មណ្ឌលគិរី ៖ អតីតមេបញ្ជាការកងអនុសេនាធំទី០៣ស្រុកកោះញែក រងរបួសក្បាល បន្ទាប់ពីជូបហេតុការណ៍គ្រោះថ្នាក់ចរាចរណ៍ ក្រឡាប់ រថយន្តដឹកឈើប្រណិត ធ្លាក់ប្រឡាយ តាមបណ្តោយផ្លូវជាតិលេខ៧៦ក្បែរសាលាឃុំ ស្រែខ្ទុម ស្ថិតក្នុងភូមិអូរណា ឃុំស្រែខ្ទុម ស្រុកកែវសីមា ខេត្តមណ្ឌលគិរី នាវេលាម៉ោងប្រមាណ០៧និង០៥នាទីព្រឹកថ្ងៃទី០២មេសា២០១៦។
នគរបាលចរាចរណ៍នៃអធិការដ្ឋានស្រុកកែវសីមា បានអោយដឹងថា រថយន្តរងគ្រោះខាងលើម៉ាកលុចស៊ីស៣៣០ ពណ៍ស ពាក់ស្លាកលេខភ្នំពេញ ២AB- ៦៩១៩ បើកបរដោយឈ្មោះ ហ៊ឹម សុផាត ភេទប្រុសអាយុ៤២ឆ្នាំ រួមនិងព្រូម្នាក់ទៀតឈ្មោះប៊ុន ឡេង ភេទប្រុសអាយុ២៥ឆ្នាំ មានទីលំនៅភូមិអូរអាម ឃុំស្រែខ្ទុម ស្រុកកែវសីមា។
នគរបាលបញ្ជាក់ថា ជនរងគ្រោះទាំង០២នាក់ រងរបួសស្រាលកំពុងសំរាកព្យាបាលនៅមន្ទីរពេទ្យឯកជនមួយ ចំណែករថយន្តដោយសារតែមាន ដឹកឈើប្រណិតផងនោះ ព្រះរាជអាជ្ញារងអមសាលាដំបូងខេត្តមណ្ឌលគិរី បានធ្វើលិខិតផ្ទេរភារកិច្ចអោយរដ្ឋបាលព្រៃឈើជាអ្នក ប្រមូលវត្ថុតាង យកទៅរក្សាទុកដើម្បីចាត់ការបន្តតាមនិតិវិធី។
ក្នុងហេតុការណ៍ក្រឡាប់រថយន្តនេះ អ្នកឃើញហេតុការបានអោយដឹងថា គេបានឃើញរថយន្តលុចស៊ីសរងគ្រោះថ្នាក់នេះ បោះពួយ យ៉ាងលឿន តាមបណ្តោយផ្លូវជាតិលេខ៧៦ស្ថិតក្នុងដែនសមត្ថកិច្ចតំបន់ព្រៃអភិរក្សជីវចំរុះសីមា ស្រុកអូរាំងនិងស្រុកកែវសីមា ហើយក៏ឃើញមានរថយន្តមួយគ្រឿងទៀតម៉ាកត្រាយតុន ជិះដោយកងកម្លាំងអាវុធហត្ថរួមនិងមេព្រៃ តាមពីខាងក្រោយ។ បន្តិចក្រោយមក រថយន្តម៉ាកលុចស៊ីស កាន់តែបន្ថែមល្បឿនទៀត រួចក៏ជ្រុលចង្កូតធ្លាក់ផ្លូវទៅខាងឆ្វេងដៃ បុកដើមឈើទៅមុខ លែងរួចតែម្តង។
ក្រោយកើតហេតុគេឃើញមានសមត្ថកិច្ចចម្រុះក្នុងមូលដ្ឋានរួមនិងមន្ត្រីជំនាញចុះទៅពិនិត្យ ហើយបានរកឃើញថា រថយន្តដែល ជាកម្មសិទ្ធរបស់ឈ្មោះហ៊ឹម សុផាត បានផ្ទុកឈើប្រណិតប្រភេទបេងចំនួន៤សន្លឹកធំ ផងដែរ ។ ចំណែកអ្នកបើកត្រូវគេឃើញថា នៅមិនទាន់មានការឃាត់ខ្លួនណាមួយពីសំណាក់សមត្ថកិច្ចនៅឡើយ។
