រតនគិរី ៖ លោកទីន សុវណ្ណនី ប្រធានពន្ធនាគារខេត្តរតនគិរីបានបដិសេធន៍នូវស្នាមមេដៃបណ្តឹងរបស់មន្ត្រីពន្ធនាគារចំនួន៣២នាក់ និងទណ្ឌិតស្ត្រីម្នាក់ពីបទរួមរ័ក្សចំនួន៣លើកព្រមទាំងពីបទយកពន្ធនាគារធ្វើអាជីវកម្មផ្ទាល់ខ្លួនបញ្ជេញអ្នកទោសទៅក្រៅបរិវេណពន្ធនាគារតាមតែអំពើចិត្តដើម្បីបំរើផលប្រយោជន៍ផ្ទាល់ខ្លួននោះទេ។
ក្រោយពីបានដឹងមន្ត្រីពន្ធនាគារ៣២នាក់ផ្តិតមេដៃប្តឹងទៅថ្នាក់ដឹកនាំអគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃកាលពីថ្ងៃទី០៦ ខែធ្នូ ឆ្នាំ២០១៥ កន្លងទៅដោយប្តឹងលោកទីន សុវណ្ណនី ពីបទយកពន្ធនាគារធ្វើអាជីវកម្មផ្ទាល់ខ្លួននិងលួងលោមទណ្ឌិតស្ត្រីម្នាក់ឈ្មោះទីង ប៉េក យកទៅរួមរ័ក្សនៅផ្ទះបានសម្រេចចំនួន៣លើក។ លោកទីន សុវណ្ណនី ប្រធានពន្ធនាគារខេត្តរតនគិរីបានផ្តល់បទសម្ភាសជាមួយអ្នកយកពត៌មាននៅព្រឹកថ្ងៃទី១៤ ខែធ្នូ នេះថា ករណីខាងលើនេះកើតមានឡើងគ្រាដែលក្រុមគ្រួសាររបស់លោកមានធុរៈរៀបអាពាហ៍ពិពាហ៍កូនស្រីដូច្នេះគាត់បានប្រគល់ភារកិច្ចអោយលោកស្រីឆោមស្រី ពេជ្រ អនុប្រធាន(ស្តីទី)ពន្ធនាគារទទួលខុសត្រូវក្នុងអង្គភាព។
លោកថា ខណៈដែលគាត់ប្រគល់ភារកិច្ចជូនលោកស្រីឆោម ស្រីពេជ្រ នោះជាឱកាសល្អសម្រាប់មន្ត្រីក្រោមឱវាទរបស់លោកមួយចំនួនដែលមិនសូវគោរពតួនាទីការងារក្នុងអង្គភាព ពោលគឺច្រើនអត្តវត្តមានដោយកន្លងមករូបគាត់ធ្លាប់ហៅមន្ត្រីដែលអសកម្មទាំងនោះមកធ្វើការណែនាំម្តង ជាពីរដងហើយតែមិនស្តាប់បង្គាប់ ដោយមានចិត្តថ្នាំងថ្នាក់ថាដាក់ពិន័យតឹងរឹងក៏កើតជាគំនិតគុំគួនតែម្តងជាមួយនឹង លោកទីន សុវណ្ណនី។លោកបន្តថាករណីឈានដល់នាំគ្នាផ្តិតមេដៃពីមន្ត្រីក្រោមឱវាទរបស់លោកចំនួន៣២នាក់ និងករណីចោទប្រកាន់លួងលោមទណ្ឌិតឈ្មោះ ទីង ប៉េក រួមរ័ក្សចំនួន៣ដងខាងលើនេះគឺផ្តើមចេញពីលោកស្រី ឆោម ស្រីពេជ្រ ដោយកន្លងមកអនុប្រធានពន្ធនាគាររូបនោះធ្វើការមិនស៊ីសង្វាក់ជាមួយថ្នាក់ដឹកនាំអង្គភាព។
ដោយឡែក ទណ្ឌិតស្ត្រីឈ្មោះ ទីង ប៉េក បានឆ្លើយបំភ្លឺថា លោក ទីន សុវណ្ណនី មិនបានរួមរ័ក្សចំនួន៣លើកដូចក្នុងពាក្យខាងលើនោះទេ ។ ដោយមានកំណត់ហេតុសួរចម្លើយពីលោកឡេន ស៊ាងលី មន្ត្រីសួរចម្លើយកាលពីវេលាម៉ោង៣និង០៥នាទី ថ្ងៃទី១២ ខែធ្នូ ឆ្នាំ២០១៥ កន្លងទៅ ដោយស្ត្រីទណ្ឌិតឈ្មោះទីង ប៉េក ផ្តិតមេដៃទទួលខុសត្រូវចំពោះមុខច្បាប់។
សូមបញ្ជាក់ថា ក្រោយពីសារពត៌មានចុះផ្សារនាពេលកន្លងមកនៅថ្ងៃទី១៤ ខែធ្នូ ឆ្នាំ២០១៥ វេលាម៉ោង៨ព្រឹកនេះ ក៏មានវត្តមានឯកឧត្តមគឹម សារិន អគ្គនាយករងពន្ធនាគារក្រសួងមហាផ្ទៃចុះមកដល់កន្លែងពន្ធនាគារខេត្តរតនគិរីដើម្បីពិនិត្យស្ថានភាពជាក់ស្តែង និងបានហៅមន្ត្រីទាំង៣២នាក់ដែលផ្តិតមេដៃប្តឹងទីន សុវណ្ណនីប្រធានពន្ធនាគារខេត្តរតនគិរី មកសាកសួរម្នាក់ម្តងៗដើម្បីអោយដឹងការពិត រហូតមកដល់ពេលនេះការសាកសួរនេះមិនទាន់ដឹងនៅឡើយទេ រងចាំលេខក្រោយបន្តទៀត៕
ណាត ពៅ
