ខេត្តសៀមរាប៖ នៅរសៀលថ្ងៃទី ២១ ខែ ធ្នូ ឆ្នាំ២០១៥នេះ មានប្រារព្ធពិធីអបអរសាទរ ទិវាជាតិ១២ធ្នូ ស្តីពីការប្រយុទ្ធប្រឆាំងអំពើជូញដូរមនុស្ស ក្រោមប្រធានបទ (រួមគ្នាប្រយុទ្ធប្រឆាំងអំពើជួញដូរមនុស្ស ស្វែងយល់ដឹង ត្រៀម ខ្លួនធ្វើសកម្មភាព ) ក្រោមអធិបតីភាពលោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និង ជាអនុប្រធាន អចិន្ត្រៃយគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ដោយមានការអញ្ជើញចូលរួមពីឯកឧត្តម លោកជំទាវ គណៈអភិបាលខេត្ត សមាជិកក្រុមប្រឹក្សាខេត្ត និង អស់លោក លោកស្រីជាថ្នាក់ដឹកនាំមន្ទីរ អង្គភាព និង បណ្តាអង្គការសង្គមស៊ីវិល ព្រមទាំងមន្ត្រីរាជការ កងកម្លាំងប្រដាប់អាវុធ លោកគ្រូ អ្នកគ្រូ និស្សិត ក្រុមយុវជនកាយរឹទ្ធកម្ពុជា និងយុវជនកាកបាទក្រហម សិស្សានុសិស្ស និង ប្រជាពលរដ្ឋ ប្រមាណ៩០០នាក់ចូលរួម នៅសួនច្បារមុខមហាសណ្ឋាគារអង្គរ ។
ក្នុងកិច្ចស្វាគមន៍របស់លោកជំទាវ យូ សុភាអភិបាលរងនៃគណៈអភិបាលខេត្ត និង ជាប្រធានលេខាធិការដ្ឋាន គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប បានបញ្ជាក់ពីលទ្ធផលដែលអនុវត្តបាន យុទ្ធសាស្ត្រប្រឆាំងការជួញដូរមនុស្ស ការការពារស្តារនីតិសម្បទា សមារណកម្ម និង មាតុភូមិនិវត្តន៍ ការងារកិច្ចយុត្តិធម៌ និង កិច្ចសហប្រតិបត្តិការ ព្រមទាំងការងារបណ្តុះបណ្តាល លើកកម្ពស់សមត្ថភាពទៀតផង ។
បន្ទាប់ពីចំណាប់អារម្មណ៍តំណាងអង្គការ បានបញ្ជាក់ថា រយៈពេលកន្លងមកនេះ ស្ត្រី និងកុមារកម្ពុជា មួយចំនួន បានក្លាយជាវត្ថុជួញដូរ កេងប្រវ័ញ្ច និង ធ្វើអាជីវកម្មផ្លូវភេទ តាមរយៈមេខ្យល់ ក្រុមអ្នករកស៊ីរត់ពន្ធមនុស្ស និង បានប្រើប្រាស់គ្រប់កលល្បិចបោកប្រាស់ ទៅតាមគ្រប់រូបភាព ហើយកុមារមួយចំនួនត្រូវបានធ្លាក់ខ្លួនទៅក្នុង អំពើពេស្យាចារ ដោយរងនូវអំពើហិង្សាក្នុងគ្រួសារ ល្បែងស៊ីសង ឬឪពុកម្តាយយកទៅលក់ ដើម្បីសង់បំណុលគេ និង កុមារមួយចំនួនត្រូវបានបង្ខំឲ្យរៀបអាពាហ៍ពិពាហ៍ក្លែងក្លាយ ដែលត្រូវបានគេយកទៅលក់ និង កត្តាមួយចំនួនក៏ធ្វើឲ្យស្ត្រី និង កុមារងាយរងគ្រោះ ក្នុងការជួញដូរ ដោយកង្វះនូវព័ត៌មាន ការអប់រំ សីលធម៌សង្គម ហើយឪពុក ម្តាយមិនអនុវត្តកាតព្វកិច្ច ក្នុងការចិញ្ចឹមកូន ព្រមទាំងសហគមពុំសូវមានកិច្ចសហការទៀតផង ។
បន្ទាប់ពីការជនរងគ្រោះដោយការជួញដូរមនុស្ស ធ្វើការបញ្ជាក់ពីទុក្ខសោករបស់ខ្លួន នៅពេលដែលទៅធ្វើការងារនៅក្រៅប្រទេស ដែល ត្រូវគេបោក និង កេងប្រវ័ញ្ចកម្លាំងពលកម្មនៅលើទូកនេសាទសមុទ្រ និង តាមកសិដ្ឋាន រួចមក មានប្រសាសន៍នោះលោកជំទាវ ជូ ប៊ុនអេងក៏បានលើកឡើងថា ទិវាជាតិ ១២ធ្នូ ឆ្នាំ២០១៥ ក្រោមប្រធានបទ រួមគ្នាប្រយុទ្ធ ប្រឆាំងអំពើជួញដូរមនុស្ស ស្វែងយល់ដឹង ត្រៀមខ្លួនធ្វើសកម្មភាព ក្នុងគោលបំណង បង្ហាញអំពីឆន្ទះមុះ មុតរបស់រាជរដ្ឋាភិបាលកម្ពុជា ក្នុងការទប់ស្កាត់ ការបង្ក្រាប ការផ្តន្ទាទោសជនល្មើស និង ការជួញដូរមនុស្ស និង អំពើ ធ្វើអាជីវកម្មផ្លូវភេទ និង បំផុសការយល់ដឹង ការប្រុងស្មារតី និង ធ្វើសកម្មភាពប្រយុទ្ធប្រឆាំង អំពើជួញដូរមនុស្សគ្រប់រូប ភាព ។