ប្រធានគំរោងអភិរក្សជីវចំរុះសីមា លោកមាគ វុឌ្ឍី បានអោយដឹងថា ក្នុងករណីប្រដេញចាប់រថយន្តសង្ស័យនេះ គឺមន្ត្រីរបស់លោកសហការគ្នាជាមួយអាវុធហត្ថស្រុកអូរាំង ក្រោយពេលដែលឃើញរថយន្តសង្ស័យខាងលើកំពុង បោះពួយចេញពីស្រុក អូរាំង ឆ្ពោះមកស្រុកកែវសីមានោះ ។ ហើយបច្ចុប្បន្នរថយន្តសង្ស័យរួមនិងវត្ថុតាងជាឈើបេង៤សន្លឹកធំៗមានបរិមាណប្រហែល៤ផ្លាន ក៏ត្រូវបាន យកមករក្សាទុកនៅស្នាក់ការអភិរក្សផងដែរ។
នៅក្នុងមន្ទីរពេទ្យឯកជនលោក ហ៊ឹម សុផាត ក៏បាននិយាយមកកាន់អ្នកកាសែតថា សូមកុំសរសេរព័ត៏មានផ្សព្វផ្សាយពីលោកធ្ងន់ៗពេក។ សូមជម្រាបថា ឈ្មោះហ៊ឹម សុផាត ដែលជាតៃកុងរថយន្តដឹកឈើក្រឡាប់នេះ ជាអតីតមេបញ្ជាការកងអនុសេនាធំទី៣(ហៅគ៣) ប្រចាំស្រុកកោះញែក ហើយបច្ចុប្បន្ន ដោយសារមានការពាក់ព័ន្ធជាមួយនិងរឿងអាស្រូវមួយចំនួនពិសេស ពាក់ព័ន្ធទៅនិងការ សំលាប់សត្វខ្ទីងនៅ ស្រុកកោះញែកកាលពីពេលកន្លងមក ហើយក៏ត្រូវបានដកមកបម្រើទួនាទី ជាជំនួយការមេបញ្ជាការ យោ ធាវរះ កាពារព្រំដែនលេខ១០៣ លោក យិន ចន្ទី។
អតីតមេបញ្ជាការគ៣រូបនេះ ត្រូវបានគេបញ្ជាក់ថា ជាមុខសញ្ញារកស៊ីឈើប្រណិតរួមនិងឈើគ្រប់ប្រភេទ ចាប់តាំងពីស្រុកកែវ សីមា រហូតដល់ស្រុកកោះញែក កំឡុងពេលបម្រើកាងារជាយោធាម្នាក់ក្នុងខេត្តមណ្ឌលគិរីនេះ ។ ហើយទួនាទីទៀតសោត ត្រូវបាន ដំឡើងនិងប្តូរផ្លាស់ជាបន្តបន្ទាប់ ក្នុងរយះពេលយ៉ាងខ្លី ។
គួរបញ្ជាក់ថា សមត្ថកិច្ចស្ទើរតែគ្រប់ជំនាញ ព្យាយាតាមចាប់រថយន្ត ដឹកឈើ របស់គេជាយូរមកហើយ តែមិនដែលចាប់បានទាល់តែសោះ លុះជូបគ្រោះថ្នាក់ចរាចរណ៍នេះ ទើប ចាប់បាន។
ព័ត៌មានចុងក្រោយដែលទទូលបាននៅម៉ោង១០ព្រឹកថ្ងៃដដែល ព្រះរាជអជ្ញារងសាលាដំបូងខេត្តមណ្ឌលគិរីលោក សាន សុភះ ក៏បានដឹកនាំសមត្ថកិច្ចចុះទៅដល់លំនៅស្ថានអតីតមេបញ្ជាការរូបនោះផងដែរ តែលទ្ធផលនៅមិនទាន់ទទូលបាន ព័ត៏មាន នៅឡើយ៕
ដោយ ៖ គឹម ចំរើន
