុលពត ដាក់ឲ្យរស់នៅក្នុងស្ថានភាពមួយដែលអាក្រក់ជាងសត្វធាតុទៅទៀត។ ក្នុងរបបកម្ពុជាប្រជាធិបតេយ្យ គ្មានទេប្រជាធិបតេយ្យ ។ កុំថា ឡើយដល់ទៅស្រែកជំទាលរកប្រជាធិបតេយ្យ សូម្បីតែខំដេកយល់សប្តិ៍ឲ្យឃើញប្រជាធិបតេយ្យ ក៏មិនហ៊ានទាំង យល់សប្ដិ៍ផង ។ អ្នកណាហ៊ាននិយាយពីប្រជាធិបតេយ្យ និយាយពីសិទ្ធិមនុស្ស និយាយពីសេរីភាព និយាយទាមទារសុំឲ្យបានស៊ីគ្រប់គ្រាន់ ដេកឆ្អែត គ្រប់គ្រាន់ គឺមានន័យស្មើនឹងទទួលក្បាលដោយត្បូងចប ឬព្រនង់ឫស្សីជាមិនខាន។
និយាយពីកម្ពុជាប្រជាធិបតេយ្យ គឺនិយាយអំពីអង្គការបដិវត្តន៍ គឺអង្គការបដិវត្តន៍មួយដែលដាច់ខាតបំផុត បដិវត្តន៍បំផុតបដិវត្តន៍ ២៤ ម៉ោងលើ ២៤ ម៉ោង ដេកយល់សប្តិ៍ក៏ត្រូវតែយល់សប្ដិ៍ឃើញភាពមហស្ចារ្យ មហាលោតផ្លោះ មហារុងរឿង របស់អង្គការបដិវត្តន៍ដែលតាមពិតគ្រាន់តែបិសាចភ្នែកស្រស់របស់ សង្គមកម្ពុជានាពេលនោះតែប៉ុណ្ណោះ ។ ពួកអង្គការបដិវត្តន៍បានបោសសំអាតសង្គមខ្មែរកំទេចចោល អស់រចនាសម្ពន្ធសង្គមខ្មែរ បង្កើតឡើងនូវសង្គមមួយថ្មី ជាសង្គមដែលពួកគេហៅថា គ្មានការជិះជាន់ គ្មានការកេងប្រវ័ញ្ច គ្មានអ្នកមាន គ្មានអ្នកក្រ។ ម្នាក់ៗត្រូវតែរត់ឲ្យលឿន រត់ឲ្យទាន់កង់ប្រវត្តិសាស្ត្រ របស់អង្គការបដិវត្តន៍ បើមិនដូច្នេះទេ កង់ប្រវត្តិសាស្ត្រនេះ នឹងកិនដាច់ក្បាល កិនដាច់ដៃជើង ជា មិនខានឡើយ។
នៅក្នុងកម្ពុជាប្រជាធិបតេយ្យទាំងមូល គ្មានអ្វីដែលជាជីវិតពិតប្រាកដទេ មានតែការភូតកុហក់ បោកប្រាស់ គាបសង្កត់ សម្លុតគំរាមកំហែង គ្រប់ពេលវេលា។ ពួកអង្គការបានបង្កើត របៀបរបបរស់នៅមួយដែលធ្វើឲ្យមនុស្សមិនទុកចិត្តមនុស្ស សូម្បីតែប្រពន្ធក៏លែងទុកចិត្តប្ដី សូម្បីតែម៉ែឪក៏លែងទុកចិត្តកូន ព្រោះម្នាក់ៗត្រូវតែបង្ខំចិត្តទទួលយកការគាបសង្កត់មួយ ដែលគ្មាននរណា អាចប្រកែកបានឡើយ នោះគឺមានតែអង្គការមួយគត់ ជាម្ចាស់លើយើងទាំងអស់គ្នា។
ទង់រណសិរ្សសាមគ្គីសង្គ្រោះជាតិកម្ពុជា បានផុសអណ្ដែតឡើង លើវេហាដ៏ខ្ពស់ត្រដឹម នោះ គឺជាទង់របស់អ្នកសង្គ្រោះជាតិ ជាទង់របស់អ្នកដែលបានផ្ដួលរំលំរបបប្រល័យពូជសាសន៍កម្ពុជា ប្រជាធិបតេយ្យ ។ សេចក្ដីថ្លែងការណ៍១១ខ របស់រណសិរ្សសាមគ្គីសង្គ្រោះជាតិកម្ពុជា ត្រូវបានប្រកាសឡើង ដែលនោះ គឺជាការចាប់ផ្ដើមឡើងនៃជីវភាពនយោបាយរបស់អ្នកសង្គ្រោះជាតិ ដែល ទទួលបានការគាំទ្រពីសំណាក់ប្រជាជនកម្ពុជាទូទាំងប្រទេស និងបងប្អូនខ្មែរស្នេហាជាតិនៅឯក្រៅ ប្រទេសផងដែរ ។
៣០ ឆ្នាំជាងបានកន្លងផុតទៅហើយ បើយើងក្រឡេកមើលទៅអតីតកាលរបស់យើងនោះ ទើបយើងឃើញច្បាស់ថា អ្វីៗ ដែលមាន នៅថ្ងៃនេះ មិនមែនកើតឡើងដោយសុខស្រួល ដោយចៃដន្យ នោះទេ ។ ប៉ុន្តែវាបានកើតឡើងដោយសារវីរៈភាពតស៊ូយ៉ាងអង់អាចរបស់វីរជន សង្គ្រោះជាតិ យ៉ាងពិតប្រាកដ ។ មានយុទ្ធជន យុទ្ធនារី អ្នកស្នេហាជាតិយើងជាច្រើននាក់បានពលីជីវិត ក្នុងបុព្វហេតុសង្គ្រោះជាតិ សង្គ្រោះប្រជាជន ។ ឈាមយុទ្ធមិត្តទាំងនេះ នៅតែរស់រវើកនៅក្នុងសរសៃឈាម របស់យើងទាំងអស់គ្នា ដែលបានរួចរស់ជីវិតពីរបបប្រល័យពូជសាស្ត្រ ។ អ្វីៗដែលបានកើត មាននៅលើទឹកដីកម្ពុជារបស់យើងនៅពេលនេះ ពិតជាបានកើតមកដោយសារកម្លាំងមហាសាមគ្គីជាតិ ៕
