(ខេត្តកែប)៖ កាលកាលពីរសៀលថ្ងៃសុក្រទី០៣ ខែកក្កដា ឆ្នាំ ២០២០ គណៈបញ្ជាការឯកភាពរដ្ឋបាលខេត្តកែប បានបេីកកិច្ចប្រជុំ ព្រមជាមួយសមាសភាពពាក់ព័ន្ធបន្ថែមមួយចំនួនទៀត ក្ក្រោមអធិបតីភាព លោក សោម ពិសិដ្ឋ អភិបាលនៃគណៈអភិបាលខេត្តកែប និងជាប្រធានគណៈបញ្ជាការឯកភាពរដ្ឋបាលខេត្ត ។
កិច្ចប្រជុំដ៏មានសារៈសំខាន់នេះ លោកអភិបាលខេត្ត បានផ្សព្វផ្សាយនូវបទបញ្ជារបស់សម្តេចតេជោនាយករដ្ឋមន្ត្រី អំពីការកាត់ឆ្វៀលដីជូនពលរដ្ឋរស់នៅក្នុងតំបន់អភិរក្ស តំបន់សត្វព្រៃ និងតំបន់ការពារផ្សេងៗរបស់រដ្ឋ ដែលសម្តេចតេជោបានដាក់ចេញក្នុងសម័យប្រជុំគណៈរដ្ឋមន្ត្រីពេញអង្គ នៅថ្ងៃទី០៣ កក្កដា ២០២០។
ជាមួយនេះ លោកបានណែនាំដល់មន្ទីរ អង្គភាពដែលពាក់ព័ន្ធជាពិសេសគឺ មន្ទីរបរិស្ថានខេត្ត មន្ទីរកសិកម្ម រុក្ខាប្រមាញ់ និងនេសាទខេត្ត និងមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត គឺត្រូវត្រៀមសហការឲ្យបានល្អជាមួយក្រសួងក្នុងការតែកាត់ឆ្វៀលដីជូនបងប្អូនប្រជាពលរដ្ឋដែលបានមករស់នៅលើទីតាំងដីដែលជាគម្របព្រៃឈើ ឬជាតំបន់ការពារ ឬតំបន់អភិរក្សសត្វព្រៃរបស់រដ្ឋ ដែលមានពលរដ្ឋបានមកធ្វើផ្ទះរស់នៅជាងដប់ម្ភៃឆ្នាំមកហើយនោះ។
លោក សោម ពិសិដ្ឋ ក៏បានណែនាំបន្ថែមដល់មន្ទីរពាក់ព័ន្ធ រដ្ឋបាលក្រុង ស្រុក ត្រូវពិនិត្យ សិក្សា និងធ្វេីស្ថិតិឲ្យបានច្បាស់លាស់ប្រកបដោយតម្លាភាព និងសមធម៌នូវប្រជាពលរដ្ឋដែលបានតាំងទីលំនៅលេីដីរដ្ឋកន្លងមក បង្កើតកូនចៅរាប់សិបឆ្នាំមកហើយនៅលើទីតាំងដីទាំងនោះ ដេីម្បីចេញប្លង់ឲ្យពួកគាត់បានរស់នៅកាន់កាប់ស្របច្បាប់ ជៀសវាងប្រជាពលរដ្ឋមានការភ័យខ្លាច អត់ឃ្លាន រត់ទៅចំណាកស្រុកតទៅទៀត ។
ក្ក្រៅពីនេះ លោក សោម ពិសិដ្ឋ អភិបាលនៃគណៈអភិបាលខេត្តកែ ប ក៏បានដាក់ចេញទិសដៅការងារមួយចំនួនបន្ថែមទៀតសម្រាប់អនុវត្ត ជាពិសេស ការការពារសន្តិសុខសណ្តាប់ប្រជាពលរដ្ឋ ភ្ញៀវទេសចរ ជាតិ អន្តរជាតិដែលមកទស្សនា សម្រាក លម្ហែក្នុងខេត្ត និងការអភិវឌ្ឍខេត្តជាបន្តបន្ទាប់ ៕ សេង ណារិទ្ធ
