លោក មាគ វុឌ្ឋី ប្រធានគម្រោងអភិរក្សជីវចម្រុះសីមា នឹងលោកវរសេនីយ៏ទោ ស្វាយ សុវណ្ណា មេបញ្ជាការក្តាប់រួមកងរាជអាវុធហត្ថលើផ្ទៃប្រទេសប្រចាំនៅតំបន់អភិរក្ស បានដឹកនាំកម្លាំងចុះប្រតិបត្តិការបង្ក្រាបជំនួញឈើខុសច្បាប់ ក្នុងរយៈពេលពីរថ្ងៃក្នុងតំបន់អភិរក្សជីវចម្រុះសីមា បានឈើប្រណិតនឹងឈើលេខមួយរាប់សិបកំណាត់ រួមនឹងរថយន្តចំនួន៤គ្រឿង ។ ប្រតិបត្តិការប្រឆាំងការជួញដូរឈើខុសច្បាប់នេះបានចាប់ផ្តើមពីថ្ងៃទី២៨-២៩ វិច្ឆិកា ២០១៥។
លោកវរសេនីយ៏ទោ ស្វាយ សុវណ្ណា បានឲ្យដឹងថា ការចាប់បង្ក្រាបបទកល្មើសព្រៃឈើនេះ គឺបានធ្វើឡើងនៅលើគោលដៅពីដាច់ដោយឡែកពីគ្នា។ដែលករណីទីមួយនៅថ្ងៃទី២៨ កម្លាំងជំនាញនឹងកម្លាំងសហការ បានចាប់ឃាត់រថយន្តប្រភេទសាំយ៉ុងកែច្នៃទ្រុងមួយគ្រឿង នៅចំនុចភូមិឆ្នែង ឃុំ ស្រែខ្ទុម ស្រុកកែវសីមា ហើយរឹបអូសបានឈើហ៊ុបប្រភេទសុក្រំ ពេញមួយទ្រុងរថយន្ត។ករណីទីពីរនៅថ្ងៃទី២៩ កម្លាំងជំនាញនឹងកម្លាំងសហការ ចាប់បានរថយន្តដឹកឈើធ្នង់ ចំនួន៣គ្រឿង ក្នុងនោះមាន ម៉ាកកាមរីគូទស្វិត ម៉ាក ឡង់គ្រីស័រ នឹងម៉ាក ទុនត្រា ។ការចាប់បង្ក្រាបករណីទីពីរនេះនៅចំណុចរកាថ្មី ភូមិរកា ឃុំសែនមនោរម្យ ស្រុកអូររាំង។
លោកវរសេនីយ៏ទោ ស្វាយ សុវណ្ណា បានបន្តឲ្យដឹងថា ការបង្ក្រាបការរត់ព័ន្ឋឈើប្រណិតចេញទៅប្រទេសវៀតណាមនេះ មន្ត្រីជំនាញរួមនឹងកម្លាំងអាវុធហត្ថបាន ខិតខំទាំងយប់ទាំងថ្ងៃដើម្បីប្រមាញ់តាមចាប់ ក្រុមជនឈ្មួញដែលបានប្រើប្រាស់ស្ទើរគ្រប់រូបភាពដើម្បីបន្លំសមត្ថកិច្ច ។ តែទោះជាយ៉ាងណាក៏ដោយ បន្ទាប់ពីធ្វើការស្រាវជ្រាវអស់ រយៈពេលប្រមាណ៤ទៅ៥ថ្ងៃ សមត្ថកិច្ចក៏បានកំណត់មុខសញ្ញារថយន្តដឹកឈើល្មើសច្បាប់ នឹងបន្តចាប់បង្ក្រាបបានដោយជោគជ័យ ។
ក្រោយចាប់បង្ក្រាបបានឈើនឹងរថយន្តល្មើសច្បាប់ សមត្ថកិច្ចបានយកវត្ថុតាងទាំងនោះទៅរក្សាទុកនៅ ស្នាក់ការអភិរក្សជីវចម្រុះសីមា ដើម្បីចាត់ការតាមផ្លូវច្បាប់។
ប្រភពពីប្រជាពលរដ្ឋនៅស្រុកកែវសីមាបានឲ្យដឹងថា ការចាប់បង្ក្រាបរថយន្តដឹកនេះនេះ ពួកគាត់សប្បាយចិត្តណាស់ ព្រោះរាល់ថ្ងៃនេះ ពួកគាត់បារម្ភពីសុវត្ថិភាពតាមដងផ្លូវណាស់ ត្បិតអីក្រុមដឹកឈើទាំងនោះ បើកបររថយន្តប្រដេញគ្នាលឿនៗ ហើយក៏តែងជួបគ្រោះថ្នាក់ជារឿយៗផងដែរ។
ប្រភពពីសមត្ថកិច្ចតាមដងផ្លូវមួយចំនួនក៏បានបង្ហើបឲ្យដឹងផងដែរថា រថយន្តដែលក្រុមអភិរក្សជីវចម្រុះសីមាចាប់បាននោះ ជារថយន្ត(រថយន្តម៉ាកទុនត្រា)របស់ លោក សូ សុវណ្ណធី មេបញ្ជាការរងអាវុធហត្ថស្រុកកែវសីមា ហើយគាត់តែងដឹកឈើជារៀងរាល់ថ្ងៃ ដោយក្នុងមួយថ្ងៃមិនតិចជាង៥គ្រឿងឡើយ ។ ដោយឡែក លោក សូ សុវណ្ណធី សារព័ត៌មានមិនអាចសុំការបំភ្លឺបានឡើយ ព្រោះទូរស័ព្ទរបស់បានបិទ ៕
