មណ្ឌលគិរី ៖ កម្លាំងអាវុធហត្ថ ប៉ុស្ត៏ព្រុំដែនឡាបាខេ និងផ្នែករដ្ឋបាលព្រៃឈើស្រុក កែវសីមាហាក់ដូចជាកំពុងត្រូវថ្នាំសណ្តំរបស់ឈ្មួញរកស៊ីឈើមួយចំនួន ព្រោះថាក្នុងកំឡុងពេល ប្រហែលជាជាងកន្លះខែកន្លងមកនេះគេសង្គេតឃើញថានៅក្នុងស្រុកកែវសីមានៅតែមានការដឺកជញ្ជូនឈើប្រណិតទាំងយប់ទាំងថ្ងៃតាមខ្សែរបន្ទាត់ព្រំដែនគោកក៏ដូចជាតាមបណ្តោយផ្លូវជាតិលេខ៧៦ផងដែរ ។
ជាក់ស្តែងនៅព្រឹកថ្ងៃទី៣១មិនា២០១៦នេះកម្លាំងចំរុះរបស់ស្នាក់ការអភិរក្សជីវចំរុះសីមាដែលដឹកនាំដោយលោក មាគ វុឌ្ឍី ប្រធានគំរោងអភិរក្សជីវចំរុះសីមា បានធ្វើការបង្ក្រាបបានរថយន្តដឹកឈើមួយគ្រឿង និងឃាត់ខ្លួនស្ត្រី ម្នាក់ផងដែរ ។
លោក មាគ វុឌ្ឍី បានអោយដឹងថា ករណីបង្ក្រាបរថយន្តដឹកឈើខុសច្បាប់ នៅព្រឹកមិញនេះ គឺកម្លាំងរបស់លោកបានដេញតាមចាប់បានរថយន្តមួយគ្រឿងម៉ាក កាមារីស្វិត ពណ៏ប្រផេះ ពាក់ស្លាកលេខ ច៧៣៧៥ ភព២ និងឈើប្រណិតប្រភេទធ្នង់ចំនួន១៤ដុំ ព្រមទាំងស្ត្រីម្នាក់ ដែលរួមដំណើជាមួយរថយន្តនោះក៏ត្រូវបាននាំយកទៅសាកសួរនៅឯស្នាក់ការអភិរក្សជីវចំរុះសីមាផងដែរ ។
លោកបានបន្តថា សកម្មភាពខាងលើគឺកម្លាំងរបស់លោកបានធ្វើការដេញតាមរថយន្តល្មើសតាំងពី ចណុចបង្គោលគីឡូម៉ែត្រ៦៤តាមបណ្តោយផ្លូវជាតិលេខ៧៦បោះពួយឆ្ពោះទៅផ្លូវបត់ចូលច្រកព្រំដែនឡាបាខេ លទ្ធផល់តាមទាន់ និងចាប់បានគឺនៅត្រង់ចំណុចភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី ពោលគឺនៅជិតផ្នែករដ្ឋបាលព្រែឈើកែវសីមាតែម្តង ចំណែកអ្នកបើកបររថយន្តល្មើស
បានរត់គេចខ្លួនបាត់ស្រមោលតែម្តង ។ រថយន្ត និងឈើដែលជាវត្ថុតាងគឺត្រូវបានរៀបចំសំណុំបែបបទ បញ្ជូនទៅតុលាការដើម្បីចាត់ការតាមនិតិវិធី ចំពោះស្ត្រីម្នាក់នោះត្រូវបានដោះលែងអោយទៅផ្ទះវិញ នៅរសៀលថ្ងៃដដែលនេះ។
គួរំលឹកផងដែរថា នៅថ្ងៃទី២៩ មិនាថ្មីៗនេះលោក ជុយ សុខឃាង ប្រធានផ្នែករដ្ឋបាលព្រៃឈើកែវសីមាបានឲ្យដឹងថា ការបង្ក្រាបបទល្មើសព្រៃឈើនៅក្នុងស្រុកកែវសីមា គឺត្រូវបានរឹតបណ្តឹងស្ទើតែអស់រលីងទៅហើយនៅសល់តែចន្លោះប្រហោងតិចតួចប៉ុណ្ណោះ ។ តែបើតាប្រភពច្បាស់ការពីប្រជាពលរដ្ឋស្រុកកែវសីមានអះអាងថា ពួកគេនៅតែឃើញមានការដឹកជញ្ជូនឈើតាមផ្លូវទាំងយប់ទាំងថ្ងៃគ្មានស្រាកស្រាននោះទេ ៕
ដោយ ៖ គឹម ចំរើន
