ខេត្តប៉ៃលិន ៖ ជនសង្ស័យម្នាក់ ក្នុងចំណោមបក្ខពួក៣នាក់ បានចូលគាស់ផ្ទះអាជី វករលក់គុយទាវ និងកាហ្វេ មួយកន្លែង លួចលុយអស់ចំនួន៦លាន៥សែនរៀល លុះម្ចាស់ភ្ញាក់ដឹងខ្លួនទាន់ពេលក៏ចាប់ប្របួចប្រគល់ជូនសមត្ថកិច្ចនគរបាលអធិការស្រុកសាលាក្រៅ ខណៈអ្នកសារព័ត៌មានជាច្រើនស្ថាប័នចុះទៅសួរនាំ មិនព្រមប្រាប់នោះទេ ដោយមានការលាក់លៀមចង់សម្រួលដោះលែងរួចក្រោយមកក៏បញ្ជូនបន្តទៅស្នងការនគរបាលខេត្ត។ ចំណែកផ្ទះប្រជាពលរដ្ឋមួយកន្លែងទៀតក៏ត្រូវក្រុមចោរចូលក្នុងផ្ទះលួចលុយអស់ចំនួន៣០ម៉ឺនរៀល និងយកទូរស័ព្ទដៃអស់ចំនួន៣គ្រឿងក្នុងយប់តែមួយដែរ ។
ហេតុការណ៍ពលរដ្ឋចាប់ចោរចូលលួចលុយ និងទូរស័ព្ទក្នុងផ្ទះប្រគល់ជូនសមត្ថកិច្ចនេះបានកើតឡើងកាលពីវេលាម៉ោង១រំលងអធ្រាត្រ ឈានចូលថ្ងៃទី៣០ ខែធ្នូ ឆ្នាំ២០១៥ ស្ថិតនៅក្នុងផ្ទះលក់គុយទាវ និងកាហ្វេ ក្នុងភូមិទួលខ្ពស់ ឃុំស្ទឹងត្រង់ ស្រុកសាលាក្រៅ ។ រីឯផ្ទះប្រជាពលរដ្ឋមួយកន្លែងទៀត ដែលត្រូវចោរចួលលួចលុយអស់៣០ម៉ឺនរៀល និងទូរស័ព្ទដៃ៣គ្រឿង បានកើតឡើងនៅវេលាម៉ោង៣រំលងអធ្រាត្រថ្ងៃដដែល ក្នុងភូមិភ្នំស្ពុង ឃុំសាលាក្រៅ ស្រុកសាលាក្រៅ ។
ប្រភពព័ត៌មានបានឱ្យដឹងថា ម្ចាស់ផ្ទះរងគ្រោះទី១. ដែលត្រូវជនសង្ស័យចូលគាស់ ផ្ទះលួចលុយអស់ជាច្រើនមានឈ្មោះ ទេស ឡុង ភេទប្រុស អាយុ៣២ឆ្នាំ មានប្រពន្ធ ឈ្មោះ ហួត ហួង អាយុ២៨ឆ្នាំ រស់នៅភូមិឃុំខាងលើ ដោយបាត់អស់ប្រាក់ចំនួន៦លាន៥សែនរៀល ។ ចំណែកជនសង្ស័យដែលម្ចាស់ផ្ទះចាប់បាន មានឈ្មោះ យួន ធីម ភេទប្រុស អាយុ១៨ឆ្នាំ រកឃើញវត្ថុតាកាំបិតខ្វែវ១ដើម ជាជនសេពគ្រឿងញៀន ក្រោយពីសួរនាំរួចឈានដល់ចាប់បានបក្ខពួកចំនួនពីរនាក់ទៀត ទី១. ឈ្មោះ បង់ សារ័ត្ន ភេទប្រុស អាយុ២១ឆ្នាំ រស់នៅភូមិទួលខ្ពស់ ឃុំស្ទឹងត្រង់ ស្រុកសាលាក្រៅ ទី២. ឈ្មោះ រឿប អិន ភេទប្រុស អាយុ២៣ឆ្នាំ រស់នៅភូមិថ្នល់កែង ឃុំអូរអណ្តូង ស្រុកសាលាក្រៅ ទាំងអស់គ្នាជាជនប្រើប្រាស់គ្រឿងញៀន ។