លោកជំទាវ ជូ ប៊ុនអេងក៏បានបន្តទៀតថា ដើម្បីទប់ស្កាត់ការការជួញដូរមនុស្ស និង អំពើកេងប្រវ័ញ្ចផ្លូវភេទលើស្ត្រី និង កុមារ តាមគ្រប់រូបភាព សំខាន់តាមទីកន្លែងណាដែលងាយរងគ្រោះ តាមតួនាទី ភារកិច្ច លទ្ធភាព សមត្ថភាព ការសហការ និង រួមចំណែកដោយឆន្ទះនិងមនសិការ ។
លោកជំទាវរដ្ឋលេខាធិការបានគូសបញ្ជាក់ថា តាមរយៈនៃទិវា១២ធ្នូនេះ គឺបានពង្រីកការយល់ដឹង និង ទទួលបានព័ត៌មានពាក់ព័ន្ធ និង វិសាលភាពនៃបទល្មើសជួញដូរមនុស្ស និង កិច្ចប្រឹងប្រែងរបស់រាជរដ្ឋាភិបាល និង ដៃគូរពាក់ព័ន្ធ ក្នុងការឆ្លើយតប និង ការចូលរួមទាំងអស់គ្នា ព្រមទាំងត្រូវ មានការប្រុងប្រយ័ត្ន នូវគ្រប់ល្បិចកលជនល្មើស និង ត្រៀមខ្លួនឲ្យបានល្អ ក្នុងការចូលរួមប្រយុទ្ធប្រឆាំង អំពើរជួញដូរ មនុស្សគ្រប់រូបភាព តាមភារកិច្ចមុខសញ្ញា ណិង ឆន្ទះរៀងៗខ្លួន និង ជម្រុញធ្វើសកម្មភាពប្រកបដោយឆន្ទះ ឆ្លើយតប ទៅនឹងការជួញដូរមនុស្ស និង អំពើធ្វើអាជីវកម្មផ្លូវភេទ ។
លោកជំទាវ ជូ ប៊ុនអេងក៏បានធ្វើការពន្យល់ណែនាំ ព្រមទាំងលើកឡើងពីទុក្ខសោករបស់ពលរដ្ឋខ្មែរយើង ដែលរងគ្រោះ ដោយការជួញដូរមនុស្សទៅក្រៅប្រទេស ដោយការ ប្រថុយប្រថាន ក្នុងការចាញ់បោកមេខ្យល់ ដែលជាបទពិសោធន៍ សម្រាប់បងប្អូនប្រជាពលរដ្ឋ សំខាន់ សិស្ស និស្សិត បានយល់ជ្រួតជ្រាប ពីការប្រយុទ្ធប្រឆាំងនឹងអំពើជួញដូរមនុស្ស ការកេងប្រវ័ញ្ចពលកម្ម និង ផ្លូវភេទ ដែលជាមិនមែនជារឿងបុគ្គលណាម្នាក់ គឺជាភារកិច្ចយើងទាំងអស់គ្នាត្រូវធ្វើការចូលរួម ដើម្បីទប់ស្កាត់អំពើជួញដូរមនុស្ស និង អំពើកេងប្រវ័ញ្ចផ្លូវភេទលើស្ត្រី និង កុមារ ទៅតាមគ្រប់រូបភាព ស្របតាមគោលនយោបាយរបស់រាជរដ្ឋាភិបាល (ធ្វើការក្នុងស្រុកក៍ល្អប្រសើ បើចេញទៅធ្វើការនៅក្រៅប្រទេសត្រូវមានសុវត្ថិភាព និងសេចក្តីថ្លៃថ្នូរ) ។
លោកជំទាវ ជូ ប៊ុនអេង ក៏មានសង្ឃឹមជឿជាក់ថា ការប្រារព្ធទិវានៅថៃ្ងនេះ ជាស្មារតីយល់ដឹង ដ៏មានសារៈសំខាន់បំផុតក្នុងការផ្សព្វផ្សាយជាសាធារណៈបំផុសកិច្ចចូលរួមក្នុងការអនុវត្តច្បាប់ស្តីអំពីការជួញដូរមនុស្ស ការធ្វើអាជីវកម្មផ្លូវភេទលើស្ត្រីនិងកុមារព្រមទាំងសូមបងប្អូនប្រជាពលរដ្ឋទាំងអស់ ផ្តល់ការគាំទ្របន្តការសហការជាមួយគណៈកម្មាធិការប្រយុទ្ធប្រឆាំងអំពើជួញដូរមនុស្ស ខេត្តសៀមរាប ដើម្បីអនុវត្តច្បាប់នេះឲ្យកាន់តែមានប្រសិទ្ធិភាព និងជោគជ័យថែមទៀត ដើម្បីប្រជាជននិងប្រទេសជាតិយើង ៕
ដោយ(លុច ណាម)សៀមរាប
