ខេត្តមណ្ឌលគិរី ៖ កម្មករពីរនាក់បម្រើការនៅក្រុមហ៊ុនEM ទទួលម៉ៅការតបណ្តាញអគ្គីសនី ត្រូវបង្គោលភ្លើងបាក់សង្កត់ស្លាប់ភ្លាមៗ ពេលកំពុងឡើងអូសខ្សែបញ្ជូនអគ្គិសនី នៅម៉ោង ៤រសៀលថ្ងៃទី២៦ ខែធ្នូ ឆ្នាំ២០១៥នេះ នៅក្នុងភូមិអូរយ៉េះ ឃុំស្រែសង្គម ស្រុកកោះញែក ខេត្តមណ្ឌលគិរី។
លោក កាន់ ពេញ អធិការស្រុកកោះញែកបានប្រាប់ថា មុនពេលកើតហេតុកម្មករទាំងពីរ បានឡើងលើបង្គោលភ្លើង ដើម្បីអូសខ្សែភ្លើងតាមផ្លូវក្នុងស្រុកកោះញែក ស្រាប់តែបង្គោលភ្លើងបានបាក់សង្កត់លើពួកគេស្លាប់ភ្លាមៗតែម្តងនៅកន្លែងកើតហេតុ។
លោកអធិការ បានឲ្យដឹងទៀតថា កម្មកររងគ្រោះឈ្មោះ សាន សុធន់ ភេទប្រុស អាយុ ២៤ឆ្នាំ មានស្រុកកំណើតនៅភូមិព្រែកតា ឃុំពាមទា ស្រុកកំពង់ត្របែក ខេត្តព្រៃវែង។ ជនរងគ្រោះទីពីរ ឈ្មោះ យាម សុឃាម ភេទប្រុស អាយុ ១៥ឆ្នាំ មានស្រុកកំណើតនៅខេត្ត កោះកុង ក្រុងខេមរៈភូមិន្ទ។ សពជនរងគ្រោះត្រូវបានតំណាងក្រុមហ៊ុន និងសាច់ញាតិយកទៅក្រុងសែនមនោរម្យ ខេត្តមណ្ឌលគិរី ដើម្បីចាត់ធ្វើបុណ្យតាមប្រពៃណី។
តាមប្រភពកន្លែងកើតហេតុបានឲ្យដឹងថា បង្គោលភ្លើងនេះទើបតែសាងសង់ហើយថ្មីៗ ប៉ុន្ដែមូលហេតុដែលបាក់បង្គោលភ្លើងធ្វើឲ្យមានមនុស្សស្លាប់នេះដោយសារមានការសាងសង់ខ្វៈលក្ខណៈបច្ចេកទេស ហើយគេសង្កេតឃើញថា បង្គោលភ្លើងដែលសាងសង់នោះ មើលទៅឃើញមានដាក់ដែកសសៃតូចៗ ដែលធ្វើឲ្យគ្មានភាពរឹងមាំ ៕
