ខេត្តសៀមរាប ៖ សាលាបឋមសិក្សាខ្នារចាស់ ភូមិខ្នារចាស់ សង្កាត់ជ្រាវ ក្រុងសៀមរាប បានទទួលកិត្តិយសដោយអង្គការ( Room To Read) ជ្រើសរើសយកធ្វើជាទីតាំងប្រារព្ធពិធីអបអរសាទរសាទរ ដែលកុមារគម្រប់ចំនួន១០លាន នាក់ នៃបណ្តាប្រទេសចំនួន១០ បានទទួលអត្ថប្រយោជន៍ដោយការអនុវត្តគម្រោងរបស់ខ្លួន តាមកម្មវិធីចំនួន២ គឺបំណិន និង ការទម្លាប់អានសៀវភៅ ។ ក្នុងពិធីនេះ អាជ្ញាធរមូលដ្ឋាននិងស្ថាប័នដែលពាក់ព័ន្ធបានចូលរួម ! ជាមួយនោះសហស្ថាបនិក នៃអង្គការ Room To Read ទាំង៣រូប ( លោក John Wood ) លោក( Erim Gumzu ) និងលោកស្រី( Denesh Shestra ) ក៏មានវត្តមានផ្ទាល់ ក្នុងពិធីនោះផងដែរ ហើយភ្ញៀវកិត្តិយស ដែលបានចូលរួមជាមួយគ្នានោះ គឺជាអ្នកដែលបានចូលរួមសកម្មភាពទាំងកម្លាំងកាយចិត្ត
និងថវិកាជាមួយ( Room To Read) ។
លោក ឡេ ឆុំ នាយកសាលាបឋមសិក្សាខ្នារចាស់ បានធ្វើរបាយការណ៍ថា ៖ សាលាបឋមសិក្សាខ្នារចាស់ ជាផ្នែកមួយក្នុងចំណោមសាលានៃ១០ប្រទេស ដែលទទួលបានសមិទ្ធផលពីអង្គការ Room To read ហើយ សិស្សានុសិស្សនៃសាលាបឋមសិក្សាខ្នារ ក៏ជាផ្នែកមួយតូចក្នុងចំណោមកុមារ១០លាននាក់ ដែលទទួលបាន អត្ថប្រយោជន៍ពីគម្រោងរបស់អង្គការ Room To Read ។ លោកនាយកបានឲ្យដឹងថា! ឆ្នាំ ២០០៩ អង្គការ Room To Read បានកសាងបណ្ណាល័យ១ឲ្យសាលាបឋមសិក្សាខ្នារចាស់ ហើយនៅក្នុងឆ្នាំ២០១២ អង្គការ Room To Read បានជួយបំប៉នបំណិនអាន និងបំណិនសរសេរ ដល់លោកគ្រូ អ្នកគ្រូ ។ ឆ្នាំ២០១៤ Room To Read បានជួយកសាងអាគារសិក្សា១ខ្នងទៀត ស្មើនឹង៣បន្ទប់ ។
សហស្ថាបនិកអង្គការ Room To Read បានឲ្យដឹងថា ! Room To Read ពិតជារីករាយខ្លាំងណាស់ ដោយថ្ងៃទី១៣ ខែវិច្ឆិកានេះ បានប្រារព្ធពិធីអបអរចំពោះកុមារគម្រប់ ១០លាន បានទទួលទទួលអត្ថប្រយោជន៍ ពីកម្មវិធីរបស់ Room To Read ។ សហស្ថាបនិកទាំងនោះ បានបង្ហាញឲ្យដឹងថា សព្វថ្ងៃនេះ Room To Read កំពុងអនុវត្តកិច្ចរបស់ខ្លួននៅក្នុង១០ប្រទេស រួមមាននៅបណ្តាប្រទេសក្នុងតំបន់អាស៊ីអាគ្នេយ៍ អាស៊ីខាងត្បូង និងនៅអាហ្វិក ។ Room To Read បង្កើតឡើងនៅក្នុងឆ្នាំ២០០២ ! នៅក្នុងប្រទេសកម្ពុជា មានគោលដៅចំនួន៥ខេត្ត ដែល Room To Read កំពុងបំពេញបេសកកម្មរបស់ខ្លួន ( ព្រៃវែង ត្បូងឃ្មុំ កំពង់ចាម កំពង់ធំ និងខេត្តសៀមរាប ) ហើយនៅក្នុងឆ្នាំ២០១៦ នឹងពង្រីកទៅខេត្តបន្ទាយមានជ័យ ។
សហស្ថាបនិក Room To Read បានពន្យល់ឲ្យដឹងថា កម្មវិធីដែលកុមារគម្រប់១០លាននាក់ ត្រូវបាន ទទួលអត្ថប្រយោជន៍នោះគឺការអានសៀវភៅ គឺ បំណិន ដែលជាផ្នែកទី១នៃកម្មវិធី ។ ផ្នែកបំណិននេះ គឺការ រៀបចំកម្មវិធីសិក្សា ធ្វើយ៉ាងណាឲ្យកុមារថ្នាក់ទី១ និង ថ្នាក់ទី២ ចេះអាន ហើយដើម្បីឲ្យកុមារចេះអានសៀវភៅ គឺត្រូវតែមានទម្លាប់អានការធ្វើឲ្យមានទម្លាប់អានសៀវភៅនេះ គឺជាផ្នែកទី២នៃកម្មវិធី ។ ជោគជ័យនៃផ្នែកនេះ គឺយើងត្រូវបង្កើតឲ្យមានបណ្ណាល័យ ។ លោកបន្តថា មកដល់ពេលនេះ យើងមានបណ្ណាល័យចំនួន( ១ ៨០០) បណ្ណាល័យហើយ ហើយបានបោះពុម្ពសៀវភៅជាភាសាខ្មែរ បានចំនួន (២០០)ចំណងជើងថ្មី ស្មើនឹង២ លានក្បាល ចែកចាយនៅតាមបណ្តាសាលារៀន ៕
ដោយ (លុចណាម) ( សៀមរាប )
