ខេត្តសៀមរាប ៖ យ៉ាងហោចណាស់ក៏មានសិស្សវិទ្យាល័យគោកដូងប្រមាណជាង៣០នាក់ ក្នុងនោះមានប្រុសម្នាក់ បាននាំគ្នាឈឺក្បាលអង្គុយទ្រហោយយំតៗគ្នាពីមួយទៅមួយ សម្រាប់តែថ្នាក់ទី៩និងថ្នាក់ទី១១ ប៉ុណ្ណោះ ក្រៅពីនោះគ្មានអ្វីចំណែកទេ ខណៈពេលដែលនាំគ្នាចេញលេង ចេះតែនាំគ្នាទប់មុខស្រែកយំ ដោយមិនដឹងមូលហេតុ។
ក្នុងព្រឹត្តការណ៍ចម្លែកមិនធ្លាប់មានដែលសិស្សនាំគ្នាយំបន្តបន្ទាប់គ្នានេះកើតឡើងតាំងពីថ្ងៃទី១១ រហូតដល់រសៀលថ្ងៃទី១៥ ធ្នូ ២០១៥នេះ ស្ថិតនៅក្នុងវិទ្យល័យគោកដូង ភូមិគោកត្របែក ឃុំគោកដូង ស្រុកអង្គរជុំ ខេត្តសៀមរាប ខណៈសិស្សទាំងនោះចេះតែឈឺក្បាល។
ក្រុមប្រជាពលរដ្ឋ និងអាណាព្យាបាលសិស្សទាំងអស់បាននាំគ្នានិមន្តព្រះសង្ឃ សូត្រមន្តបង្សកូល ឱ្យនិងលោកអាចារ្យ រៀបចំបាយសម្លរ ដើម្បីសែនព្រេនដល់អារក្ស អ្នកតា នៅក្រោមដើមពោធិ៍ ក្រោយសាលារៀននេះសុំសេចក្តីសុខ និងសេចក្តីចម្រើន ព្រមទាំងសុំកុំឱ្យធ្វើបាបកូនក្មេងៗសិស្សសាលានៅវិទ្យាល័យគោកដូងនេះតទៅទៀត ពីព្រោះពួកគេបានរៀបចំឱ្យហូបបបូរហូហៀរហើយ ដូច្នេះនាំគ្នាដើរចេញពីទីនេះ ទៅនៅឱ្យឆ្ងាយពីសាលារៀននេះទៅ។
លោក សុខ ស៊ីផា អាយុ៣៦ឆ្នាំ ជានាយកសាលគោកដូងនេះ មានទីលំនៅភូមិ គោកភ្នៅ ឃុំគោកដូង ស្រុកអង្គរជុំ ខេត្តសៀមរាបបានរៀបរាប់ប្រាប់ថា ការដែលសិស្សរបស់គាត់មានសភាពបែបនេះ លោកពិបាកចិត្តណាស់ ដោយសារតាំងពីលោកមកធ្វើជានាយកសាលានេះមានរយៈពេលជាង៦ឆ្នាំមកហើយ ព្រមទាំងបានក្រុមអង្គការចាំបូទូរស៍ អូគីណាវ៉ាយុអ៊ិម៉ារឹ៣-៤ នៃប្រទេសជប៉ុន បានជួយឧបត្ថមកសាងសាលាអនុវិទ្យាល័យរហូតដល់វិទ្យាល័យគោកដូងនេះមកមានរយៈពេល៤ឆ្នាំ មិនដែលមានរឿងយ៉ាងដូច្នេះទេ ។
លោកបន្តថា ចាប់ផ្តើមតាំងពីថ្ងៃទី១១ ខែធ្នូនេះមានសិស្សដែលចេញលេងនាំគ្នាអង្គុយយំ ហើយសួរយ៉ាងណាក៏ប្រាប់ថា ចេះតែឈឺក្បាលនិងណែនដើមទ្រូងមិនឈប់សោះ ខណៈដែលពួកគេបានឃើញគ្នាយំក៏នាំគ្នាយំតៗគ្នារហូតមាន ជាង១០នាក់ រួចលោកក៏បានឲ្យគ្រូប្រចាំថ្នាក់ជួយដឹកយកទៅផ្ទះឲ្យឪពុកម្តាយគេ ។លោកបញ្ជាក់ទៀតថា នៅព្រឹកថ្ងៃទី១៥ខែធ្នូ នេះក៏ឃើញមានយំដូច្នេះទៀតរហូតដល់ទៅសរុបតែ២ថ្នាក់ គឺថ្នាក់ទី៩និងទី១១ ជាង៣៥នាក់ ទើបលោកសម្រេចចិត្តឲ្យពួកគេឈប់រៀនមួយរយៈសិន ដើម្បីឲ្យព្យាបាលឬរកគ្រូទស្សន៍ទាយមើល ឬក៏ឲ្យយកទៅពិនិត្យព្យាបាលនៅពេទ្យ ប៉ុន្តែលោកមិនមានជំនឿថា មានខ្មោច ព្រាយបីសាចស្អីគេនោះ គឺលោកហាក់ដូចជាមិនសូវជឿទាំងស្រុងនោះទេ ពីព្រោះ វាមិនធ្លាប់មាន។
