(ខេត្តកំពត)៖ នៅព្រឹក ថ្ងៃពុធ ទី០១ ខែកក្កដា ឆ្នាំ២០២០ រដ្ឋបាលខេត្តកំពត បានបើកកិច្ចប្រជុំគណៈអភិបាលខេត្ត ប្រចាំខែ មិថុនា ឆ្នាំ២០២០ ក្រោមអធិបតីភាព លោក ជាវ តាយ អភិបាលនៃគណៈអភិបាលខេត្តកំពត។
អញ្ជើញចូលរួមក្នុងកិច្ចប្រជុំនេះ ក៏មានវត្តមាន លោក លោកស្រី ជាអភិបាលរងខេត្ត លោក លោកស្រីនាយក នាយករងរដ្ឋបាលសាលាខេត្ត កងកម្លាំងទាំងបីប្រភេទ លោក លោកស្រីនាយក នាយករងទីចាត់ការ ប្រធាន អនុប្រធានអង្គភាពចំណុះសាលាខេត្ត ដោយឡែក ប្រធានមន្ទីរ-អង្គភាពជុំវិញខេត្ត ចូលរួមប្រជុំតាមរយៈ Video Online (Zoom Meeting) នៅតាមមន្ទីរ-អង្គភាពរៀងៗខ្លួន។
កិច្ចប្រជុំនាព្រឹកនេះប្រព្រឹត្តទៅតាមរបៀបវារៈសំខាន់ៗដូចខាងក្រោម៖
១. /ពិនិត្យពិភាក្សាលើសេចក្តីព្រាងរបាយការណ៍ប្រចាំខែមិថុនា ឆ្នាំ២០២០ ស្តីពីការអនុវត្តការងាររបស់រដ្ឋបាលខេត្ត ។
២. /ពិនិត្យពិភាក្សាលើសេចក្តីព្រាងរបាយការណ៍ប្រចាំឆមាសទី១ ឆ្នាំ២០២០ ស្តីពីការអនុវត្តការងាររបស់រដ្ឋបាលខេត្ត។
៣. /ពិនិត្យពិភាក្សាលើលទ្ធផលសម្រេចបានក្នុងការឆ្លើយតប នឹងសំណូមពររបស់ប្រជាពលរដ្ឋ ដែលបានលើកឡើងក្នុងអង្គវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តឆ្នាំ២០១៩។
៤./បញ្ហាផ្សេងៗ៖
ក្នុងកិច្ចប្រជុំនេះដែរ ក៏បានរំលេចនូវរបាយការណ៍របស់ លោក នៃ គង់ អភិបាលរងខេត្ត ស្តីពីវឌ្ឍនភាពនៃការ កសាងផ្លូវ០១ខ្សែស្របឆ្នេរសមុទ្រស្ថិតក្នុងភូមិសាស្ត្រ ឃុំព្រែកត្នោត ស្រុកទឹកឈូ និង ចំណាត់ការលើបណ្តឹងពាក់ព័ន្ធដីស្រែអំបិល ក្នុងឃុំបឹងទូក ស្រុកទឹកឈូ។
ជាមួយគ្នានេះ បើយោងតាមសេចក្តីរាយការណ៍របស់លោក នាក់ សុវណ្ណារី អភិបាលស្រុកទឹកឈូ ក៏បានលើកឡើងពីបញ្ហា ពាក់ព័ន្ធនឹងការចាក់ដីរំលោភព្រែកក្បាលរមាស ក្នុងភូមិសាស្ត្រស្រុកទឹកឈូ ផងដែរ។
ជុំវិញនឹងបញ្ហាប្រឈម ឬករណីពាក់ព័ន្ធនានា លោក ជាវ តាយ អភិបាលខេត្តកំពត ក៏បានលើកឡើងដោយជំរុញដល់មន្ទីរអង្គពាក់ព័ន្ធ និងអាជ្ញាធរ ក្រុង ស្រុក ត្រូវរួមគ្នាគិត រួមគ្នាដោះស្រាយ និងរួមគ្នាទទួលខុសត្រូវ ដើម្បីអនុវត្តការងារនៅក្នុងដែនសមត្ថកិច្ចរបស់ខ្លួនឲ្យកាន់តែមានប្រសិទ្ធភាព៕ សេង ណារិទ្ធ
