ខេត្តសៀមរាប ៖ សិក្ខាកាមសមាជិកសមាគមអ្នកបើកបរដឹកភ្ញៀវទេសចរណ៍ប្រចាំព្រលានអាកាសយានដ្ឋានអន្តរជាតិ សៀមរាប ចំនួន២៣៦នាក់និង សិក្ខាកាមអ្នកបកប្រែភាសាកូរ៉េ ចំនួន ១១៦នាក់ ដែលទើបបញ្ចប់ការសិក្សា ត្រូវបានទទួលវិញ្ញាបនបត្រ កាលពីរសៀលថ្ងៃទី៣០ ខែ ធ្នូ ឆ្នាំ២០១៥ នៅសាកលវិទ្យាល័យអង្គរ ខេត្តសៀមរាប ក្រោមអធិបតីភាពរបស់ ឯ.ឧបណ្ឌិតឃឹម ប៊ុនសុងអភិបាលនៃគណៈអភិបាលខេត្តឯកឧត្តមឧកញ៉ាបណ្ឌិតសៀង ណាំសាកលវិទ្យាធិការ នៃសាកលវិទ្យាល័យអង្គរ ដោយមានការចូលរួមពីថ្នាក់ដឹកនាំមន្ទីរសាកលវិទ្យាធិការរង ផងដែរ ។
បន្ទាប់ពីកិច្ចស្វាគមន៍របស់លោកង៉ូវ សេងកាក់ប្រធានមន្ទីរទេសចរណ៍ខេត្តនិងការប្តេជ្ញាចិត្តរបស់ តំណាងសិក្ខាកាមរួចមក មានប្រសាសន៍នោះឯកឧត្តមឧកញ៉ាបណ្ឌិតសៀង ណាំសាកលវិទ្យាធិការនៃសាកល វិទ្យាល័យអង្គរ បានធ្វើការបញ្ជាក់ថា ក្នុងកិច្ចសហការបានល្អជាមួយសមាគមអ្នកបើកបរដឹកភ្ញៀវទេសចរណ៍ប្រចាំព្រលានអាកាសយានដ្ឋានអន្តរជាតិសៀមរាប សាកលវិទ្យាល័យអង្គរបានធ្វើការបណ្តុះបណ្តាលដល់ សមាជិកសមាគមទាំង ២៣៦នាក់ឲ្យកាន់តែបានយល់ច្បាស់អំពីតួនាទីកាតព្វកិច្ចរបស់ ក្នុងការបើកបរបម្រើជូន ដល់ភ្ញៀវទេសចរដែលចូលមកទស្សនាកម្សាន្តនៅលើទឹកដីប្រវត្តិសាស្ត្រសៀមរាប។ ចំពោះការបណ្តុះបណ្តាល មគ្គុទេសក៍ភាសារកូរ៉េនេះជាវគ្គទី៥ហើយមានចំនួន ១១៦នាក់ ដែលបានឆ្លងកាត់បណ្តុះបណ្តាលកន្លងមកនៅ សាកលវិទ្យាល័យអង្គរនេះ ។
មានប្រសាសន៍សំណេះសំណាលនោះដែរឯ.ឧ បណ្ឌិត ឃឹម ប៊ុនសុង បានបញ្ជាក់ថា នេះគឺជាលទ្ធផល ដែលសិក្ខាកាមបានខិតខំសិក្សារៀនសូត្ររហូតទទួលបានជោគជ័យ ដែលជាផ្នែកមួយធ្វើឲ្យវិស័យទេសចរ មានការរីកចម្រើន ក្នុងរួមចំណែកអភិវឌ្ឍន៍សេដ្ឋកិច្ចសង្គមក្នុងយុគសម័យសកលភាវូបនីយកម្ម និង ការដែលកម្ពុជា ត្រូវត្រៀមខ្លួន ធ្វើសមាហរណកម្មសេដ្ឋកិច្ចអាស៊ាន។
