មណ្ឌលគីរី ៖ កាលពីព្រឹកថ្ងៃទី២៥ ធ្នូ ២០១៥ ក្រោមអធិបតីភាពលោក ភិន សុភឿន ស្នងការរងទទួលបន្ទុកសណ្តាប់ធ្នាប់ នឹងលោកវរសេនីយ៏ទោ ចាន់ ទិត្យ នាយការិយាល័យចរាចរណ៏ខេត្ត នឹងមន្ត្រីនគរបាលជំនាញចំនួនជាង៣០នាក់។
លោកវរសេនីយ៏ទោ ចាន់ ទិត្យ នាយការិយាល័យចរាចរណ៏បានឲ្យដឹងថា ដើម្បីត្រៀមលក្ខណៈអនុវត្តច្បាប់ចរាចរណ៏ផ្លូវគោកថ្មី ឲ្យបានទទួលជោគជ័យ ចាប់ពីថ្ងៃទី១ មករា ២០១៦ ការិយាល័យជំនាញបានបើកវគ្គផ្សព្វផ្សាយ ច្បាប់ស្តីពីចរាចរណ៏ផ្លូវគោក អនុក្រឹត្យទាំងបី និងបណ្តុះបណ្តាល បំប៉នជំនាញអំពីនិតិវិធីប្រតិបត្តិការត្រួតពិនិត្យ ជាតិស្រវឹង នឹងពាក់មួកសុវត្ថិភាព… សីលធម៏វិន័យដល់មន្ត្រីនគរបាលចរចរណ៏ ។
នាយការិយាល័យចរាចរណ៏ខេត្តបានបន្តថា នគរបាលចរាចរណ៏ខេត្តមណ្ឌលគិរីបានផ្សព្វផ្សាយច្បាប់ផ្លូវគោកថ្មី អនុក្រឹត្យ នឹងបទដ្ឋាននានាយ៉ាងទូលំទូលាយតាមវិទ្យុ ទូរទស្សន៏ នឹងបណ្តាញព័ត៌មាន ដល់ប្រជាពលរដ្ឋ នឹងមន្ត្រីរាជការ សិក្សានុសិស្ស នាពេលកន្លងមកស្ទើរទូទាំងក្រុងស្រុកទាំង៥ក្នុងខេត្ត។
ក្នុងការរឹតបន្តឹងច្បាប់ចរាចរណ៏ផ្លូវគោកថ្មីរបស់ប្រទេសកម្ពុជាឲ្យមានប្រសិទ្ឋភាព អគ្គស្នងការនគរបាលជាតិបានត្រៀម កម្លាំងសរុបទូទាំងប្រទេសសម្រាប់ ចុះប្រតិបត្តិការពិនិត្យអនុវត្តច្បាប់ ចំនួន១៧២ក្រុម មានកម្លាំងចំនួន១.៧៥០នាក់ ក្នុងនោះ ក្រុមត្រួតពិនិត្យដើមទី៦១ក្រុម មានកម្លាំង៣១១នាក់ នឹងក្រុមត្រួតពិនិត្យតាមដងផ្លូវសរុប១១១ក្រុម មានកម្លាំង១.៤៣៩នាក់ ក្នុងនោះក្រុមត្រួតពិនិត្យពេលយប់៤០ក្រុម មានកម្លាំង៥៥៩នាក់។
ទោះបីច្បាប់ចរាចរណ៏ថ្មីដែលដាក់ឲ្យអនុវត្តនៅឆ្នាំ២០១៦មានលក្ខណៈល្អសម្រាប់ការចរាចរណ៏តាមដងផ្លូវ ក៏ប៉ុន្តែលោកប្រធានការិយាល័យបានលើកឡើងពីបញ្ហាមួយប្រឈមមួយចំនួនថា នៅខេត្តមណ្ឌលគិរីប្រជាពលរដ្ឋភាគច្រើនគឺជាជនជាតិភាគតិច ហើយមួយចំនួនពួកគាត់មិនទាន់អាចទទួលបាននូវការផ្សព្វផ្សាយ នៃច្បាប់ចរាចរណ៏ថ្មីដែលត្រូវដាក់ឲ្យអនុវត្តនាពេលឆាប់ៗនេះទេ ។
ម្យ៉ាងវិញទៀត មធ្យោបាយរបស់ពួកគាត់ គឺច្រើនតែទិញម៉ូតូចាស់ៗមកតម្លើងកែច្នៃជិះក្នុងចម្ការ ព្រោះជីវភាពរបស់ពួកគាត់នៅមានកំរិតនៅឡើយ ដូច្នេះការអនុវត្តច្បាប់ចរាចរណ៏ថ្មីនេះ លោក ប្រធានការិយាល័យបានសន្តិដ្ឋានថា អាចនៅមានភាពខ្វះចន្លោះខ្លះ តែទោះជាយ៉ាងណា សមត្ថកិច្ចជំនាញនឹងបន្តខិតខំអនុវត្តការងារឲ្យទទួលជោគជ័យតាមគោលការណ៏ច្បាប់៕
ហេង ចាន់ណុប
