ខេត្តបន្ទាយមានជ័យ ៖ ផ្លូវលំ១ខ្សែរ ជិត១០គីឡូម៉ែត្រនៅក្នុងក្រុងសិរីសោភ័ណដែលខូចដោយសារទឹកជំនន់ ត្រូវបានលោកលីសារីអភិបាលរងខេត្តបន្ទាយមានជ័យដឹកនាំមន្ត្រីជំនាញចុះសិក្សាជួសជុល កាលពីព្រឹកថ្ងៃទី៧ ខែធ្នូ ឆ្នាំ ២០១៥ ។
លោក លី សារី អភិបាលរងខេត្តបន្ទាយមានជ័យបានប្រាប់ថា ផ្លូវមួយខ្សែដែលមានប្រវែងជិត១០គីឡូម៉ែត្រដែលតភ្ជាប់ផ្លូវជាតិលេខ៥ត្រង់ចំណុច ភូមិក្បាលស្ពាន សង្កាត់ព្រះពន្លា ឆ្លងកាត់សង្កាត់អូរអំបិលដល់សង្កាត់ទឹកថ្លា ក្រុងសិរីសោភ័ណបន្ទាយមានជ័យ គឺផ្លូវជាយក្រុងសិរីសោភ័ណក្នុងខេត្តបន្ទាយមានជ័យដែលរងការខូចខាតយ៉ាងធ្ងន់ធ្ងរដោយសារទឹកជំនន់រយៈពេលកន្លងមកដែលប្រជាពលរដ្ឋឆ្លងកាត់ និងប្រមូលកសិផលជួបការលំបាក់យ៉ាងខ្លាំងក្នុងការធ្វើដំណើរទៅមក។
លោក លី សារី បានបញ្ជាក់ទៀតថា ដោយឃើញការលំបាករបស់ប្រជាពលរដ្ឋក្នុងការធ្វើដំណើរ និងការដឹកកសិផលយកទៅលក់នៅឯផ្សារនោះ លោកបានធ្វើការកៀងគងរកសប្បុរសជនក្នុងស្រុក ហើយក៏មាននៅក្រៅស្រុកបានថវិកាមួយចំនួននិងធ្វើការបដិភាគចូលរួមជាមួយប្រជាពលរដ្ឋនៅទីនោះបានសម្រួលជួសជុលផ្លូវមួយខ្សែដែលមានប្រវែងជិត១០គីឡូម៉ែត្រនេះនៅថ្ងៃទី ១០ ខែធ្នូ ឆ្នាំ២០១៥ ខាងមុខនេះដើម្បីឲ្យប្រជាពលរដ្ឋធ្វើចរាចរណ៍និងដឹកកសិផលទៅមកឲ្យបានស្រួលកុំឲ្យពិបាកដូចឆ្នាំមុនៗទៀត ៕
