ខេត្តកំពត ៖ កាលពីរសៀលម៉ោង ៤ៈ៣០នាទី ថ្ងៃទី ១៧ ខែធ្នូ ឆ្នាំ២០១៥ កន្លងទៅនេះ កម្លាំងនគរបាលព្រហ្មទណ្ធខេត្ត ដឹក នាំដោយលោក ខាន់ សុផល ព្រះរាជអាជ្ញារងអមសាលាដំបូងខេត្តកំពត ចុះបង្ក្រាបបានមុខសញ្ញាចែកចាយថ្នាំញៀន ម្នាក់ នៅក្នុងភូមិថ្កូវ ឃុំប្ញស្សីស្រុកខាងលិខ ស្រុកកំពង់ត្រាច ខេត្តកំពត ។
មន្ត្រីនគរបាលខេត្តបានឱ្យដឹងថា ជនសង្ស័យម្នាក់នោះ ឈ្មោះ សេង សៀងឡេង ភេទប្រុស អាយុ ៣០ឆ្នាំ រស់នៅភូមិភូមិថ្កូវ ឃុំប្ញស្សីស្រុកខាងលិខ ស្រុកកំពង់ត្រាច ។ វត្ថុតាងដែលសមត្ថកិច្ចរឹបអូសបានរួមមាន ៖ ថ្នាំញៀនប្រភេទ ម៉ាទឹកកក ៣០កញ្ចប់តូច និងទូរស័ព្ទដៃម៉ាណូគា អិនចុចពិល ២គ្រឿង ។
ប្រភពដដែលបានបន្តទៀតថា ជនសង្ស័យត្រូវកម្លាំងឃាត់ខ្លួន ខណៈពេកកំពុងដេកលើអង្រឹងនៅខាងក្រោយផ្ទះ ប្រជាពលរដ្ឋ រង់ចាំបក្ខពួកមកទទួលថ្នាំញៀន យកទៅលក់បន្ត ឬក៏ទិញយកទៅប្រើប្រាស់ ។ ប្រជាពលរដ្ឋនិយាយថា ជនសង្ស័យនេះ លក់ថ្នាំញៀនដូចលក់ត្រីអញ្ចឹងគ្មានខ្លាចសមត្ថកិច្ចបន្តិចណាសោះឡើយ ។
បច្ចុប្បន្ន ជនសង្ស័យត្រូវបាននាំខ្លួនមកសួរនៅស្នងការនគរបាលខេត្ត ដើម្បីកសាងសំណុំរឿងបញ្ជូនទៅតុលាការ ចាត់ការតាមនីតិវិធីច្បាប់ ៕
ហេង ដារ៉ា
