ខេត្តសៀមរាប ៖ មន្ត្រីកាំកុងត្រូលសាខា នៃខេត្តសៀមរាប បានចុះត្រួតពិនិត្យធ្វើតេសម្ហូបអាហារដែលគ្មានគុណភាព និង គ្មានអានាម័យ កាលពី ថ្ងៃទី២៨ ខែធ្នូ ឆ្នាំ២០១៥ នៅក្នុងផ្សារពួក ស្រុកពួក ខេត្តសៀមរាប និងផ្សព្វផ្សាយចែកជូននៅស្លាកសញ្ញានៃការប្រើប្រាស់ និង ទិញផលិតផលសម្រាប់បរិភោគឧបភោគ ដើម្បីឲ្យបងប្អូនប្រជាពលរដ្ឋបានដឹងនិងយល់ច្បាស់ មុននិងទិញផលិតផលអ្វីមួយត្រូវពិនិត្យមើលឲ្យបានត្រឹមត្រូវ ចៀសវាងនូវផលបះពាល់ដល់សុខភាពរបស់ប្រជាពលរដ្ឋ អ្នកប្រើប្រាស់ប្រចាំថ្ងៃ ។
លោក ព្រុំ ដូលីន ប្រធានកាំកុងត្រូលសាខាខេត្តសៀមរាបបានឲ្យដឹងថា មន្ត្រីកាំកុងត្រូលរបស់លោក បានចុះធ្វើការត្រួតពិត្យ និងធ្វើតេសលើម្ហូបអាហានៅតាមបណ្តាផ្សារនានាជាច្រើនលើកច្រើនសាររួចមកហើយ នៅក្នុងខេត្តសៀមរាប ជាពិសេសគឺនៅផ្សារពួកនេះតែម្តង បានឲ្យឃើញថា បងប្អូនអាជីករ អ្នកលក់ដូរ ព្រមទាំងប្រជាពលរដ្ឋពួកគាត់បានកាន់តែយល់ដឹងច្រើនជាងមុន ចំពោះបញ្ហាការលក់ដូរនិងការទិញព្រមទាំងផ្នែកអនាម័យក្នុងការលក់ដូរឬរបស់របរប្រើប្រាស់សម្រាប់ម្ហូបអាហាបរិភោគ និង ការចែកជូននៅស្លាកសញ្ញានេះគឺសម្រាប់ឲ្យបងប្អូនមើលមុននិងទិញហើយត្រូវជ្រើរើសយកផលិតផលណាដែលគ្មានជាតិគីមីនិងមានគុណភាពល្អ ។
លោកបន្តថា ស្លាកសញ្ញាទាំងអស់នេះត្រូវបានបិតភ្ជាប់ទៅនិងជញ្ជាំងតាមតូបក្នុងផ្សារ ដើម្បីឲ្យមានភាពងាយស្រួលដល់ប្រជាពលរដ្ឋនិងអាជីវករលក់ដូរនៅទីនោះបានយល់ដឹងផងដែរ ។ លោកបន្ថែមទៀតថា ចំពោះខាងក្រសួងពាណិជ្ជកម្ម នៃអគ្គនាយកដ្ឋានកម្ពុជាត្រួតពិនិត្យ នីហរណ៏ អាហរណ៏ និង បង្ក្រាបការក្លែងបន្លំ កាំកុងត្រូលបានដាក់ចេញនៅស្លាកសញ្ញា ស្តីពីឥវ៉ានម្ហូបអាហារណាដែលខូចគុណភាពនិងមានគុណភាពឲ្យដំណើរការចរាចរណ៏នៅលើទីផ្សារក្នុងព្រះរាជាណាចក្រកម្ពុជា និងបានណែនាំពន្យល់ពីផលបះពាល់សុខភាពដល់ប្រជាពលរដ្ឋទូទាំងប្រទេសផងដែរ ។ ធ្វើយ៉ាងណា ឲ្យមានការរិតបន្តឹងនៅរបស់របរដែលត្រូវនាំចូលមកពីបណ្តាប្រទេសជិតខាងនិងនៅក្នុងស្រុកយកមកដាក់លក់នៅលើទីផ្សារឲ្យមានគុណភាពល្អមិនឲ្យប៉ះពាល់ដល់សុខភាពបងប្អូនប្រជាពលរដ្ឋឡើយ ។ ក្នុងនោះក្រុមការងារក៏បានធ្វើការពន្យល់ ណែនាំអំពីការពិនិត្យនូវថ្ងៃខែផលិត និង កាលបរិច្ឆេតនូវមុខទំនិញ ដើម្បីឲ្យដឹងពីគុណភាពរបស់ទំនិញផងដែរ ៕
ដោយ (លុច ណាម) សៀមរាប
