នៅព្រឹកថ្ងៃសុក្រ ទី១០ ខែកក្កដា ឆ្នាំ២០២០ រដ្ឋបាលខណ្ឌដូនពេញ បានបើកកិច្ចប្រជុំផ្សព្វផ្សាយ ស្ដីពីការរៀបចំគម្រោងរៀបចំសណ្តាប់ធ្នាប់ និង អភិវឌ្ឍន៍ចិញ្ចើមផ្លូវតាមបណ្ដោយមហាវិថីប្រព័ន្ធរុស្ស៊ី។
កិច្ចប្រជុំនោះធ្វើឡើងក្រោមអធិបតីភាព លោក សុខ ពេញវុធ អភិបាល នៃគណៈអភិបាលខណ្ឌដូនពេញ និង ដោយមានការចូលរួម តំណាងមន្ទីររៀបចំដែនដីនគររូបនីយកម្មសំណង់រាជធានីភ្នំពេញ បងប្អូនប្រជាពលរដ្ឋដែលមានលំនៅដ្ឋាន ក្រុមហ៊ុន អាជីវកម្មដ្ឋាន តាមបណ្តោយមហាវិថីសហព័ន្ធរុស្ស៊ី ចាប់ពីចំណុចស្ថានីយប្រេងតូតាល់ រហូតដល់ផ្លូវលេខ១៣២ ស្តុបវត្តនាគវ័ន្ត ព្រំប្រទល់ខណ្ឌទួលគោក។
គួរបញ្ជាក់ថា គម្រោងសាងសង់របង និងអភិវឌ្ឍន៍សោភ័ណភាពនៅតាមបណ្តោយមហាវិថីសហព័ន្ធរុស្ស៊ីនេះ នឹងមិនបណ្តាលឲ្យប៉ះពាល់ដល់ដីប្លង់កម្មសិទ្ធិ លំនៅដ្ឋាន របស់បងប្អូនប្រជាពលរដ្ឋ ដែលប្រមុខរាជរដ្ឋាភិបាលកម្ពុជា បានផ្តល់ជូនបងប្អូននាពេលកន្លងទៅ ឬប៉ះពាល់ដល់ការប្រកបអាជីវកម្ម នោះឡើយ ពោលគឺ រដ្ឋបាលរាជធានីភ្នំពេញ រដ្ឋបាលខណ្ឌ និងមន្ត្រីជំនាញពាក់ព័ន្ធ ធ្វើការស្ថាបនាតែចិញ្ចើមផ្លូវសាធារណៈរបស់រដ្ឋតែប៉ុណ្ណោះ៕
