ជារៀងរាល់ថ្ងៃ ប្រជាពលរដ្ឋក្នុងស្រុកមេមត់ ខេត្តត្បូងឃ្មុំ នាំគ្នាឆ្ងល់ថា តើមន្ត្រីជំនាញ និងសមត្ថកិច្ចពាក់ព័ន្ធក្នុងស្រុក មេមត់ និងខេត្តត្បូងឃ្មុំបានដឹងដែរឬទេ ? ហើយបានរាយការណ៍ទៅថ្នាក់លើដែរឬទេ ?
ជាក់ស្តែងនៅម៉ោងប្រមាណ ១០ព្រឹក ថ្ងៃទី ០៩ ខែធ្នូ ឆ្នាំ២០១៥ មានរថយន្តយីឌុបដឹកឈើលេខ ១ ប្រភេទឈើក្រំ ចូលតាមច្រកដារ ហៅដូង៧ដើម ឆ្លងដែនទៅប្រទេសវៀតណាមយ៉ាងរំភើយ ពុំមានមន្ត្រីជំនាញណា ឬសមត្ថកិច្ចធ្វើការត្រួត ពិនិត្យនោះទេ ជាពិសេសសមត្ថកិច្ចច្រកព្រំដែននេះតែម្តង គឺបើកប៉ារាស់ចំហរទុកតែម្តង ។
ជុំវិញបញ្ហានេះ ប្រជាពលរដ្ឋតែងតែនិយាយថា ឃើញរថយន្តធំៗយក្សៗដូចជា អាវេអង អាយីឌុបភ្លៅប្រាំ ដឹកឈើបន្ត កន្ទុយគ្នា គាត់បន្ថែមថា ឱ្យតែម៉ោងប្រមាណជា ២,៣,៤ទាបភ្លមឺកបន្តគ្នារដឹកឡើងទួលមិនចង់រួចឆ្លងកាត់ស្រុកមេមត់ សំដៅ ច្រកកាច់ចូលព្រំដែនឆ្លងទៅប្រទេសវៀតណាម តាមច្រកដូនរ័ត្ន និងច្រកដារ ។ បន្ទាប់ពីទទួលព័ត៌មានដូចខាងលើ អ្នកយក ព័ត៌មានយើងក៏បានចុះទៅតាមដាន គឺបានឃើញជកា់ស្តែងដូចដែលប្រជាពលរដ្ឋបានរាយការណ៍ពិតប្រាកដមែន ហើយឈើ ទាំងនោះពួកឈ្មួញដឹកយកមកពីច្រកអណ្តូងទឹក ឃុំអូរគ្រៀង, ច្រកផ្លូវតុងមិន ឃុំក្បាលដំរី និងច្រកភ្នំព្រេចថ្មី ឃុំស្វាយជ្រះ ស្ថិតក្នុងស្រុកសំបូរ និងស្រុកស្នួល ខេត្តក្រចេះ ហើួឈើទាំងនេះពួកឈ្មួញបានកាប់មកពីក្នុងព្រៃអភិរក្សភ្នំព្រេច, ជីវចម្រុះ សីមា គឺភាគច្រើនកាប់ឈើក្នុងដែនជម្រក និងព្រៃការពារនានាក្នុងខេត្តក្រចេះ និងមណ្ឌលគីរី ប្រមូលដោយកេណ្ឌ ប្រជាពលរដ្ឋ និងឈ្មួញដែរ មានឡានបង្កុងឱ្យចូលកាប់ និងដឹកជញ្ជូនប្រមូលដាក់តាមឃ្លាំង ឬដេប៉ូក្នុងរង្វង់ដីសម្បទានសេដ្ឋកិច្ចដែលរាជរដ្ឋាភិបាលបានប្រគល់ឱ្យ ។
ក្នុងការធ្វើសកម្មភាពដឹកជញ្ជូនពួកឈ្មួញបានប្រើឈ្មោះឧកញ៉ា ទ្រី ភាព, ឧកញ៉ា ប៊ុន ថៃ, ឧកញ៉ា លឹម ប៊ុនណា, ឧកញ៉ា ស៊ឹង សំអុល និងលោក សាន ចយ ជាដើម តែលោកឧកញ៉ា ទ្រី ភាព ធ្លាប់អំពាវនាវឱ្យមន្ត្រីជំនាញ និងសមត្ថកិច្ចពាក់ ព័ន្ធរួមទាំងអាជ្ញាធរដែនដីជួយទប់ស្កាត់ផង ព្រោះគាត់ទទួលខុសត្រូវតែអ្វីដែលត្រឹមត្រូវតាមច្បាប់នោះទេ ។
បើតាមប្រភពព័ត៌មានបានឱ្យដឹងថា ក្នុង១យីឌុប ភ្លៅប្រាំ ឈ្មួញបានបង់ ១៤០០០ដុល្លារ ទៅឱ្យមន្ត្រីជំនាញ និងសមត្ថកិច្ចពាក់ព័ន្ធដែលមានភារកិច្ចចុះមកឈរជើងក្នុងស្រុកមេមត់ រួមទាំងអាជ្ញាធរស្រុក-ខេត្តត្បូងឃ្មុំផងដែរ ឈ្នួលឡាន ១០០០ដុល្លារ, ឈ្មួញឡានស្ទូច ៤០០ដុល្លារ និងប៉ូវតៃកុង ១០០ដុល្លារ ដាក់ម៉ាសេរី ហើយថ្លៃឈើ ១ម៉ែត្រគីប តម្លៃ ២០០ដុល្លារ (ក្នុងព្រៃ)ក្នុង១ឡាន ៤៥ម៉ែត្រគីប ទៅ ៥០ម៉ែត្រគីប (ឈើ១ម៉ែត្រគីប គុណនឹង ១៥០០គីឡូ ) ដូច្នេះក្នុង ១យីឌុបភ្លៅ ៥ ឬវេអង ទម្ងន់សរុបទាំងរថយន្ត និងឈើមាន ៩០ ទៅ ១០០តោន ឯណោះ ។
ជុំវិញ នឹងបញ្ហាខាងលើនេះ ប្រជាពលរដ្ឋសូមសំណូមពរទៅ ៖ លោក សូយ សារិទ្ធ, លោក អៀង សាវ៉េត អនុប្រធានទទួលបន្ទុកព្រៃឈើ, លោក ឆេង គឹមស៊ុន ប្រតិភូរាជរដ្ឋាភិបាលទទួលបន្ទុកព្រៃឈើទូទាំងប្រទេស, លោក ទី សុគន្ធ រដ្ឋលេខាធិការក្រសួងកសិកម្មរុក្ខាប្រមាញ់ និងនេសាទ, លោក អ៊ុក រ៉ាប៊ុន រដ្ឋមន្ត្រី ក្រសួងកសិកម្មរុក្ខាប្រមាញ់ និងនេសាទ, លោក អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ, លោក ឱម យ៉ិនទៀង អង្គភាពប្រឆាំងអំពើពុករលួយ និងសម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ សូមអស់លោកចុះពិនិត្យមើលទៅអ្នកណាចេញច្បាប់ឱ្យ ៕
ដោយ ៖ ឆរ លីហៀង ត្បូងឃ្មុំ
