ស្វាយរៀង ៖ នៅព្រឹកថ្ងៃចន្ទទី១៣ ខែកក្កដា ឆ្នាំ២០២០ នៅទីស្នាក់ការសាខាកាកបាទក្រហមកម្ពុជាខេត្តស្វាយរៀង បានរៀបចំកិច្ចប្រជុំការងារប្រចាំត្រីមាសទី ១ ឆ្នាំ២០២០ និងលើកទិសដៅការងារអនុវត្តបន្តត្រីមាសទី ៣ ក្រោមអធិបតីភាពលោក ម៉ែន វិបុល ប្រធានគណៈកម្មាធិការសាខាលោកស្រី ហៅ ច័ន្ទសិរីទេពី ចៅភិរុណ អនុប្រធានគណៈកម្មាធិការសាខាលោក លោកស្រីជាសមាជិកសមាជិកា នៃគណៈកម្មាធិការសាខា ក្រុមប្រតិបត្តិសាខាព្រមទាំង លោកលោកស្រីជាប្រធាន អនុប្រធានគណៈកម្មាធិការអនុសាខាក្រុងស្រុកទាំង៨ សរុបចំនួន ២៤ នាក់ ។
ក្នុងគោលបំណងដើម្បីបូកសរុបលទ្ធផលការងារប្រចាំត្រីមាសទី ១ ឆ្នាំ២០២០ និងលើកទិសដៅសម្រាប់អនុវត្តការងារបន្តប្រចាំត្រីមាសទី៣។ របៀបវារៈនៃកិច្ចប្រជុំរួមមាន៖
១. ស្តាប់របាយការណ៍សកម្មភាពប្រចាំត្រីមាសទី ១ និងទិសដៅការងារបន្ត
២. មតិលើកឡើងរបស់គណៈកម្មាធិការសាខាលើរបាយការណ៍ទាំងពីរ និងទិសដៅអនុវត្តបន្ត
៣. ការលើកឡើងរបស់អនុសាខាក្រុង ស្រុកទាំង ៨ នូវសកម្មភាពការងារនៅថ្នាក់អនុសាខា បញ្ហាប្រឈម និងដំណោះស្រាយ
៤. ការពិភាក្សារួមនៃគណៈកម្មាធិការសាខា ក្រុមប្រតិបត្តិសាខា និងអនុសាខា ក្រុង ស្រុក
៥. ឆ្លងសេចក្តីសម្រេច ស្តីពីការរៀបចំ និងការប្រព្រឹត្តិទៅរបស់សាខាអាណត្តិទី ៥
៦. អនុសាសន៍ផ្សេងៗ
បន្ទាប់ពីលោក សរ វណ្ណា នាយកសាខា អានរបាយការណ៍បូកសរុបលទ្ធផលសកម្មភាពការងារ និងរបាយការណ៍ហិរញ្ញវត្ថុរួចមកលោក ម៉ែន វិបុល ប្រធានគណៈកម្មាធិការសាខា បានពាំនាំនូវប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលកោតសរសើ និងថ្លែងអំណរគុណដល់គណៈកម្មាធិការសាខា ក្រុមប្រតិបត្តិសាខា អនុសាខាទាំងអស់ ដែលបានយកចិត្តទុកដាក់ខិតខំបំពេញការងារមនុស្សធម៌ប្រកប ដោយសកម្មភាពរស់រវើកមានវិវត្តន៍ពីមួយជំហ៊ានទៅមួយជំហ៊ាន ធ្វើឲ្យសាខាទទួលបាននូវជោគជ័យគួរឲ្យកត់សំគាល់ ពិសេសការងារផ្សព្វផ្សាយពីវិធានការទប់ស្កាត់កូវីដ-១៩។
លោកក៏បានអបអរសាទរ និងការចូលរួមរបស់គណៈកម្មាធិការសាខា និងអនុសាខានាពេលនេះ សរបញ្ជាក់ឲ្យឃើញនូវស្មារតី និងការទទួលខុសត្រូវចំពោះសកម្មភាព ដែលបានអនុវត្តន៍កន្លងមក ស្របទៅនឹងយុទ្ធសាស្ត្រទស្សនៈវិស័យ និង បេសកកម្ម សកម្មភាពការងារក្នុងវិស័យមនុស្សធម៌ រួមចំណែកកាត់បន្ថយភាពក្រីក្រជួយដល់ជនងាយរងគ្រោះបំផុត។ សមាជិកនៃអង្គប្រជុំ បានឯកភាពទាំងស្រុងនូវរបាយការណ៍លទ្ធផលការងារ និងរបាយការណ៍ហិរញ្ញវត្ថុ និងទិសដៅសម្រាប់អនុវត្តបន្តឆ្នាំ ២០២០ មតិលើកឡើងរបស់គណៈកម្មាធិការសាខា លើរបាយការណ៍ទាំងពីរ និងទិសដៅអនុវត្តបន្ត។
ប្រសាសន៍បូកសរុបកិច្ចប្រជុំលោកប្រធានគណៈកម្មាធិការសាខា បានសំណូមពរដល់អនុសាខាទាំង ៨ ក្រុង ស្រុក ត្រូវចុះពិនិត្យជាក់ស្តែងពីស្ថានភាពរបស់ប្រជាពលរដ្ឋដែលងាយរងគ្រោះ និងគ្រួសារដែលរងគ្រោះដោយសារគ្រោះមហន្តរាយផ្សេងៗ ដើម្បីឆ្លើយតបឲ្យបានទាន់ពេលវេលា និងពង្រឹងបន្ថែមលើការងាររដ្ឋបាល និងហិរញ្ញវត្ថុ ការងារស្វែងរកមូលនិធិត្រូវជួយ កៀរគរបន្ថែម និយាយជារួមដោយផ្តោតសំខាន់ទៅលើការរៀបចំ និងការប្រព្រឹត្តទៅនៃការងារស្នូល របស់សាខា និងអនុសាខាទាំងអស់បានអនុវត្តតាមវិស័យស្នូលទាំង ៤ ឲ្យមានដំណើរការល្អស្របតាម អាណត្តិនៃការងាររបស់ខ្លួន៕