ចំណែកលោកចាន់ រិទ្ធ អាយុ៤៦ឆ្នាំមុខរបរជាកសិកររស់នៅភូមិគោកត្របែក ឃុំគោកដូង ស្រុកអង្គរជុំនេះបានរៀបរាប់ប្រាប់ថា លោកជាអ្នករស់នៅជិតសាលានេះគឺបានឃើញសិស្សទាំងអស់នាំគ្នាអង្គុយបោចសក់ធាក់ដីយំបែបនេះ គឺលោកមិនដែលឃើញពីមុនមក តែរឿងថា មានខ្មោចចូលនោះ គឺលោកមិនជឿទេ ព្រោះតាំងពីលោករស់នៅទីនេះគ្មានឃើញខ្មោចព្រាយបីសាចស្អីមកលងមនុស្សឬធ្វើបាបនរណាម្នាក់សោះ ទើបតែប៉ុន្មានថ្ងៃនេះទេ ។
លោកបន្តថា ទាំងនេះគឺ ប្រហែលមានគេចង់សាកល្បងលេងសើចជាមួយលោកនាយកនេះហើយ មើលទៅ។ រីឯលោក អាចារ្យ និងលោកយាយ ដែលជាចាស់ទុំរស់នៅក្នុងភូមិគោកដូងនេះបាននិយាយប្រហាក់ប្រហែលគ្នាថា តាំងពីគាត់រស់នៅតាំងពីក្មេងមកដល់ចាស់ចង់ស្លាប់ទៅវិញហើយ មិនដែលឮថា មានខ្មោចអារក្ស អ្នកតាណាមកលលេងជាមួយអ្នកភូមិនេះទេ ទើបតែពេលនេះឃើញជាក់ស្តែង ពួកគេបានមកលេងសើចជាមួយកេ្មងៗ បែបនេះ គឺវាមិនសមទាល់តែសោះ ព្រោះអីសិស្សទាំងអស់នេះ មិនដែលព្រហើនទៅលេងសើចជាមួយខ្មោចបីសាចនោះទេ ។ លោកបានបន្តថា មុនគេមកលេងសើចជាមួយសិស្សនេះ គឹពួកគេចង់សាកល្បង ជាមួយនិងសិស្សពូកែម្នាក់ក្នុងចំណោមសិស្សទាំងអស់ដែលរៀននៅទីនេះ ។ លោកបញ្ជាក់ទៀតថា ក្រោយពីបានធ្វើឲ្យសិស្សពូកែម្នាក់នោះឈឺក្បាល ហើយឪពុកម្តាយរបស់សិស្សនោះបានយកទៅព្យាបាលនៅមន្ទីរពេទ្យ តែខាងពេទ្យបានប្រាប់ថា គ្មានរោគាអ្វីទេ។ទើបលោក បានសន្និដ្ឋានថា គឺមានខ្មោចបីសាចពិតប្រាកដមែននៅខាងក្រោយសាលារៀននេះ ប្រហែលជាមានគេបញ្ជាមកហើយ ទើបធ្វើដូច្នេះ។លោកបានបញ្ជាក់បន្ថែមថា ដោយសាររឿងខ្មោចព្រាយបីសាចនេះហើយ ទើបឪពុកម្តាយ បានទៅអញ្ជើញឲ្យពួកគាត់មកធ្វើពិធីសែនព្រេនបាយសម្លរឲ្យអារុកអារក្សអ្នកតា ខ្មោចបីសាចទាំងនេះ បានស៊ី កុំឲ្យធ្វើបាចក្មេងៗសិស្សសាលាកំពុងរៀននៅទីនេះតទៅទៀត ដើម្បីឲ្យពួកគេបានរៀនសូត្រកុំឲ្យមានរឿងដូចថ្ងៃនេះទៀត ។ បើធ្វើហើយពួកគេនៅតែប្រព្រឹត្តអំពើបែបនេះទៀត លោក និងនិមន្តព្រះសង្ឃចំនួន៨អង្គព័ទ្ធសីម៉ា ជុំវិញសាលារៀនគោកដូងនេះ ដើម្បីធ្វើពិធីប្រដេញពួកព្រាយបីសាចទាំងនេះចេញឲ្យអស់កុំឲ្យពួកវាធ្វើបាចដល់សិស្សសាលានេះតទៅទៀត៕
ដោយ(លុច ណាម)សៀមរាប
