ខេត្តរតនគិរី ៖ ប្រទេសជាតិមានការរីកចំរើនដោយសារប្រមុខរដ្ឋាភិបាលពិសេសគឺសម្តេចតេជោ ហ៊ុន សែន ដែលដឹកនាំប្រទេសជាតិសំបូរសប្បាយមានសុខសន្តិភាព មានផ្លូវ ស្ពានថ្នល់ខ្វែងខ្វាត់ធ្វើឲ្យប្រជាពលរដ្ឋ
ទូទាំងប្រទេសមានឱកាសដើររកស៊ីរហូតដល់ព្រំប្រទល់ប្រទេសជិតខាងដូចជាព្រំដែនថៃ ព្រំដែនវៀតណាម ព្រំដែនឡាវ រហូតប្រជាពលរដ្ឋខ្លះទៅធ្វើការនៅក្រៅប្រទេសទៀតផង។
ជាក់ស្កែងនៅថ្ងៃទី០២ ខែមេសានេះ ប្រជាពលរដ្ឋដែលរស់នៅស្រុកស្វាយជ្រុំ ខេត្តស្វាយរៀង បាននាំគ្នាបើកម៉ូតូរម៉កដឹកសម្ភារៈបុរាណដើរលក់ដូរពីខេត្តមួយទៅខេត្តមួយរហូតមកដល់ខេត្តរតនគិរី និងតាមបណ្តាលស្រុកមួយចំនួនទៀតផង ហើយសំភារៈដែលយកមកលក់មានដូចជាកញ្ចែង ល្អី កញ្ជើ ចង្អេរ កន្ត្រងប្រហុក។ល។ ប្អូនប្រុស ឈ្មោះ ប៉ក សុផា ដែលបើករម៉កម៉ូតូដឹកអីវ៉ាន់ដើរលក់គ្រប់ច្រកល្ហក់បានអោយអ្នកសារពត៌មានដឹងថា មុខរបរនេះក្រុមគ្រួសារគាត់លក់ដូរជាយូរឆ្នាំមកហើយគឺលក់តាំងពីឪពុកម្តាយរបស់គាត់មកម្លេះ កាលពីជំនាន់ឪពុកម្តាយគាត់លក់គឺជិះកង់ដឹកដើរលក់តែមកដល់ជំនាន់គាត់ជាកូនមានរម៉កម៉ូតូដឹកដើរលក់វិញ។
ប្អូនប្រុសបានអោយដឹងបន្តទៀតថាមុខរបរនេះមិនចំណេញច្រើនទេ គឺអាចផ្គត់ផ្គង់ក្រុមគ្រួសារគាត់បានខ្លះៗ ចំណែកឯប្រពន្ធនិងកូននៅឯស្រុកក៏មិនទំនេរដែរ គឺឈ្លៀតពេលទៅធ្វើការរោងចក្រ និងស្រែចំការ ដើម្បីជួយផ្គត់ផ្គង់ជីវភាពបន្ថែមទៀត គាត់បន្ថែមទៀតថាមុខរបរនេះឥឡូវលក់អត់សូវដាច់ដូចពីមុនទេ ព្រោះពេលនេះគេច្រើនតែប្រើប្រាស់របស់របស់ធ្វើអំពីជ័រដែលគេនាំមកពីប្រទេសជិតខាង។
ចុងបញ្ចប់នេះ ប្អូនប្រុសសំណូមពរដល់ប្រមុខរាជរដ្ឋាភិបាលអោយជួយរកទីផ្សារ ដើម្បីងាយស្រួលនិងបង្កើតជាសហគមន៍ដើម្បីងាយស្រួលលក់ដូរ និងជួយគាំទ្រផលិតផលធ្វើដោយដៃខ្មែរពិតៗពីបុរាណ៕
