មណ្ឌលគិរី ៖ ផ្ទះឈើប្រក់ស័ង្កសីពីរខ្នងត្រូវភ្លើងឆេះគ្មានសល់ បង្ករឲ្យមានការភ្ញាក់ផ្អើលដល់ប្រជាពលរដ្ឋ ក្រោយពីស្ដ្រីមេម៉ាយជនជាតិព្នងម្នាក់មិនគ្រប់សតិដុតផ្ទះខ្លួនឯង ។ ហេតុការណ៍នេះកើតឡើង នាព្រឹកថ្ងៃទី២៦ ខែមេសា ឆ្នាំ២០១៦ វេលាម៉ោង៩និង៣០នាទី ស្ថិតនៅភូមិដំរីជាន់ សង្កាត់រមនា ក្រុងសែនមនោរម្យ ខេត្តមណ្ឌលគិរី។
បើតាមសេចក្ដីរាយការណ៍ពីប្រជាពលរដ្ឋដែលបានឃើញហេតុការណ៍នោះបានប្រាប់ឲ្យដឹងថា មុនដំបូងគេឃើញមានផ្សែងហុយចេញពីលំនៅដ្ឋានកើតហេតុនោះ នឹកស្មានថាម្ចាស់ផ្ទះដុតសម្រាម ស្រាប់តែមួយរំពេចក្រោយមកក៍ឃើញមានអណ្ដាតភ្លើងឆេះយ៉ាងសន្ឋោសន្ឋៅ ទើបបង្ករឲ្យមានការភ្ញាក់ផ្អើលដល់ប្រជាពលរដ្ឋទៅជួយពន្លត់ភ្លើង ប៉ុន្ដែដោយមានការរារាំងពីស្ដ្រីមិនគ្រប់សតិជាម្ចាស់ផ្ទះ បានយកកាំបិតមកដេញកាប់អ្នកភូមិមិនឲ្យគេចូលជួយពន្លត់ភ្លើង។លោក ភី ងូក ចៅសង្កាត់រមនា បានប្រាប់ឲ្យដឹងថា ស្ដ្រីដែលដុតបំផ្លាញផ្ទះខ្លួនឯង មានឈ្មោះ ម្យ៉ាស់ យេ ភេទស្រី អាយុ៣០ឆ្នាំ ជាស្ដ្រីមេម៉ាយ មានជម្ងឺវង្វេងមិនគ្រប់សតិ និងមានអារៈកាចផងដែរ មានសមាជិករស់នៅជាមួយចំនួន៥នាក់ជាជនជាតិព្នង។
លោក តូច យ៉ុន ស្នងការនគរបាលខេត្តមណ្ឌលគិរីបានឲ្យដឹងថា ក្រោយពីទទួលពត៌មានពីប្រជាពលរដ្ឋរាយការណ៍មានករណីភ្លើងឆេះផ្ទះ លោកក៍បានបញ្ជាកម្លាំងរបស់លោកយករថយន្ដពន្លត់អគ្គីភ័យចេញទៅជួយពន្លត់ភ្លាមៗ ប៉ុន្ដែពេលរថយន្ដទៅដល់កន្លែងកើតហេតុនោះ ជាគ្រោះអកុសលភ្លើងបានឆេះរាលដាលអស់ទៅហើយ ដោយសារអាកាសធាតុកើនកម្ដៅយ៉ាងខ្លាំង និងមានខ្យល់ជំនោរបក់ផងនោះ បណ្ដាលឲ្យភ្លើងឆាបឆេះលឿន ស្ទើរតែនឹកស្មានមិនដល់ក្នុងរយះពេលមួយរំពេចភ្នែកសោះ ។
លោកស្នងការនគរបាលខេត្ត បានសម្ដែងនូវការសោកស្ដាយយ៉ាងខ្លាំងចំពោះ ហេតុការណ៍ដ៍អាក្រក់នេះ។
លោក ស្វាយ សំអ៊ាង អភិបាលខេត្តមណ្ឌលគិរីបានមានប្រសាសន៍ អំពាវនាវដល់ប្រជាពលរដ្ឋកំពុងរស់នៅក្នុងតំបន់ខេត្តមណ្ឌលគិរីទាំងអស់ មេតា្ដនាំគ្នាមានការប្រុងប្រយ័ត្នឲ្យខ្ពស់ក្នុងការការពារកុំឲ្យមានកើតហេតុការណ៍អគ្គីភ័យ ព្រោះរដូវនេះជារដូវប្រាំងវាងាយស្រួលបំផុតនៃការឆាបឆេះបានយ៉ាងលឿន នៅពេលបងប្អូនមិនមានការប្រុងប្រយ័ត្ន។លោកអភិបាលខេត្តបានសម្ដែងនូវការសោកស្ដាយយ៉ាងខ្លាំងចំពោះហេតុការណ៍ដ៍អាក្រក់នេះផងដែរ ៕
គឹម ចំរើន
