មណ្ឌលគិរី ៖ កាស៊ីណូហួសសុពលភាពច្បាប់អនុញ្ញាតមួយ ដែលមានទីតាំងនៅជិតច្រកទ្វារភាគីឡាប៉ាខេ ស្ថិតនៅភូមិអូរអាម ឃុំស្រែខ្ទុម ស្រុកកែវសីមា ត្រូវបានលោកព្រះរាជអាជ្ញារងអមសាលាដំបូងខេត្ត ដឹកនាំកម្លាំងកងរាជអាវុធហត្ថខេត្ត អាវុធហត្ថស្រុក នឹងអាវុធហត្ថស្នាក់ការសន្តិសុខ ចុះទៅត្រួតពិនិត្យនឹងផ្អាកដំណើរការបណ្តោះអាសន្ន ។
សកម្មភាពសមត្ថកិច្ចចុះប្រតិបត្តិការផ្អាកធ្វើអាជីវកម្មកាស៊ីណូនេះ បានធ្វើឡើងកាលពីថ្ងៃទី៣១ មិនា ២០១៦ តាំងពីវេលាម៉ោង១២នឹង៣០នាទីថ្ងៃត្រង់ រហូតដល់វេលាម៉ោង៧នឹង៣០នាទីយប់ ថ្ងៃដដែលទើបបញ្ចប់។
លោក ចេង សូរិយា មេបញ្ជាការរងកងរាជអាវុធហត្ថខេត្ត ដែលចុះប្រតិបត្តិការករណីលើខាងលើបានឲ្យដឹងថា កាស៊ីណូនេះបានហួសច្បាប់អនុញ្ញាតតាំងពីខែធ្នូ ២០១៥ មកម្លេះ ប៉ុន្តែថៅកែកាស៊ីណូនៅតែបន្តអនុញ្ញាតឲ្យភ្ញៀវចូលលេង ។
លោកបានបន្តថា នៅពេលសមត្ថកិច្ចសុំត្រួតពិនិត្យច្បាប់អនុញ្ញាត តំណាងរបស់កាស៊ីណូបានយកច្បាប់ដែលហួសសុពលភាពមកបង្ហាញ រួមជាមួយនឹងលិខិតស្នើរសុំច្បាប់ថ្មីមួយច្បាប់ដែលចុះថ្ងៃខែកាលពីខែមករា ២០១៦ មកឲ្យសមត្ថកិច្ចមើល ខណៈច្បាប់អនុញ្ញាតថ្មីមិនទាន់ធ្លាក់មកទេ ។ ចឹងកាស៊ីណូនេះ មិនខុសពីកាស៊ីណូខុសច្បាប់ឡើយ ព្រោះមិនទាន់មានច្បាប់អនុញ្ញាតថ្មីធ្លាក់មកផង តែម្ចាស់កាស៊ីណូនោះហ៊ានឲ្យភ្ញៀវចូលលេងពេញៗ នេះជាការបញ្ជាក់បន្ថែមរបស់ លោកមេបញ្ជាការរងអាវុធហត្ថខេត្ត។
លោក សាន សុភៈ ព្រះរាជអាជ្ញាររងអមសាលាដំបូងខេត្តបានឲ្យដឹងថា នៅពេលនេះយើងគ្រាន់តែចុះមកពិនិត្យនឹងធ្វើស្ថិតិចំពោះជនបរទេសដែលចូលមកលេងក្នុងកាស៊ីណូខាងលើថា តើមានច្បាប់ត្រឹមត្រូវដែរឬអត់?ចំពោះចំណាត់ការយ៉ាងណានោះ មិនត្រូវបានលោក សាន សុភៈ បញ្ជាក់ឲ្យដឹងនោះទេ ព្រោះសមត្ថកិច្ចកំពុងធ្វើការបន្ត។
ក្នុងសកម្មភាពចុះត្រួតពិនិត្យច្បាប់របស់កាស៊ីណូដែលមានឈ្មោះ HOANG DIEU គេសង្កេតឃើញមានជនវៀតណាមទាំងស្រីប្រុស ក្មេងចាស់ប្រមាណជិត៣០០នាក់ កំពុងសម្ងំលេងល្បែងរាប់សិបមុខក្នុងកាស៊ីណូយ៉ាងកងរំពង មិនត្រឹមតែប៉ុណ្ណោះគេក៏ឃើញមានវត្តមានជនជាតិខ្មែរចូលទៅលេងល្បែងក្នុងកាស៊ីណូខាងលើដែរ តែអ្នកខ្លះរត់ចេញក្រៅអស់មួយចំនួនធំ។
