មណ្ឌលគិរី ៖ នារដូវប្រាំងនេះ កំពុងតែវាយប្រហារមកលើបណ្តាព្រៃ ការពារនិងព្រៃអភិរក្សមួយចំនួនក្នុងខេត្ត មណ្ឌលគិរី បង្ករអោយមានផលប៉ះពាល់និងក្តីព្រួយបារម្មណ៍ចំពោះប្រជាពលរដ្ឋ ស្របពេលដែលប្រទេសកម្ពុជាយើងកំពុង ប្រឈមនិងគ្រោះរាំងស្ងួតដែលកំពុងអូសបន្លាយអស់រយះពេលច្រើនខែមកហើយនេះ។
នៅថ្ងៃសៅរ៍ចុងសប្តាហ៍នេះ ភ្លើងព្រៃត្រូវគេរាយការណ៍ថា កំពុងតែឆាបឆេះ វាយប្រហារព្រៃតាមបណ្តោយផ្លូវ ជាតិលេខ ៧៦ ហើយព្រៃទាំងនេះក៏ស្ថិតក្នុងតំបន់ព្រៃកាពារអភិរក្សជីវចំរុះសីមាផងដែរ។មន្ត្រីរដ្ឋបាលព្រៃឈើ សមត្ថកិច្ចមូលដ្ឋាន និងប្រជាពលរដ្ឋ បង្ហាញការព្រួយបារម្មណ៍យ៉ាងខ្លាំង ខណៈភ្លើងបានបន្តឆាបឆេះខិតជិត មកស្នាក់ការនិងផ្ទះសំបែងរបស់ប្រជាពលរដ្ឋ។
នាល្ងាចថ្ងៃសៅរ៍ដដែល ស្នងការដ្ឋានខេត្តមណ្ឌលគិរី បានផ្តល់រថយន្តពន្លត់អគ្គីភ័យមួយគ្រឿងដើម្បី ជួយអន្តរាគមន៍ពន្លត់ភ្លើងដែលកំពុងឆាបឆេះនោះ ។ ប៉ុន្តែទោះជាយ៉ាងណា ក្រុមអ្នកពន្លត់អគ្គីភ័យបានសំដែងការខកចិត្តថា មិនអាចពន្លត់បានមួយរយភាគរយនោះទេ ព្រោះស្ថានភាពឆេះស្ថិតនៅលើកំពូលភ្នំ គ្មានផ្លូវចូលទៅដល់។
ប្រធានគំរោងអភិរក្សជីវចំរុះសីមា លោក មាគ វុឌ្ឍី ថ្លែងថាភ្លើងព្រៃបានចាប់ផ្តើមឆេះអស់រយៈពេលប៉ុន្មានថ្ងៃមក ហើយ និងបានរាលដាលតាមបណ្តោយផ្លូវជាតិលេខ៧៦ និងពីខាងក្រោយស្នាក់ការអភិរក្ស និងអធិការដ្ឋាន នគរបាល ។លោកបន្តថានេះជាទម្លាប់ភ្លើងឆេះព្រៃទៅហើយ ដែលតែងតែកើតមានជារៀងរាល់ឆ្នាំ តែដោយឡែក នារដូវប្រាំងឆ្នាំ២០១៦នេះ ភ្លើងបានឆេះរំកិលកាន់តែមកជិតស្នាក់ការ និងផ្ទះប្រជាពលរដ្ឋ ដែលជាហេតុធ្វើ អោយលោក ស្នើរទៅលោកស្នងការខេត្តដើម្បី សូមផ្តល់រថយន្តពន្លត់អគ្គីភ័យជួយអន្តរាគមន៍។
សូមជម្រាបផងដែរថា នៅល្ងាចថ្ងៃ២៣មេសាដដែល រថយន្តពន្លត់អគ្គីភ័យ បានបន្តពន្លត់ភ្លើងដែលកំពុងតែឆាបឆេះ ជាបន្តបន្ទាប់អស់ជាច្រើនរថយន្ត ហើយអាចកាត់បន្ថយកម្លាំងភ្លើងមិនអោយឆាបឆេះ រំកិលទៅក្បែរស្នាក់ការ និងផ្ទះពលរដ្ឋបានមួយរយៈពេល ។ ទោះជាយ៉ាងណា ក៏អាជ្ញាធរនៅតែមានការព្រួយបារម្មណ៍ពីសុវត្ថភាពព្រៃនិងទ្រព្យសម្បត្តិរបស់ប្រជាពលរដ្ឋ ដែលអាចនិងត្រូវភ្លើងព្រៃឆេះបានគ្រប់នាទីប្រសិនបើមានការធ្វេសប្រហេសនោះ ហើយ ខណៈដែលខេត្ត មួយនេះ កំពុងជូបគ្រោះរាំងស្ងួតផងនោះ។
គួរបញ្ចាក់ផងដែរថា ខេត្តមណ្ឌលគិរីនៅមិនទាន់មានរបាយការណ៍អំពីករណីភ្លើងឆេះព្រៃ បំផ្លាញអាយុជិវិត និងលំនៅស្ថានពលរដ្ឋនៅឡើយ បើធៀបនិងបណ្តាខេត្តមួយចំនួនទៀតដែលធ្លាប់បានជួបគ្រោះរាំងស្ងួតដូចគ្នានេះ៕
