មណ្ឌលគិរី ៖ កងកំលាំងការពារយាមល្បាតនៅតំបន់អភិរក្សរបស់WWF បានធ្វើការចាប់ឃាត់ ត្រាក់ទ័រជនជាតិវៀតណាមឈ្លានពានមកកាប់ឈើនៅក្នុងទឹកដីកម្ពុជានៅតំបន់ជាប់ព្រុំដែនប៉ុស្ត៍ម្រើច ហើយការចាប់នេះ បានធ្វើឡើង កាលពី រសៀល ថ្ងៃទី ២២ ខែធ្នូ ដែលការចាប់នៅកន្លែងផ្សេងៗគ្នា។
បើតាមសំដីលោក កែវ សុភ័ក្យ អនុប្រធានព្រៃការពារ WWF បានឲ្យដឹងថា ដោយមានបញ្ជាពីលោក ឡុង ប៊ុង ប្រធានព្រៃការពារ WWF ដែលបានទទួលព័ត៌មានថា មានជនជាតិវៀតណាមចូលមកលួច កាប់ឈើក្នុងទឹកដីកម្ពុជាត្រង់ចំណុចខាងលើ ទើបលោកបានសហការជាមួយកម្លាំងនគរបាលការពាររវរៈការពារព្រំដែន លេខ ១០៣ ចុះទៅចំណុច នោះ រួចក៏ឈានទៅដល់ធ្វើការឃាត់ត្រាក់ទ័របានចំនួន ៥ គ្រឿងពីទីតាំងផ្សេងៗគ្នា។
ត្រាក់ចំនួន៥គ្រឿងនោះ មាន ៤ គ្រឿង ដឹកឈើហ៊ុបមូល ព្រមទាំងឈើឡាំងជ្រុងចំនួន ៣០ កំណាត់ មានប្រភេទឈើស្រឡៅ សុក្រម ផ្ចឹក ចំណែកមួយគ្រឿងទៀតមាន រ៉ឺម៉កសណ្តោង អត់មានដឹកឈើ ទេ ។ ដោយឡែក អ្នកបើកត្រាក់ទ័រទាំង ៥ គ្រឿង ដែលសុទ្ធសឹងជាជនជាតិវៀតណាមត្រូវបានកម្លាំង ចាប់ឃាត់បានបន្ទាប់មក ក៏រត់រួចទៅបាត់នៅត្រង់ចំណុចទួលលវេតិ។ បច្ចុប្បន្ន កម្លាំងចម្រុះកំពុងធ្វើការដឹកជញ្ជូនវត្ថុតាងទាំងនោះ យកមករក្សាទុកនៅស្នាក់ការព្រៃការពារ WWF ។
នេះមិនមែនជាលើកទីមួយទេ ដែលមានករណីជនជាតិវៀតណាមលួចចូលមកកាប់ និងដឹកជញ្ជូន ឈើ នៅក្នុងទឹកដីខ្មែរនៃខេត្តមណ្ឌលគិរីនេះ បានកើតឡើងជាញឹកញាប់ហើយ ប្រហែលជាមានមន្ត្រី ខ្មែរជាអ្នកបើកដៃអោយចូលផងកមិនដឹង ៕
ចិន្តា
