ក្រុងប៉ោយប៉ែត ៖ សង្វៀនជល់មាន់ ល្បែងយូគី និងបាញ់អាប៉ោង ជ្រោកក្រោមស្លាកកាស៊ីណូយីហោ ឡាក់គី រហូតមកដល់ថ្ងៃទី៥ ខែធ្នូ ឆ្នាំ២០១៥នេះ គេនៅតែសង្កេតឃើញបន្តសកម្មភាពបើកលេងភ្នាល់នៅជិតរង្វង់មូលច្រកទ្វារអន្តរជាតិប៉ោយប៉ែត ទល់មុខការិយាកល័យគយនិងរដ្ឋាករ ។
សេចក្តីរាយការណ៍បានបន្តថា សកម្មភាពល្បែងស៊ីសងទាំងនេះ បានបើកយ៉ាងទូលំទូលាយ មានប្រជាពលរដ្ឋខ្មែរចូលលេងជាច្រើនកុះករ អ្នកខ្លះចាញ់ឡើងវិលមុខ ឈ្លោះប្តីប្រពន្ធ អ្នកខ្លអទៀតរហូតដល់អស់ផ្ទះសំបែងធ្លាក់ខ្លួនជំពាក់បំណុលគេ និងភៀសខ្លួនចេញទៅរកការងារធ្វើនៅប្រទេសថៃទៀតផង ។
ការចាប់គូបញ្ជល់មាន់ដើមផាន់ចាប់ពី៣ម៉ឺនបាត រហូតដល់២០ឬ៣០ម៉ឺនបាត ក្នុង១គូៗ ដោយឡែកល្បែងអាប៉ោង និងយូគីចាក់ក្នុងមួយរន្ធចាប់ពី៣រយបាត រហូតដល់៥ពាន់ឬមួយម៉ឺនបាតឯណោះ ។
សេចក្តីរាយការណ៍បានបញ្ជាក់អះអាងថា កាស៊ីណូ ខាងលើនេះទើបតែបើកថ្មីប៉ុណ្ណោះ បានបណ្តោយអោយប្រជាពលរដ្ឋខ្មែរចូលលេងល្បែងយ៉ាងគគ្រឹកគគ្រេង ហ៊ោកញ្ជ្រៀវ ទ្រហឹងពេញភូមប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ រីឯសមត្ថកិច្ចពាក់ព័ន្ធបានត្រឹមតែទៅឈរអោបដៃមើលចាំទទួលយកលុយដាក់ខែពីថៅកែកាស៊ីណូតែប៉ុណ្ណោះ ។
សកម្មភាពទាំងនេះបានប៉ះពាល់យ៉ាងធ្ងន់ធ្ងរដល់គោលនយោបាយភូមិឃុំមានសុវត្ថិភាព ដែលរដ្ឋាភិបាលកំពុងតែខិតខំពង្រឹងយ៉ាងខ្លាំង ចំពោះអំពើចោរកម្ម ឆក់ ប្លន់ រហូតដល់មានករណីប្លន់សម្លាប់កើតមានជាបន្តបន្ទាប់កន្លងទៅនេះ ដែលជាហេតុធ្វើអោយប្រជាពលរដ្ឋ នៅក្នុងប៉ោយប៉ែតក៍ដូចជានៅតាមបណ្តខេត្តនានាមានការព្រួយបារម្ភយ៉ាងខ្លាំងផងដែរ ។
ល្បែងស៊ីសងខាងលើ បានលេចចេញរូបរៀងដែលធ្វើអោយក្រុមអ្នករត់ម៉ូតូឌុប នៅក្នុងក្រុងប៉ោយប៉ែតរិតតែមានការព្រួយបារម្ភ ហើយពួកគាត់បានអះអាងថា ម្ចាស់ដែលបើកបនល្បែងគ្រប់ប្រភេទខាងលើ ជ្រោកក្រោមយីហាកាស៊ីណូ ឡាក់គី មានឈ្មោះ ភួន ផេង និងឈ្មោះ ភួន រតនា ដែលជាមការមើលការខុសត្រូវ។
ពាក់ព័ន្ធនិងសេចក្តីរាយការណ៍ខាងលើនេះ ភ្នាក់ងារសារពត៌មានយើងខ្ញុំមិនអាចទំនាក់ទំនងសុំការបំភ្លឺពីម្ចាស់កាស៊ីណូ ក៍ដូចជាសមត្ថកិច្ចពាក់់ព័ន្ធនៅឡើយទេ នារសៀលថ្ងៃទី២៥ ខែធ្នូ ឆ្នាំ២០១៥នេះ ៕
ដោយ ទាវ សំអុល
