ខេត្តមណ្ឌលគិរី ៖ ប្រតិបត្តិការចុះចាប់បង្ក្រាបការជួញដូរផលិតផលក្លែងក្លាយនេះ បានប្រព្រឹត្តឹទៅនៅថ្ងៃទី២៤ ខែធ្នូ ឆាំ២០១៥ វេលាម៉ោង២និង៣០រសៀល ក្នុងភូមិណងបួរ ឃុំណងឃីលឹក ស្រុកកោះញែក។
យោងតាមរបាយការណ៍សមត្ថកិច្ចបានឲ្យថា ពួកគេ(អ្នកលក់ទឹកឃ្មុំ) បានបបួលគ្នាជិះម៉ូតូចំនួន២គ្រឿង ដែលមានគ្នាចំនួនបីនាក់ ទៅទិញក្បាលទឹកឃ្មុំនៅភូមិអូរត្រាវ ខេត្តរតនគិរី និងបានសួរពីវិធីលាយទឹកឃ្មុំក្លែងក្លាយ ពីអ្នកភូមិនៅទីនោះ (ប៉ុន្ដែមិនបានស្គាល់ឈ្មោះអ្នកប្រាប់) ដើម្បីយកមកអនុវត្តន៍ខ្លួនឯងបន្ដពេលបានរូបមន្ដលាយរួចហើយ អ្នកទាំងបីក៍បានខ្ចីសម្ភារៈអ្នកភូមិនៅទីនោះដើម្បីយកមកធ្វើទឹកឃ្មុំក្លែងក្លាយទុកដើរលក់ដើម្បីចំណេញបានច្រើន។
អ្នកលក់ទឹកឃ្មុំក្លែងក្លាយនោះទី១មានឈ្មោះ ជិន គង់ អាយុ៣៣ឆ្នាំ ទី២ឈ្មោះ វ៉ាត ដានី អាយុ២៦ឆ្នាំ និងទី៣ឈ្មោះ ឆាត វិឆ័យ អាយុ២៤ឆ្នាំ អ្នកទាំងបីនាក់នេះរស់នៅភូមិវាល ឃុំព្រៃខ្លា ស្រុកស្វាយអន្ទរ ខេត្តព្រៃវែង។ សមត្ថកិច្ចបានបង្ហាញឲ្យឃើញវត្ថុតាងមានដូចជា ម៉ូតូចំនូន២គ្រឿង ខ្សែក១ខ្សែ ជញ្ជៀន១វង់ ទូរស័ព្ទដៃចំនួន២គ្រឿង និងប្រាក់រៀលចំនួន៥ម៉ឺនរៀល។
សមត្ថកិច្ចបានបន្ដថា នៅពេលឃើញអ្នកលក់ទឹកឃ្មុំកំពុងតែ លក់ឲ្យប្រជាពលរដ្ឋក្នុងភូមិពេលនោះអ្នកទិញបានកំពុងតថ្លៃជាមួយអ្នកលក់ សមត្ថកិច្ចឃើញដូច្នេះក៍បានឃាត់ខ្លួនអ្នកទាំងបីដើម្បីសាកសួរព័ត៌មាន។ ក្នុងការលក់នោះគេលក់ក្នុងតម្លៃ១លីត្រ ៣៥ ០០០រៀល ប៉ុន្ដែនៅមិនទាន់មានអ្នកទិញទេ។
ក្រោយពីបានធ្វើការសាកសួរជនសង្ស័យទាំងបីក្នុងករណីខាងលើរួមទាំងវត្ថុតាងត្រូវបានសមត្ថកិច្ចបញ្ចូនទៅស្នងការដ្ឋានដើម្បីចាត់ទៅតាមនិតិវិធីច្បាប់៕ ហេង ចាន់ណុប
