ខេត្តរតនគិរី ៖ នាយខណ្ឌរដ្ឋបាលព្រៃឈើចំនួន២រូបត្រូវបានផ្ទេរតំណែងខណៈពេលដែលសកម្មភាពរត់ពន្ធឈើគ្រប់ប្រភេទកំពុងមានការកើនឡើងបន្តិចម្តងៗ នៅតាមបណ្តាខេត្តមួយចំនួន។
លោក វង សុក្រសិរី នាយខណ្ឌរដ្ឋបាលព្រៃឈើខេត្តរតនគិរីត្រូវបានប្តូរទៅជានាយខណ្ឌរដ្ឋបាលព្រៃឈើខេត្តមណ្ឌលគិរី ហើយលោកកែប កត់ នាយខណ្ឌរដ្ឋបាលព្រៃឈើមណ្ឌគិរីត្រូវប្តូរមកខេត្តរតនគិរីវិញ។ ពិធីប្តូរនេះបានធ្វើឡើងនៅវេលាម៉ោង២រសៀលថ្ងៃទី០១ ខែធ្នូ ឆ្នាំ២០១៥។
លោក ថង សាវុន អភិបាលខេត្តរតនគិរីបានចាត់ទុកថា ការផ្ទេរតំណែងមន្ត្រីរាជការថាមិនប្លែកទេ ប៉ុន្តែលោកចាត់ទុកថាសំរាប់អ្នកសារពត៌មានគឺជាមន្ត្រីបញ្ញើក្អែក បើគេដាក់ត្រង់ណាគឺនៅកន្លែងនោះហើយ។ លោកមានប្រសាសន៍ថា “កម្លាំងរដ្ឋបាលព្រៃឈើក៏ដូចជាកម្លាំងប្រដាប់អាវុធដែលមានតិចតួច វាពិតជាមានការលំបាកក្នុងការគ្រប់គ្រងលើវិសាលភាពខេត្តរតនគិរីនេះ”។
ចំណែកលោកអ៊ុង សំអាត អនុប្រធានផ្ទេរភារកិច្ចនេះគឺឆ្លុះបញ្ចាំងពីយុទ្ធសាស្ត្រគោល លើកំណែទំរងគ្រប់គ្រងវិស័យព្រៃឈើឆ្ពោះសំដៅធានាបានថេរភាពធនធាន។ លោកបន្តថា “បទពិសោធន៍ក្នុងការគ្រប់គ្រងកន្លងមកបង្ហាញថាថ្នាក់ដឹកនាំជួបប្រទះឆ្លងកាត់ព្រឹត្តិការណ៍ថ្មីច្រើន ពិតជាជួយបង្កើននូវចំណេះដឹងបន្ថែមក្នុងការដោះស្រាយបញ្ហា”។
មជ្ឈដ្ឋានទូរទៅបានលើកឡើងថា សូម្បីតែសម្តេចអគ្គមហាសេនាបតីតេជោហ៊ុន សែន ក៏មិនដែលមានប្រសាសន៍ចាត់ទុកអ្នកសារព័ត៌មានជាមន្ត្រីបញ្ញើរក្អែកដូចលោកអភិបាលខេត្តវ័យក្មេងនោះទេ៕
ជីវ៉ា
