បន្ទាយមានជ័យ ៖ នៅថ្ងៃទី០៥ ខែកក្កដា ឆ្នាំ២០២០ លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ និងលោកស្រី វង្ស ស៊ីម បានអញ្ជើញជាអធិបតីក្នុងពិធីសម្ពោធដាក់ឲ្យប្រើប្រាស់ជាផ្លូវនូវការនូវរោង ឧបោសថ(បោថ) ០១ខ្នង មានបណ្តោយ១២,៥០ម៉ែត្រនិងទទឹង៨,៥០ម៉ែត្រ ដែលផ្តួចផ្តើមកសាងដោយលោកឧត្តមសេនីយ៍ទោអាត់ ខែម និងលោកស្រីវង្ស ស៊ីម ដោយចំណាយថវិកាកសាងអស់ចំនួន១៥,៥០០ដុល្លា នៅវត្តពោធិរាមសាមគ្គីប៉ោយអង្គរ ស្ថិក្នុងភូមិប៉ោយអង្គរ ឃុំតាគង់ ស្រុកម៉ាឡៃ ខេត្តបន្ទាយមានជ័យ ។
ថ្លែងនាឱកាសនោះលោក ស្វាយ ជា អភិបាលរង ស្រុកម៉ាឡៃ និងលោកឧត្តមសេនីយ៍ទោ អាត់ ខែម ស្នងការនគរបាលខេត្ត បានមានប្រសាសន៍ថា ៖ កាលដើមឡើយនៅភូមិសាស្ត្រប៉ោយអង្គរនេះ គឺជាតំបន់សមរភូមិដ៏ក្តៅគគុក តែបច្ចុប្បន្នជាភូមិដ្ឋានរបស់ប្រជាពលរដ្ឋរស់នៅប្រកបដោយភាពសុខសាន្ត ។
ជាមួយគ្នានេះដែរសមិទ្ធផលដែលយើងទាំងអស់គ្នាទទួលបាននឹងត្រូវសម្ពោធដាក់ឲ្យប្រើប្រាស់នាពេលនេះ ក៏អាស្រ័យដោយប្រទេសជាតិយើងទទួលបាននូវសុខសន្តិភាពដ៏ពេញលេញ ក្រោមគោលនយោបាយឈ្នះ ឈ្នះ របស់សមត្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។ ប្រទេសជាតិត្រូវបានអភិវឌ្ឍនិងមានការរីកចម្រើនជាលំដាប់ទាំងវិស័យពុទ្ធិចក្រនិងអាណាចក្រ ។
លោកឧត្តមសេនីយ៍ទោ អាត់ ខែម បានបញ្ជាក់ថា ៖ បច្ចុប្បន្ននេះ នៅលើពិភពលោកបានជួបនូវវិបត្តិជម្ងឺឆ្លងរាតត្បាតដ៏កាចសាហាវ កូរ៉ូណាឬ កូវីដ១៩ ដោយឡែកនៅប្រទេសកម្ពុជាយើងក៏ទទួលរងនូវវិបត្តិនៃជម្ងឺឆ្លងកូវីដ១៩នេះផងដែរ ដែលសព្វថ្ងៃមានអ្នកឆ្លងវីរ៉ុសកូវីដ១៩នេះ ចំនួន១៤១នាក់ សំរាកព្យាបាលចំនួន១០នាក់ ជាសះស្បើយចំនួន១៣១នាក់ គ្មានអ្នកស្លាប់ ។ ដើម្បីទប់ស្កាត់នូវជម្ងឺនេះ សូមពុក ម៉ែបងប្អូន ត្រូវអនុវត្តតាមការណែនាំរបស់ក្រសួងសុខាភិបាល ដោយមានអនាម័យ លាងសម្អាតដៃនិងសាប៊ូ ឬ ទឹកជៀល ទៅណាមកណាត្រូវពាក់ម៉ាស់ជាប្រចាំ ចំពោះបងប្អូនដែលត្រឡប់មកពីចំណាកស្រុក ត្រូវតែនៅដាច់ដោយឡែកក្នុងរយៈពេល ១៤ថ្ងៃ និងកាត់បន្ថយការជួបជុំគ្នាជាដើម ។
លោកឧត្តមសេនីយ៍ស្នងការបានបញ្ជាក់ទៀតថា ៖ នៅក្នុងពិធីសម្ពោធនូវរោងឧបោសថ(បោថ)នៅ វត្តពោធិរាមសាមគ្គីប៉ោយអង្គរនេះដែរ លោកបាននាំយកនូវអំណោយរបស់ឯកឧត្តម នាយឧត្តមសេនីយ៍ឧបនាយករដ្ឋមន្ត្រីកែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ជាប្រធានក្រុមការងាររាជរដ្ឋាភិបាលចុះជួយខេត្តបន្ទាយមានជ័យ មកចែកជូនល់ពុកម៉ែ បងប្អូនប្រជាពលរដ្ឋ ដែលមកចូលក្នុងកម្មវិធីនេះចំនួន២១០នាក់ ម្នាក់ទទួលបានក្រម៉ា០១ ប្រជាពលរដ្ឋក្រីក្រចំនួន២០គ្រួសារក្នុង០១គ្រួសារទទួលបានអង្ករចំនួន២៥គ.ក្រ,ក្រម៉ា០១និងថវិកា២ម៉ឺនរៀល ។
ជាមួយគ្នានោះដែរ លោកបាននាំយកនូវទៀនវស្សា មកប្រគេនដល់ព្រះសង្ឈដែលគង់ចាំព្រះវស្សាក្នុងពុទ្ធិសីម៉ាវត្តចំនួន២០ក្នុងស្រុកម៉ាឡៃ ដោយក្នុង០១វត្ត មានទៀនវស្សា០១គូនិងគ្រឿងបរិក្ខាមួយចំនួន រួមទាំងថវិកា២០ម៉ឺនរៀល ព្រះសង្ឈចំនួន៣០អង្គ០១អង្គ២ម៉ឺនរៀល ។
ក្នុងនោះដែរ លោកឧត្តមសេនីយ៍ស្នងការបាននាំយកគ្រូពេទ្យរបស់ស្នងការដ្ឋាននគរបាលខេត្ត ទៅពិនិត្យជម្ងឺទូទៅនិងចែកជូនឱសថមួយចំនួនសម្រាប់ព្យាបាលជម្ងឺជូនដល់ប្រជាពលរដ្ឋជាង១០០នាក់នៅទីនោះ រួមទាំងមានពិធីដើមកូនឈើទុកជាំអនុស្សារីយ៍ផងដែរ ៕