បើតាមសម្តីបុរសជនរងគ្រោះខាងលើ ឈ្មោះ ទេស ឡុង អាជីវករលក់ដូរគុយទាយនិងកាហ្វេ មានស្លាកយីហោតាឡុង បានឱ្យដឹងថា នៅយប់រំលងអធ្រាត្រថ្ងៃកើតហេតុ ខណៈរូបគេនិងក្រុមគ្រួសាកំពុងដេកលង់លក់ ស្រាប់តែមានជនសង្ស័យខាងលើម្នាក់ បានយកកាំបិតខ្វែវ១ដើម ចូលទៅគាស់ទ្វារផ្ទះផ្នែកខាងក្រោយ រួចឡើងចូលទៅលួចលុយក្នុង ទូអស់ចំនួន៦លាន៥សែន ខណៈកំពុងតែរុករាវរកទូរស័ព្ទដៃ ដែលទុកនៅក្នុងផ្ទះនោះដែរ ស្រាប់តែរូបគេភ្ញាក់ដឹងខ្លួនទាន់ពេលក៏ចាប់ក្របួចប្រគល់ឱ្យសមត្ថកិច្ចអធិការស្រុកសាលាក្រៅតែម្តង ។
លុះព្រឹកឡើង ខណៈអ្នកសារព័ត៌មានចុះទៅសួរនាំខាងសមត្ថកិច្ចហាក់ដូចជាមានការលាក់លៀមមិនប្រាប់ឈ្មោះជនសង្ស័យនោះឡើយ តែដោយសារមានអ្នកសារព័ត៌មានពពាក់ពពូនឈរចាំយកព័ត៌មាន ទើបនៅល្ងាចថ្ងៃដដែលគេបញ្ជូនទៅស្នងការនគរបាលខេត្ត ដើម្បីចាត់ការបន្ត ។
ពាក់ព័ន្ធទៅនឹងបញ្ហានេះ លោក ញ៉ឹក ថុល អធិការស្រុកសាលាក្រៅ មិនបានរៀបរា បរាប់អ្វីច្រើនដល់អ្នកសារព័ត៌មាននោះឡើយ គ្រាន់តែប្រាប់ថា សូមទៅយកព័ត៌មាននៅស្នងការនគរបាលខេត្ត ព្រោះខាងលោកបញ្ជូនជនសង្ស័យម្នាក់ និងអ្នកពាក់ព័ន្ធទាំងអស់ទៅទីនោះហើយ ។
ចំណែកប្រជាពលរដ្ឋ ម្នាក់ទៀត ឈ្មោះ ជួន ចាន់ធី ភេទស្រី អាយុ៣៤ឆ្នាំ ត្រូវក្រុមចោរចូលលួចលុយក្នុងផ្ទះអស់៣០ម៉ឺនរៀល ទូរស័ព្ទដៃម៉ាកសាំសុងចំនួន២គ្រឿង និងណូគា១គ្រឿង រួចរត់គេចខ្លួនដោយសុវត្ថិភាព ខណៈនាងដេកលង់លក់នៅក្នុងផ្ទះ ។
រហូតមកដល់បច្ចុប្បន្ននេះ ប្រជាពលរដ្ឋរស់នៅតាមភូមិឃុំនានា មានការព្រួយបារម្ភចំពោះសុវត្ថិភាពយ៉ាងខ្លាំង ខណៈក្រុមចោរ និងក្រុមញៀនគ្រឿងញៀនបានធ្វើសកម្មភាពចូលគាស់ផ្ទះលួចលុយកាក់របស់ពួកគាត់ ជារៀងរាល់យប់ថ្ងៃ ។ ដូច្នេះពួកគាត់ក៏សំណូមពរឱ្យអាជ្ញាធរមានសមត្ថកិច្ចទាំងអស់មេត្តាយកចិត្តទុកដាក់ការពារ និងល្បាតនៅតាមដែនការពាររបស់ខ្លួនឱ្យបានដិតដល់ ដើម្បីរក្សាសន្តិសុខជូនប្រជាពលរដ្ឋផងដែរ ៕ អត្ថបទ អ៊ុក ទូច