ឯកឧត្តមបណ្ឌិតក៏បានលើកផងដែរថា ក្រោមកិច្ចដឹកនាំដ៏ ឈ្លាសវៃប្រកបទៅដោយគតិបណ្ឌិតដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី បានដាក់ចេញនូវ គោលនយោបាយ និង យុទ្ធសាស្ត្រក្នុងការអភិវឌ្ឍន៍វិស័យទេសចរណ៍ ដែលជាវិស័លស្នូលមួយនៃកំណើនសេដ្ឋ កិច្ចជាតិ និង កំពុងបន្តជម្រុញការអភិវឌ្ឍន៍វិស័យទេសចរណ៍កម្ពុជាជាទេសចរណ៍វប្បធម៌ ធម្មជាតិ ប្រវត្តិសាស្ត្រ ប្រកបដោយគុណភាព និងចីរភាព ដោយប្រកាន់ខ្ជាប់នូវទស្សនៈ (ការអភិវឌ្ឍន៍បម្រើឲ្យការអភិរក្ស និង ការអភិរក្ស បម្រើឲ្យការអភិវឌ្ឍន៍ )ដើម្បីចូលរួមទ្រទ្រង់កំណើនសេដ្ឋកិច្ច និង លើកស្ទួយជីវភាពរបស់ប្រជាពលរដ្ឋសំខាន់ ការអភិវឌ្ឍន៍សេដ្ឋកិច្ចបៃតង ដែលជានិន្នាការរួមនៃពិភពលោកបច្ចុប្បន្ន ។ឯ.ឧបណ្ឌិតឃឹម ប៊ុនសុងបានគូសបញ្ជាក់ថា កត្តានេះចាំបាច់ត្រូវការអនុវត្តទន្ទឹមគ្នា និង បង្កើនសមត្ថភាពប្រកួតប្រជែងជាការធានាចីរភាព ដែល កើតចេញពីការអភិវឌ្ឍន៍វិស័យទេសចរណ៍ ក្នុងតំបន់ ។
ទាំងនេះហើយដែលតម្រូវធ្វើឲ្យខេត្តគោលដៅរបស់ភ្ញៀវទេសចរពិភពលោកបន្តធ្វើការអភិរក្ស អភិវឌ្ឍន៍ការពារ កែលម្អក្រុងប្រវត្តិសាស្ត្រ ដែលសម្បូរទៅដោយសម្បត្តិ វប្បធម៌ និង ធនធានធម្មជាតិហើយក៏ជាគោលដៅទេសចរណ៍របស់ជាតិ ។
កត្តាទាំងនេះហើយទើបរាជរដ្ឋាភិបាលបានយកចិត្តទុកដាក់គ្រប់គ្រង និង អភិវឌ្ឍន៍គោលដៅទេសចរណ៍សំខាន់ៗប្រកបដោយស្មារតីទទួលខុសត្រូវ និងប្រុងប្រយ័ត្នខ្ពស់ព្រមទាំងជម្រុញការវិនិយោគវិស័យទេសចរណ៍ ក្នុងការបង្កើតផលិតផលទេសចរណ៍ថ្មីៗប្រកបដោយគុណភាពដើម្បីទ្រទ្រង់ដល់សកម្មភាពទេសចរណ៍បានយូរអង្វែងសម្រាប់មនុស្សជំនាន់ក្រោយផង ដែរ។ក្នុងនោះដែរឯកឧត្តមបណ្ឌិត ក៏បានលើកផងដែរ ពីការផ្អាក់ធ្វើនិង ប្តូរប័ណ្ណបើកបរ ដែលប្រមុខរាជរដ្ឋាភិបាលកម្ពុជា បានប្រកាស ដើម្បីធ្វើការពិភាក្សាទៅលើតម្លៃសេវាឲ្យបានសមស្រប កុំឲ្យធ្លាក់ទៅលើបន្ទុករបស់ប្រជាពលរដ្ឋ ក្នុងការសម្រួលដល់ប្រជាពលរដ្ឋក្រីក្រផងដែរ ។ ក្នុងនោះដែរ បងប្អូនជាសមាជិក សមាគមន៍ អ្នកបើកបរដឹកភ្ញៀវទេសចរណ៍ក៏បានធ្វើការសាទរចំពោះការសន្តោសប្រណី ដល់ប្រជាពរដ្ឋ ក្នុងការផ្តល់នូវកម្រៃ មួយដែលប្រជាពលរដ្ឋយើងទទួលយកបានពីព្រោះថាតម្រូវការចាំបាច់របស់ប្រជាពលរដ្ឋដែលមានយានយន្តគឺ បណ្ណ័បើកបរប្រចាំថ្ងៃរបស់ពួកគាត់ ៕
ដោយ ៖ លុច ណាម
