ខេត្តបាត់ដំបង ៖ កាលពីព្រឹកថ្ងៃទី ២៧ ខែធ្នូ ឆ្នាំ២០១៥ ឯកឧត្តម ច័ន្ទ សុផល អភិបាល នៃគណៈអភិបាលខេត្តបាត់ដំបង ដឹកនាំមន្ត្រីរាជការតាមស្ថាប័នរដ្ឋ អង្គភាពកម្លាំងប្រដាប់អាវុធនៅក្នុងខេត្ត និងក្រុមអ្នកសារព័ត៌មានប្រចាំខេត្តជាង ២០នាក់ ចូលរួមធ្វើពលកម្មប្រចាំសប្តាហ៍ដើម្បីសម្អាតបរិស្ថានក្នុងក្រុងបាត់ដំបង ។
នេះជាការរួមចំណែកមួយរបស់ក្រុមអ្នកសារព័ត៌មាននៅខេត្តបាត់ដំបង ដែលបានចូលរួមដោយផ្ទាល់ជាមួយថ្នាក់ ដឹកនាំ និងមន្ត្រីរាជការនៅក្នុងខេត្ត ក្នុងការបម្រើផលប្រយោជន៍ដល់សង្គមជាតិ និងការបំពេញការងារផ្សព្វផ្សាយនូវព័ត៌មាន នានា ។ ជាពិសេសគឺការចូលរួមសម្អាតបរិស្ថាននៅតាមទីសាធារណៈនានា នៅក្នុងទីក្រុងបាត់ដំបងដែលជាទីក្រុងបេតិកភ័ណ្ឌ ជាប់ចំណាត់ថ្នាក់ថា ជាទីក្រុងស្អាតលេខ ១ នៅក្នុងុព្រះរាជាណាចក្រកម្ពុជា ។
ឯកឧត្តម អភិបាលនៃគណៈអភិបាលខេត្តបាត់ដំបង បានមានប្រសាសន៍អំពីការរួមចំណែកលើការអភិវឌ្ឍន៍គ្រប់ វិស័យ គ្រប់ហេដ្ឋារចនាសម្ព័ន្ធនៅក្នុងខេត្តបាត់ដំបង ។ ជាពិសេសគឺការប្រឹងប្រែងរៀបចំកែលម្អសោភ័ណភាពនៅក្នុងទីក្រុង ដែលជាបេះដូងនៃខេត្តជង្រុកស្រូវ ហើយក៏ជាខេត្តមួយដែលពោរពេញដោយសក្តានុពល ទាំងផ្នែកកសិកម្ម ទាំងផ្នែកទេសចរណ៍ផងដែរ ។
ដោយសារតែចង់បង្ហាញនូវសម្រស់ដ៏ផូរផង់ដែលជាអនុភាពដ៏ខ្លាំងក្លានៃខេត្តវ័យចំណាស់មួយនេះហើយ ទើបអភិ បាលខេត្ត ឯកឧត្តម ច័ន្ទ សុផល បានបង្កើតនូវទិវាពលកម្មប្រឆាំងសប្តាហ៍ដើម្បីដឹកនាំមន្ត្រីរាជការ កងកម្លាំងប្រដាប់អាវុធ គ្រប់អង្គភាព និងស្ថាប័នរដ្ឋក្នុងខេត្តចូលរួមធ្វើពលកម្មសម្អាតបរិស្ថាននៅតាមទីសាធារណៈក្នុងទីក្រុង ។
ឯកឧត្តម មានប្រសាសន៍ថា ទិវាពលកម្មនេះតែងរៀបចំធ្វើនៅរៀងរាល់ថ្ងៃចុងសប្តាហ៍ក្នុងគោលបំណងចូលរួម សម្អាតបរិស្ថានលើកតម្កើងសម្រស់នៅក្នុងទីក្រុង ដើម្បីឱ្យសក្តិសម និងកេរ្តិ៍ឈ្មោះជាទីក្រុងស្អាត សម្រាប់ទាក់ទាញភ្នែក ភ្ញៀវទេសចរ ទាំងភ្ញៀវបរទេសទាំងភ្ញៀវនៅក្នុងស្រុកឱ្យចូលមកទស្សនកាន់តែច្រើនឡើងទ្វេរដងថែមទៀត ។
ឯកឧត្តម ច័ន្ទ សុផល អភិបាលខេត្តកោតសរសើរ ចំពោះស្មារតីចូលរួមរបស់ក្រុមអ្នកសារព័ត៌មានក្នុងខេត្តបាត់ដំបង ដែលបានប្រឹងប្រែងទាំងការជួយផ្សព្វផ្សាយនូវការវិវឌ្ឍនានានៅក្នុងខេត្ត ទាំងការចូលរួមដោយផ្ទាល់ក្នុងការបម្រើផល ប្រយោជន៍សង្គមជាតិ ៕
ដោយ ៖ សារ៉េត
