មណ្ឌលគិរី ៖ នៅរសៀលថ្ងៃនៅទី ០៤ ខែធ្នូឆ្នាំ២០១៥នេះ នៅខណ្ឌរដ្ឋបាលព្រៃឈើមណ្ឌលគិរី បានបើកសិក្ខាសាលាស្តីពី ការបង្កើតគណៈកម្មការសម្របសម្រួលកម្មវិធីសហគមន៍ព្រៃឈើថ្នាក់ខេត្ត ។
ពិធីនេះប្រព្រឹត្តទៅក្រោមអធិបបតីភាព លោក ចឹង សុចន្ថា អភិបាលរងខេត្តមណ្ឌលគិរី លោក ឡុង រត្តនៈកុមារ អនុប្រធាននាយកដ្ឋានព្រៃឈើ និងសហគមន៍ព្រៃឈើ លោក ព្រំ សុវណ្ណា នាយរងខណ្ឌរដ្ឋបានព្រៃឈើមណ្ឌលគិរី។
លោក ព្រំ សុវណ្ណា នាយរងខណ្ឌរដ្ឋបានព្រៃឈើមណ្ឌលគិរី បានឲ្យដឹងថា សហគមន៍ព្រៃឈើក្នុងខេត្តមណ្ឌលគិរី មានចំនួន១៩សហគមន៍កំពុងដំណើរការ ដោយគ្រប់ដណ្តបលើផ្ទៃដីទំហំ ៥៧.៤៤១,៥៨ហិកតា ដែលស្ថិតនៅក្នុងស្រុកចំនួន៤ និងក្រុង១ក្នុងនោះរួមមានស្រុកពេជ្រាដា ស្រុកកោះញែក ស្រុកកែវសីមា ស្រុកអូររាំង និងក្រុងសែនមនោរម្យ ហើយនៅក្នុងក្រុងស្រុកទាំងប្រាំនេះផងដែរ មានឃុំចំនួន១០ឃុំ ដែលមានប្រជាពលរដ្ឋចូលរួមជាសមាជិកចំនួន៣.១៨០គ្រួសារ ស្មើនិង១១.៣៥០នាក់ ក្នុងនោះមានស្ត្រីចំនួន៦.១៣៦នាក់ ។
នៅក្នុងកម្មវិធីបើកអង្គសិក្ខាសាលានោះដែរ លោក ចឹងសុចន្ថា អភិបាលរងខេត្ត បានមានប្រសាសន៍ថា ការគ្រប់គ្រងព្រៃឈើបែបសហគមន៍នេះ បានចាប់ផ្តើមតាំងពីពាក់កណ្តាលទស្សវត្សវ៍ឆ្នាំ១៩៩០មកម្លេះ តាមរយះគម្រោងសាកល្បងដោយមានការគាំទ្រ ពីរាជរដ្ឋាភិបាលកម្ពុជា អង្គការសង្គមស៊ីវិលជាតិ និងអន្តរជាតិ ។ លោកបានបន្តទៀតថា ការរៀបចំអង្គសិក្ខាសាលានាថ្ងៃនេះ ក្នុងគោលបំណងឲ្យគណៈកម្មការសម្របសម្រួលកម្មវិធីសហគមន៍ព្រៃឈើថ្នាក់ខេត្ត ដែលទើបបង្កើត ត្រូវចេះចែករំលែកនូវព័ត៌មានរវាងគ្នាទៅវិញទៅមកអំពីសហគមន៍ព្រៃឈើ និងការគ្រប់គ្រងព្រៃឈើ ការបង្កើនកិច្ចសហប្រតិបត្តិការរវាងរដ្ឋបាលព្រៃឈើ ដៃគូអភិវឌ្ឍ និងអ្នកពាក់ព័ន្ធក្នុងខេត្ត ក្នុងគោលបំណងឲ្យអ្នកពាក់ព័ន្ធដឹងអំពីប្រតិបត្តិការងារ(TOR) របស់គណៈកម្មការសម្របសម្រួលកម្មវិធីសហគមន៍ព្រៃឈើថ្នាក់ខេត្តផងដែរ ៕