ប្រភពដែលអ្នកយកព៌ត័មានទទួលបាននឹងទុកចិត្តចំផុតបានឲ្យដឹងថា ក្នុងចំណោមជនជាតិវៀតណាមប្រមាណ៣០០នាក់នោះ ភាគច្រើនពួកគេចូលមកលេងល្បែងដោយខុសច្បាប់ គឺមានចំនួនតិចតួចណាស់ដែលចូលមកលេងស្របច្បាប់ ព្រោះជនជាតិវៀតណាមទាំងនោះ មិនមានលិខិតឆ្លងដែន។
ប្រជាពលរដ្ឋដែលរស់នៅជិតកាស៊ីណូនឹងច្រកព្រំដែនខាងលើបាននិយាយថា ជារៀងរាល់ថ្ងៃគេតែងឃើញ មានរថយន្តប្រភេទកូរ៉េពីរគ្រឿងបានដឹកជញ្ជូនជនជាតិវៀតណាម តាមច្រកទ្វេរភាគីឡាប៉ាខេ ទៅកាស៊ីណូ HOANG DIEU ដែលមានចម្ងាយប្រមាណតែ២០០ម៉ែត្រពីដងប៉ារាស់ព្រំដែន ។
ប្រជាពលរដ្ឋបានបន្តថា មិនមែនមានតែជនជាតិវៀតណាមទេ ដែលចូលមកលេងល្បែងនៅក្នុងកាស៊ីណូនេះ សូម្បីជនជាតិខ្មែរទាំងប្រុសទាំងស្រី ក៏និយមចូលទៅលេងល្បែងនៅកាស៊ីណូហ្នឹងដែរ ហើយភាគច្រើនជនជាតិខ្មែរប្រុសៗចូលទៅលេងល្បែងបញ្ជល់មាន់ស្ទើររាល់ថ្ងៃ។
ក្រុមអ្នកតាមដានស្ថានការណ៏សង្គមបានលើកឡើងថា ការអនុញ្ញាតឲ្យជនជាតិដទៃឆ្លងដែនចូលមកប្រទេសកម្ពុជាដោយសេរីមិនមានច្បាប់ទម្លាប់បែបនេះ គឺកំពុងធ្វើឲ្យប្រទេសជាតិប្រឈមនឹងបញ្ហាជាច្រើន ដូចជា៖ ១.ខាតបង់ថវិកាបង់ចូលជាតិ ព្រោះនៅពេលមានជនជាតិបរទេសណាម្នាក់ ត្រូវការចូលមកលេងនៅក្នុងប្រទេសកម្ពុជាត្រូវទិញសំបុត្រចូល នឹងដើម្បីសម្គាល់អត្តសញ្ញាណ ២.អាចធ្វើឲ្យមានបញ្ហាអសន្តិសុខនឹងសណ្នាប់ធ្នាប់ ព្រោះសមត្ថកិច្ចមិនអាចកំណត់អត្តសញ្ញាណរបស់ជនបរទេសទាំងនោះ ថា ពួកគេជាប់ ពាក់ព័ទ្ឋជាមួយនឹងអំពើខុសច្បាប់ដែរឬយ៉ាងណា?ការចេញចូលដោយសេរីរបស់ក្រុមអ្នកញៀនល្បែងទាំងនោះ ក៏បានធ្វើឲ្យប៉ះពាល់ដល់សន្តិសុខមួយចំនួន ត្បិតអាចមានជនឱកាសនិយមមួយចំនួន បន្លំចូលមកប្រព្រឹត្តឹបទល្មើសនានាលើទឹកដីខ្មែរ ព្រោះតែគ្មានការត្រួតពិនិត្យពីសមត្ថកិច្ច។
មហាជនដែលតាមដានសកម្មភាពចេញ-ចូលរបស់ជនជាតិវៀតណាមដែលចូលមកលេងល្បែងនៅកាស៊ីណូ HOANG DIEU បានរិះគន់ នគរប៉ុស្តិ៍ច្រកទ្វេរភាគីព្រំដែនឡាប៉ាខេ នឹងមន្ត្រីជំនាញនានាដែលមានតួនាទីយាមកាមនៅច្រកព្រំដែននោះថា ព្រោះតែប្រយោជន៏បុគ្គល អស់លោកបែរជាភ្លេចគិតពីបញ្ជា ដែលអាចកើតមានជាយថាហេតុ ។ប្រជាពលរដ្ឋបានសំនូមពរដល់លោក តូច យ៉ុន ស្នងការនគរបាលខេត្តមណ្ឌលគិរី គួរចាត់វិធានការចំពោះមន្ត្រីរបស់លោកផង ព្រោះភាពអសកម្មរបស់មន្ត្រីក្រោមឱវ៉ាទរបស់លោកស្នងការមិនមែនទើបតែកើតមាននោះទេ គឺមានរាប់ខែឆ្នាំមកហើយតាំងពីកាស៊ីណូ HOANG DIEU បើកដំណើរការមក ៕
ដោយ ៖ គឹម ចំរើន
