មណ្ឌលគីរី ៖ មន្ត្រីបម្រើការងារនៅមន្ទីរសាធារណៈការ នឹងដឹកជញ្ជូនខេត្ត បានរងរបួសក្បាលជាទម្ងន់ ខណៈគាត់កំពុងបើកបរត្រាក់ទ័រភ្ជួរដីឡើងលើរថយន្តដឹកជញ្ជូនមួយគ្រឿងទៀត ក៏ស្រាប់តែមានគ្រាប់កាំភ្លើងខ្យល់(កាំភ្លើងកែច្នៃ) ។ ហេតុការណ៏ដែលស្ទើរនឹកស្មានមិនដល់នេះបានកើតនៅវេលាម៉ោង១៣ ថ្ងៃទី៣០ ធ្នូ ២០១៥ នៅចំនុចផ្លូវចូលវត្តលើ ក្នុងភូមិជ្រៃសែន សង្កាត់ មនោរម្យ ក្រុង សែនមនោរម្យ។
លោកឧត្តមសេនីយ៏ត្រី តូច យ៉ុន ស្នងការនគរបាលខេត្តបានឲ្យដឹងថា ជនរងគ្រោះឈ្មោះ នួន ផាត ហៅ សាង ភេទប្រុស អាយុ៤៧ឆ្នាំ មានទីលំនៅភូមិជ្រៃសែន សង្កាត់មនោរម្យ ក្រុងសែមនោរម្យ។លោកស្នងការបានបន្តថា នៅពេលជនរងគ្រោះភ្ជួររាល់ដីចម្ការរួច ក៏បរត្រាក់ទ័រ ឡើងលើរថយន្តដើម្បីដឹកទៅផ្ទះ ស្រាប់តែឮសម្លេងកាំភ្លើងខ្យល់ ហើយគ្រាប់នោះបានហោះមកត្រូវក្បាល ជនរងគ្រោះហូរឈាមស្រោចពេញក្បាល បៀមគ្រាប់ជាប់ជើងសក់ស្តាំ ក្រោយកន្ទុយភ្នែក។ នៅពេលភ្លាមៗជនមិនស្គាល់មុខដែលបាញ់កាំភ្លើងខ្យល់ បានរត់គេចខ្លួនបាត់ស្រមោល ។
បន្ទាប់ពីត្រូវគ្រាប់កាំភ្លើងកែច្នៃជនរងគ្រោះ បានទៅមន្ទីរពេទ្យធ្វើការវះកាត់ យកគ្រាប់ចេញ(គ្រាប់នោះគឺពិដាងកង់ម៉ូតូ) ហើយក៏មកប្តឹងសមត្ថកិច្ច ដើម្បីស្រាវជ្រាវរកអ្នកបាញ់។
លោកឧត្តមសេនីយ៏ស្នងការបានបញ្ជាក់ថា ក្រោយពីធ្វើការស្រាវជ្រាវ សមត្ថកិច្ចបានរកឃើញជនបង្ក ដែលមានឈ្មោះ សាំង ហ៊ាន ភេទប្រុស អាយុ១៥ឆ្នាំ មានទៅលំនៅភូមិកណ្តាល សង្កាត់ស្ពានមានជ័យ ក្រុងសែនមនោរម្យ ។
សមត្ថកិច្ចបានឃាត់ខ្លួនជនបង្ក និងវត្ថុតាងអាវុធបាញ់ខ្យល់(ប្រភេទកែច្នៃ)ប្រើគ្រាប់ពិដាងកង់ម៉ូតូ។
តាមចម្លើយសារភាពរបស់ជនសង្ស័យថា ខ្លួនកំពុងបាញ់សត្វពពេច ស្រាប់តែឮសម្លេងរបស់ជនរងគ្រោះស្រែកថា អា!ណា បាញ់អាញ់ ទើបខ្លួនគេ(ជនបង្ក)ដឹងថា បានបាញ់ចំមនុស្ស ។ ដោយភ័យខ្លាចក៏យកកាំភ្លើងនោះទៅបោះចោលក្នុងព្រៃ នឹងជិះម៉ូតូគេចខ្លួន។
បច្ចុប្បន្នជនសង្ស័យត្រូវបានកម្លាំងនគរបាលខេត្ត រៀបចំសំនុំរឿងបញ្ជូនទៅសាលាដំបូងខេត្ត ដើម្បីចាត់ការតាមច្បាប់ ។
បើតាមការសន្និដ្ឋាននោះ ជនសង្ស័យពិតជាគ្មានបំណងធ្វើមនុស្សឃាតលើជនរងគ្រោះទេ តែដោយសារការធ្វេសប្រហែសទើបបណ្តាលឲ្យកើតរឿងនេះតែម្តង៕
ដោយ ៖ ហេង ចាន់ណុប
