ជាក់ស្តែងជារៀងរាល់ថ្ងៃ ប្រជាពលរដ្ឋ និងអ្នកយកព័ត៌មានយើង តែងតែសង្កេតឃើញរថយន្តធំៗដឹកឈើពេញ កំពុងឡើងលើកថាស់ប្រមាណ ៤ម៉ែត្រ និងលានមកក្រោយប្រមាណ ១៥ម៉ែត្រ ព្រមទាំងបានយកតង់មកគ្របពីលើ ព្រោះខ្លាចគេឃើញ តែទោះបីខំគ្របយ៉ាងណាក៏វាមិនជិតដែរ នៅតែលានចេញឱ្យគេឃើញដដែល ។
ពួកគាត់បញ្ជាក់ទៀតថា ឱ្យតែពេលទាបភ្លឺ ម៉ោងប្រមាណចាប់ពី ២ ឮសន្ធឹកឡានងូងៗ គាត់ដេកមិនលក់គាត់ក៏ចេញ មកមើល ម៉ែអើយម៉ែៗបន្តកន្ទុយគ្នា រលាយហិនហោចអស់ហើយ ឈើក៏រលាយ ផ្លូវជាតិក៏រលាយដែរ ។ គាត់បន្ថែមថា មាន ថ្ងៃខ្លះចេញច្រើន គឺចាប់ពីម៉ោង ១០យប់ឡើងទៅ ឃើញមកហូរហែរហូតទល់ភ្លឺ តាមមើលមិនក្រោម ១០០ឡាន យីឌុប នោះទេ ។
ប្រជាពលរដ្ឋក្នុងស្រុកមេមត់ទាំងមូល សូមឱ្យអស់លោកគ្រប់បណ្តាខេត្តនីមួយៗ និងក្រសួងដែលពាក់ព័ន្ធជាពិសេស រដ្ឋបាលព្រៃឈើ តាំងពីថ្នាក់ក្រោមរហូតដល់លើ គឺដូចជា ទួក វត្ថ៉ា, ឯម សុគន្ធ, ងី វរៈ, អៀង សាវ៉េត, ឆេង គឹមស៊ុន, ទី សុគន្ធ និងលោក អ៊ុក រ៉ាប៊ុន ព្រមទាំងលោក ត្រាំង អ៊ីវតឹក រដ្ឋមន្ត្រីក្រសួងសាធារណការ ត្រូវតែទទួលខុសត្រូវចំពោះវិនាស សកម្មព្រៃឈើចុងក្រោយនេះ ។ រីឯផ្លូវជាតិក៏ត្រូវបំផ្លាញខ្ទេចហិនហោចដោយសារក្រុមឈ្មួញ និងជនឆ្លៀតឱកាសមួយក្តាប់ តូចដែលនៅឈរជើងនៅតាមបណ្តាខេត្ត ដែលពាក់ព័ន្ធនឹងការកាប់បំផ្លាញព្រៃឈើខាងលើនេះ ។ ជាពិសេសមានបុគ្គលខ្លះ យកប្រាក់ដែលបានមកពីជំនួញឈើទៅសូកប៉ាន់ថ្នាក់លើធ្វើជាប៉ូលិស, ប៉េអឹមថែមទៀតផង ។
បញ្ហានេះបានធ្វើឱ្យកងកម្លាំងប្រដាប់អាវុធគ្រប់ប្រភេទមានសតិអារម្មណ៍ ហើយរិះគន់ចំៗថា ពួកគាត់ចេះតែឆ្ងល់អ្នក ខ្លះជាឈ្មួញរកស៊ីកាប់ឈើរហូតសោះ តែមានបុណ្យស័ក្តិធំៗជាង ពួកគាត់ដែលខិតខំធ្វើការបំរើជាតិមាតុភូមិ ពិតប្រាកដទៅ ទៀត គឺមិនប៉ះពាល់ជាដាច់ខាតអ្វីដែលខុសច្បាប់ សុខចិត្តស៊ូទ្រាំរស់នៅសង្ឃឹមទៅលើតែប្រាក់ខែមួយមុខគត់ ដូច្នេះសូមថ្នាក់ ដឹកនាំពិនិត្យមើលបញ្ហានេះផង ព្រោះពួកដែលរកស៊ីល្មើសច្បាប់ ពេលដែលបានបុណ្យសក្តិពាក់ ដោយសារតែប្រាក់កខ្វក់រកស៊ី កាប់បំផ្លាញព្រៃឈើ ហើយដើរបរិហាកេរ្តិ៍ និយាយវ៉ៃប្រហារមកលើពួកគាត់ សុទ្ធតែថា “ខំប្រឹងតស៊ូបានប្រយោជន៍អី”ឱ្យតែ មានលុយចង់ពាក់ស័ក្តិប៉ុន្មាន ឬផ្កាយប៉ុន្មានក៏បានដែរ មិនបាច់ខំតស៊ូខ្មោចយស្អី ។
ជុំវិញនិងបញ្ហាខាងលើនេះ ប្រជាពលរដ្ឋនៅក្នុងស្រុកមេមត់ តំណាងឱ្យប្រជាពលរដ្ឋទូទាំងប្រទេសកម្ពុជាទាំងមូល សូមឱ្យថ្នាក់ដឹកនាំ និងក្រសួងពាក់ព័ន្ធ ត្រូវតែពិនិត្យមើលសកម្មភាពពួកឈ្មួញ ដែលសម្រុកដឹកឈើចេញពីក្នុងព្រៃដូចជា ច្រកអណ្តូងទឹក, ឃុំអូរគ្រូង, ច្រកផ្លូវរលួស ស្រែជិះ, ឃុំរលួសមានជ័យ,ច្រកផ្លូវតុងមិន ឃុំក្បាលដំរី ក្នុងស្រុកសំបូរ ខេត្ត ក្រចេះ និងច្រកភ្នំព្រេចថ្មី ឃុំស្វាយជ្រះ ស្រុកស្នួល ខេត្តក្រចេះ ។ សូមបញ្ជាក់ថា ច្រកភ្នំព្រេចថ្មីនេះ ឈើឈ្មួញកាប់យកមក ពីតំបន់ការពារភ្នំព្រេច, ជីវចម្រុះសីម៉ាដែនជម្រកសត្វព្រៃស្នួល… ៘ និងតំបន់ការពារផ្សេងៗទៀត ក្នុងខេត្តមណ្ឌលគីរី ជាពិសេសស្រុកកោះញែក និងស្រុកកែវសីមា ដែលមានឈ្មោះ ឃី ផេង មេបញ្ជាការរងទាហានស៊ុបខេត្តក្រចេះ និង បងប្អូនសាច់ញាតិគេជាច្រើននាក់ទៀត ដោយបានបង់ប្រាក់ក្នុងថៅកែម្នាក់ៗ ១៥០០០ដុល្លារ ទៅឱ្យជនឆ្លៀត ឱកាសដែលតាំងខ្លួន ជាសមត្ថកិច្ចឈរជើងក្នុងភូមិសាស្ត្រទឹកដីខេត្តមណ្ឌលគីរី ។ បន្ទាប់មកដាក់រថយន្តយីឌុប ឬវេអង យក្សៗឆ្លងដែនទៅលក់ឱ្យឈ្មួញក្នុងប្រទេសយួនតាមច្រកដារ ស្រុកមេមត់ មានឧកញ៉ាពីរនាក់ យក ១៤០០០ដុល្លារ ធានាដល់រលូន ។
សារព័ត៌មានយើងមិនអាចសុំការបំភ្លឺពីលោក ឃី ផេង មេបញ្ជាការរងទាហានស៊ុបខេត្តក្រចេះ បានទេ ? ដោយសារគ្មាន ទូរស័ព្ទដើម្បីទាក់ទងពីបញ្ហាខាងលើនេះ ៕
